တောင်ကိုရီးယားနိုင်ငံတွင်း ဒီဂျစ်တယ်ငွေကြေးရောင်းဝယ်မှုကြောင့် နစ်နာဆုံးရှုံးမှုတွေ ရှိနေတဲ့အတွက် ဒီဂျစ်တယ်ငွေကြေးရောင်းဝယ် ရေးကောင်တာတွေပိတ်ဖို့ စီစဉ်နေတယ်လို့ တောင်ကိုရီးယားတရားရေးဝန်ကြီးကပြောပါတယ်။ 
 
ငွေကြေးဖောင်းပွမှုတွေဖြစ်စေပြီး ရင်းနှီးမြှုပ်နှံရာမှာလည်း အဆုံးအရှုံးများနေတဲ့ နိုင်ငံတွင်းဒီဂျစ်တယ်ငွေကြေးရောင်းဝယ်ရေး ဈေးကွက်ကို တောင်ကိုရီးယားတရားရေးဝန်ကြီး ပါ့ခ်ဆန်ကီက ပြင်းပြင်းထန်ထန်သတိပေးလိုက်ပါတယ်။
 
တောင်ကိုရီးယားနိုင် ငံတွင်းမှာ ဒီဂျစ်တယ်ငွေကြေးလွှဲပြောင်းရောင်းချခြင်းကို လောင်းကစားမှုအဖြစ်သတ်မှတ်ထားတယ်လို့ ပါ့ခ်ဆန်ကီကပြောခဲ့တာပါ။ တောင်ကိုရီးယားနိုင်ငံတွင်း ဒီဂျစ်တယ်ငွေကြေးရောင်းချရာမှာ ဆုံးရှုံးမှုကြီးကြီးမားမားတွေ့ခဲ့ရသူတွေရှိခဲ့တယ်လို့လည်း ပါ့ခ်ဆန်ကီကပြောခဲ့ပြီး တောင်ကိုရီးယားတရားရေးဝန်ကြီးဌာနက နိုင်ငံတွင်း ဒီဂျစ်တယ်ငွေကြေးလဲလှယ်ရေး ကောင်တာတွေကို ပိတ်သွားဖို့ရည်ရွယ်တဲ့ဥပဒေကြမ်းတစ်ခုကိုပြင်ဆင်နေပြီး တခြားဝန်ကြီးဌာနတွေ ကလည်း ဒီအစီအစဉ်နဲ့ပတ်သက်ပြီး ကန့်ကွက်တာမျိုးမရှိဘူးလို့ ပြောပါတယ်။ 
 
အခုသတိပေးချက်ကြောင့် တောင်ကိုရီးယားနိုင်ငံတွင်း ဒီဂျစ်တယ်ငွေကြေးဈေးကွက်မှာ လှုပ်လှုပ် ခတ်ခတ်ဖြစ်ခဲ့ပါတယ်။ တရားရေးဝန်ကြီးရဲ့မှတ်ချက်စကားဟာ တရားရေးဝန်ကြီးဌာနရဲ့ ပြင်ဆင်မှုကိုသာ ပြောလိုပြီး ဆုံးဖြတ်ချက် တစ်စုံတစ်ရာမချရသေးဘူးလို့ တောင်ကိုရီးယားသမ္မတ အိမ်တော်ပြောခွင့်ရသူ ယွန်ယမ်းချမ်က ပြောခဲ့ပါတယ်။ တောင်ကိုရီးယား အစိုးရရဲ့တုံ့ပြန်မှုတွေကို နောက်ဆုံးအတည်မပြုခင်မှာ ၀န်ကြီးဌာနတိုင်းက ဆွေးနွေးလေ့ရှိတယ်လို့လည်း ယွန်ယမ်းချမ်က ပြောပါတယ်။ 
 
 

Related News