ကင်ညာနိုင်ငံမှာ အခုတစ်ပတ်အတွင်း ကျင်းပခဲ့တဲ့ရွေးကောက်ပွဲမှာ လက်ရှိတာဝန် ထမ်းဆောင်နေဆဲဖြစ်တဲ့ သမ္မတ ကင်ညာတာ ထပ်မံရွေးကောက်ခံပါတယ်။ မဲရလဒ်ကို တရားဝင် ကြေညာပြီးပြီဖြစ်ပေမဲ့ အတိုက်အခံတွေဘက်က ကန့်ကွက်တာတွေလည်း ရှိနေပါတယ်။ အင်္ဂါနေ့တုန်းက ကျင်းပခဲ့တဲ့ရွေးကောက်ပွဲအပြီးမှာ လက်ရှိသမ္မတ ကင်ညာတာဟာ သမ္မတအဖြစ်ဆက်လက်တာဝန်ထမ်းဆောင်ဖို့ ပြန်လည်ရွေးကောက်ခံရပြီလို့ ရွေးကောက်ပွဲ အရာရှိတွေက ပြောပါတယ်။
 
မစ္စတာ ကင်ညာတာဟာ ပြိုင်ဘက် ရီလာ အိုဒင်ဂါကို (၅၄.၃)မဲ၊ (၄၄.၇)မဲ အနိုင်ရရှိခဲ့တာဖြစ်ပါတယ်။ အခုလိုအနိုင်ရရှိကြောင်းကြေညာပြီးတဲ့ နောက်မှာတော့ မစ္စတာ ကင်ညာတာက အတိုက်အခံကိုထောက်ခံသူတွေကိုလည်း စည်းလုံးကြဖုိ့ တိုက်တွန်းလိုက်ပါတယ်။ ဒါပေမဲ့ အတိုက်အခံတွေဘက်ကတော့ မဲရလာဒ်တွေဟာ မပိမရိဟန်ဆောင် ထားတဲ့ လုပ်ကွက်တွေဖြစ်တယ်လို့ပြောဆိုဝေဖန်ထားပြီး မဲရလဒ်တွေကို ပယ်ချထား ပါတယ်။ တစ်ဖက်မှာလည်း ဒီမဲရလဒ်တွေကို နိုင်ငံတကာရွေးကောက်ပွဲ စောင့်ကြည့်လေ့လာသူတွေက ထောက်ခံထားပါတယ်။ မစ္စတာ ကင်ညာတာကလည်း အခုရွေးကောက်ပွဲကို လွတ်လပ်မျှတပြီး ယုံကြည်မှုပြည့်ဝတဲ့ရွေးကောက်ပွဲဖြစ်အောင် ကျင်းပ ပေးခဲ့တယ်လို့ဆိုပါတယ်။
 
အတိုက်အခံအင်အားစုတွေများတဲ့ ခီဆုမူမြို့ကြီးနဲ့ မြို့တော် နိုင်ရိုဘီက လက်လုပ် လက်စား ရပ်ကွက်တွေမှာတော့ ရွေးကောက်ပွဲမဲရလဒ်ကို ဒေါသတကြီးတုန့်ပြန်နေကြပြီး စီးပွားရေးလုပ်ငန်း တစ်ချို့ တိုက်ခိုက်ခံ ရတာတွေဖြစ်ပွားခဲ့ပါတယ်။ အဲဒီဆန္ဒပြပွဲတွေရဲ့နေရာ တော်တော်များများမှာ ဆန္ဒပြသူတွေကို ရဲတွေက မျက်ရည်ယိုဗုံးသုံးပြီး လူစုခွဲခဲ့ရတာမျိုး ဖြစ်ပွားခဲ့ပါတယ်။ အတိုက်အခံသမ္မတလောင်း မစ္စမာ အိုဒင်ဂါကိုထောက်ခံသူတွေကတော့ ရွေးကောက်ပွဲမှာ မစ္စတာ အိုဒင်ဂါနိုင်တယ်ဆိုတဲ့အကြောင်းကို သူတို့ရယူထားတဲ့ရွေးကောက်ပွဲ မဲရလဒ်တွေကို စုစည်းဖော်ပြပြီး အခိုင်အမာပြော ထားပါတယ်။ ကင်ညာရွေးကောက်ပွဲ ကော်မရှင်ကတော့ အတိုက်အခံတွေဘက်က ထုတ်ပြန်လာတဲ့ရလဒ်တွေဟာ တရားမ၀င် သလို တွက်ချက်မှုပိုင်းမှာ အမှားတွေရှိနေတယ်လို့ ပြောပါတယ်။ 
 
 
 

Related News