တစ်ဖက်သတ်အပစ်ရပ်မယ်လို့ပြောပြီးယီမင်ကဟူသီသူပုန်တွေက နိုင်ငံရဲ့အဓိကဆိပ်ကမ်းမြို့ဟူဒေးဒါကဆိပ်ကမ်း(၃)ခုကနေ ဆုတ်ခွာခဲ့ပေမဲ့ သစ္စာခံတပ်ဖွဲ့တွေကိုနေရာပြန်ချထားတာဟာ နိုင်ငံတကာကိုသတင်းမှားပေးတာလို့ ယီမင်ပြန်ကြားရေးဝန်ကြီးက တုံ့ပြန်ပါတယ်။ စနေနေ့ကစပြီးယီမင်ကအီရန်ကျောထောက်နောက်ခံပေးထားတဲ့ဟူသီသူပုန်တွေဟာ နိုင်ငံထဲကို နိုင်ငံတကာအထောက်အပံ့ တွေအဓိက၀င်တဲ့ဟူဒေးဒါမြို့ရဲ့အဓိကဆိပ်ကမ်း(၃)ခုကနေဆုတ်ခွာခဲ့ပါတယ်။ ဟူသီတွေကဆိပ်ကမ်း(၃)ခုမှာတစ်ဖက်သတ် အပစ်ရပ်မယ်လို့ ကုလသမဂ္ဂကသောကြာနေ့တုန်းကထုတ်ပြန်ခဲ့ပါတယ်။ စနေနေ့နေ့လည်ပိုင်းမှာစပြီးသူတို့တပ်ဖွဲ့တွေဆုတ်ခွာမယ်လို့ ဟူသီတော်လှန်ရေးကော်မတီအကြီးအကဲမိုဟာမက် အလီအယ်ဟူသီကပြောပါတယ်။ မျက်မြင်သက်သေတွေရဲ့အဆိုအရဟူသီတပ်ဖွဲ့တွေတပ်ဆုတ်သွားပြီးနောက် ဒေသတွင်းကမ်းခြေစောင့်တပ်ဖွဲ့က ရဲဝတ်စုံတွေဝတ်ပြီးဆိပ်ကမ်းတွေမှာနေရာယူထားတယ်လို့သိရပြီးကုလသမဂ္ဂစောင့်ကြည့်ရေးအဖွဲ့တွေကလည်းဆိပ်ကမ်းအဆောက်အအုံတွေကိုစစ်ဆေးနေပါတယ်။ ကမ်းခြေစောင့်တပ်သားတွေဟာဟူသီတွေကိုသစ္စာခံထားတဲ့လူတွေဖြစ်ပြီးဟူသီတွေရဲ့လုပ်ရပ်ဟာ နိုင်ငံတကာအသိုက်အ၀န်းနဲ့ ကုလသမဂ္ဂလုံခြုံရေးကောင်စီတို့ကိုသတင်းမှားတွေပေးတာလို့ ဆောဒီကျောထောက်နောက်ခံ ပေးထားတဲ့ ယီမင်အစိုးရရဲ့ပြန်ကြား ရေးဝန်ကြီးမူအမ်မာအယ်အာယာနီကတွစ်တာကနေတုံ့ပြန်ထားပါတယ်။ (၂၀၁၅)ခုနှစ်မှာစခဲ့တဲ့ ယီမင်ပြည်တွင်းစစ်မှာဟူဒေးဒါ ဟာ (၂၀၁၇)ခုနှစ်ကစပြီးထိပ်တိုက်တွေ့မှုတွေရဲ့အာရုံစိုက်ခံခဲ့ရတဲ့နေရာပါ။ ပြီးခဲ့တဲ့ဒီဇင်ဘာတုန်းက ယီမင်အစိုးရနဲ့ဟူသီတွေ ကြားအပစ်ရပ်သဘောတူညီချက်ရခဲ့ပြီး နှစ်ဖက်စလုံးကအပစ်ရပ်စာချုပ်ကိုလိုက်နာပေမဲ့ တပ်တော့ ပြန်မဆုတ်ခဲ့ပါဘူး။

 

 

Related News