ကမ္ဘာအနှံ့ ငှက်ဖျား ရောဂါထိန်းချုပ်ရေးလုပ်ငန်းတွေ နှောင့်နှေးနေပြီး ငှက်ဖျားရောဂါဖြစ်ပွားမှု ပြန်လည်မြင့်တက်လာပြီဖြစ်တယ်လို့ ကမာ်္ဘ့ကျန်းမာရေးအဖွဲ့ (WHO)  ရဲ့ အစီရင်ခံစာတစ်ခုမှာ ဖော်ပြလိုက်ပါတယ်။ ငှက်ဖျားရောဂါပြန့်ပွားမှုကို ထိန်းချုပ်နိုင်ခဲ့ပေမဲ့ ငှက်ဖျားရောဂါထိန်းချုပ်နိုင်မှု ပြန်လည်ရပ်တံ့ နေတယ်လို့ ကမ္ဘာ့ကျန်းမာရေးအဖွဲ့ (WHO) ရဲ့ (၂၀၁၇)ခုနှစ် ကမ္ဘာ့ငှက်ဖျား ရောဂါဆိုင်ရာ အစီရင်ခံစာမှာ ပါဝင်နေပါတယ်။
 
နိုင်ငံတော်တော်များများမှာ ငှက်ဖျားရောဂါ ဖြစ်ပွားမှု ပြန်လည်မြင့်တက်လာတယ်ဆိုတဲ့ သတင်းပို့တာတွေ ရှိနေတယ်လို့ ကမာ်္ဘ့ငှက်ဖျားရောဂါ တိုက်ဖျက်ရေးအစီအစဉ်ရဲ့ ညွှန်ကြားရေးမှူး ပက်ဒရိုအလွန်ဆိုက ပြောပါတယ်။ ငှက်ဖျားရောဂါ ထိန်းချုပ်ရေးဟာ လွန်ခဲ့တဲ့နှစ်အနည်းငယ်အတွင်းမှာ ပြန်လည်နှောင့်နှေးနေတယ်လို့  ပက်ဒရိုက ပြောပါတယ်။WHO ရဲ့(၂၀၂၀)ပြည့်နှစ်မှာ တစ်ကမာ်္ဘလုံး ငှက်ဖျားရောဂါကင်းရှင်း ရေးရည်မှန်းချက် ဟာလည်း နှောင့်နှေးဖွယ်ရှိနေပါတယ်။
 
ငှက်ဖျားရောဂါတိုက်ဖျက်ရေးအတွက် ကမ္ဘာ့ရန်ပုံငွေရရှိမှုဟာ လည်း (၂၀၁၀)ခုနှစ်ကတည်းက နှောင့်နှေးလာတယ်လို့ ပြောပါတယ်။ ရန်ပုံငွေနည်းလာတာကြောင့် ငှက်ဖျားရောဂါတိုက်ဖျက်ရေး အတွက် လိုအပ်တဲ့ ပစ္စည်းတွေရရှိနိုင်မှု နည်းလာတယ်လို့ ပက်ဒရိုက ပြောပါတယ်။
 
ငှက်ဖျားဆေးယဉ်လာတာကြောင့်လည်း ရောဂါတိုက်ဖျက်ရေးနှောင့်နှေးနေတာဖြစ်ပြီး ဆေးစိမ်ခြင်ထောင်တွေနဲ့ ခြင်ဆေးဖြန်းတာတွေလုပ်ပြီး ငှက်ဖျားရောဂါ ကာကွယ် ရေးလုပ်ငန်းတွေကို ဦးစားပေးဆောင်ရွက်သင့်တယ်လို့လည်း ပက်ဒရိုကပြောပါတယ်။
 
ကမ္ဘာ့ငှက်ဖျားရောဂါ ကာကွယ်ရေး အစီရင်ခံစာဟာ ငှက်ဖျားရောဂါစီမံကိန်းတွေမှာ ရင်းနှီးမြှုပ်နှံမှုတိုးတက်လာတာတွေ၊ သုတေသန လုပ်ငန်းတွေ၊ ငှက်ဖျားရောဂါ ကာကွယ်ရေးတွေ၊ ရောဂါရှာဖွေတာတွေနဲ့ ကုသရေး လုပ်ငန်းစဉ်ကို လေ့လာထားတဲ့အစီရင်ခံစာဖြစ်ပါတယ်။ 
 
 

Related News