ဘရာဇီးအိုလံပစ်ကော်မတီဥက္ကဋ္ဌကားလို့စ်နျု့ဇ်မန်းအား ၂၀၁၆ ခုနှစ်ရီရိုအိုလံပစ်ပြိုင်ပွဲ အတွက် မဲဝယ်ယူမှုဖြင့် ဘရာဇီးရဲတပ်ဖွဲ့က ဖမ်းဆီးထိန်းသိမ်းလိုက်ကြောင်း သိရသည်။

အသက် (၇၅) နှစ်အရွယ်ရှိ နျု့ဇ် မန်းသည် ဘရာဇီးအိုလံပစ်ဥက္ကဋ္ဌအဖြစ် ၁၉၉၅ ခုနှစ်ကတည်းက တာဝန်ထမ်းဆောင်ခဲ့ခြင်းဖြစ်ကာ တောင်အမေရိကတွင် ပထမဦးဆုံးအကြိမ်အိုလံပစ်ပြိုင်ပွဲကျင်းပခွင့်ရရန်အတွက် ကြိုးပမ်းပေးခဲ့သူလည်းဖြစ်သည်။

သို့သော်လည်း နျု့ဇ်မန်းသည် အဂတိလိုက်စားမှုဖြင့် စစ်ဆေးခံနေရသော နိုင်ငံတကာအိုလံပစ်ကော်မတီဝင်ဟောင်းပါပါမက်ဆာတာဒီရက်အား လာဘ် ငွေဒေါ်လာ (၂) သန်းပေးအပ်ရာတွင် ပါဝင်ပတ်သက်နေသည်ဟု စွပ်စွဲခံထားရသည်။

၎င်း၏နေအိမ်အား စက်တင်ဘာလ အတွင်းက ၀င်ရောက်စစ်ဆေးခဲ့ပြီး နိုင်ငံကူးလက်မှတ်အား သိမ်းဆည်းခဲ့သည်။ ယခုလတွင်လည်း နေအိမ်သို့ ၀င်ရောက် ရှာဖွေခြင်းပြုလုပ်ခဲ့ရာ စာရွက်စာတမ်းသက်သေများနှင့်တကွ သိမ်းဆည်းရမိခဲ့ခြင်းဖြစ်သည်။

နျု့ဇ်မန်းနှင့်အတူ ဘရာဇီး အိုလံပစ်ကော်မတီ၏ အထွေထွေဒါရိုက်တာဖြစ်သူ လီယိုနာဒိုဂရီနာကိုလည်း ဖမ်းဆီးကာ ရီရိုဒီဂျနေးရိုးမြို့မြောက်ဘက်ရှိ ဘင်နီဖီတာအကျဉ်းထောင်သို့ ပို့ဆောင်ခဲ့ပြီးဖြစ်သည်။ ၄င်းတို့နှစ်ဦးစလုံးအား အဂတိလိုက်စားမှုနှင့် ငွေကြေးခ၀ါချမှုတို့ဖြင့် စွဲချက်တင်သွားမည်ဖြစ်သည်။ နျု့ဇ်မန်း၏ ပိုင်ဆိုင်မှုများသည် ပြီးခဲ့သည့် (၁၀) စုနှစ်တာကာလအတွင်း (၄၅၇) ရာခိုင်နှုန်း အထိမြင့်တက်လာခဲ့သည်ဟုလည်း သိရသည်။ 

 

 

Related News