စပိန်ဗဟိုအစိုးရဟာ ကတ်တလိုးနီးယားဒေသကို ပေးထားတဲ့ကိုယ်ပိုင်အုပ်ချုပ်ခွင့်ရ အခွင့်အာဏာကို ပြန်သိမ်းပြီး တိုက်ရိုက်အုပ်ချုပ်မယ့် အစီအမံတွေကို ဒီကနေ့မှာကြေညာဖို့ ရှိနေပါတယ်။ အခုအစီအစဉ်ကို စပိန်ဝန်ကြီးချုပ် မာရီရာနို ရာဂျွိုင်းက ကြေညာလိုက်တာဖြစ်ပြီး ဒါဟာ ကတ်တလန်ဒေသကို စပိန်နိုင်ငံထဲကနေ လွတ်လပ်ရေးရယူမယ့်ပြည်သူ့ဆန္ဒခံယူပွဲအပြီးမှာ ဗဟိုအစိုးရဘက်က တုံ့ပြန်မှုတစ်ခုလည်း ဖြစ်လာပါတယ်။
 
ဝန်ကြီးချုပ်ရဲ့အခုခြေလှမ်းကို စပိန်ဘုရင် ဖီးလစ်က ထောက်ခံဖို့လိုနေတာဖြစ်ပြီး စပိန်နိုင်ငံစည်းလုံးညီညွတ်ရေးနဲ့အစိုးရကို ထောက်ခံတဲ့ စကားတွေကို ဘုရင်က ပြောဆိုထားပါတယ်။ စပိန်နိုင်ငံဟာ လက်ရှိမှာ အမျိုးသားနယ်နိမိတ်ကနေ ခွဲထွက်မယ့် လက်မခံနိုင်တဲ့ကြိုးပမ်းမှုကို ရင်ဆိုင်နေရတယ်လို့ ဘုရင်ဖီးလစ်က ပြောပါတယ်။ အဲဒီအခြေအနေကို ဒီမိုကရေစီနည်းကျတဲ့အင်စတီကျူးရှင်းတွေရဲ့လုပ်ပိုင်ခွင့်ကို အသုံးပြုတာ၊ ဖွဲ့စည်းပုံကိုလေးစား တာနဲ့ ပါလီမန်ဒီမိုကရေစီစနစ်တန်ဖိုးစည်းကမ်းတွေနဲ့အညီဖြေရှင်းသွားမယ်လို့ ဘုရင်ဖီးလစ်ကဆိုပါတယ်။
 
ဝန်ကြီးချုပ် ရာဂျွိုင်းကတော့ ကတ်တလန်ဒေသနဲ့ပတ်သက်ပြီး ဗဟိုအစိုးရရဲ့ ကြားဝင်ဖြေရှင်းမှုကို သိသိသာသာမြင်တွေ့နိုင်မယ့် အစိုးရအဖွဲ့အရေးပေါ် အစည်းအဝေးကို ဒီနေ့မှာခေါ်ယူဖို့ရှိနေပါတယ်။ နိုင်ငံတစ်နိုင်ငံရဲ့တစ်စိတ်တစ်ဒေသမှာ ဥပဒေ မစိုးမိုးနိုင်တာမျိုးမဖြစ်အောင် ကာကွယ်ဖို့ ကတ်တလန်ကိုယ်ပိုင်အုပ်ချုပ်ခွင့်ရဒေသအရေးမှာ ဗဟိုအစိုးရက အစီအမံတွေချမှတ်မှာဖြစ်တယ်လို့ ၀န်ကြီးချုပ်က ပြောပါတယ်။
 
လက်ရှိ ကတ်တလိုးနီးယားဒေသခေါင်းဆောင် ခွဲထွက်ရေးလိုလားသူ ပူဒီမွန့်နဲ့ သူ့ဝန်ကြီးအဖွဲ့ကို ရာထူးကနေ ဖယ်ရှားပြီး အစားထိုးအပ်ခန့်တာနဲ့ ကတ်တလန်မှာ ရွေးကောက်ပွဲစောကျင်းပတာမျိုးလုပ်မယ်ဆိုတဲ့ သတင်းတွေကိုတော့ ၀န်ကြီးချုပ်က အတည်ပြုထားခြင်းမရှိသေးပါဘူး။
 
 

Related News