အမေရိကန်ပြည်ထောင်စု၏ ရွေးကောက်ခံသမ္မတ Donald Trump က ၄င်း၏ အကြီးတန်းအကြံပေးပုဂ္ဂိုလ်တစ်ဦးအဖြစ် သားမက်ဖြစ်သူ Jared Kushner အား လျာထားလိုက်သည့်အတွက် ဆွေမျိုးသားချင်းကောင်းစားရေးလုပ်ရပ်များကို တားမြစ်ထားသော ဥပဒေများကို ချိုးဖောက်မှုအပြင် ကိုယ်ကျိုးရှာသည့် လုပ်ရပ်မျိုးများ ဖြစ်နိုင်ချေရှိ၊ မရှိ စစ်ဆေးပေးရန်အလို့ငှာ ဒီမိုကရက်တစ်လွှတ်တော်အမတ်များက ကျင့်ဝတ်သိက္ခာ ထိန်းသိမ်းစောင့်ရှောက်ရေးတာဝန်ရှိသူများအား တောင်းဆိုလိုက်ကြောင်း သိရှိရသည်။

Trump ၏ အကြံပေးပုဂ္ဂိုလ်အဖြစ် အမည်စာရင်းတင်သွင်းခံလိုက်ရသော Kushner ကမူ နိုင်ငံရပ်ခြားက ၄င်း၏ ပိုင်ဆိုင်မှုများအပြင်၊ ရင်းနှီးမြှုပ်နှံမှု ဆိုင်ရာ လုပ်ငန်းတစ်ခုနှင့် နယူးယောက်မြို့ရှိ ရုံးခန်းပိုင်ဆိုင်မှုများကိုပါ လွှဲပြောင်းပေးရန် စီစဉ်နေကြောင်း ၄င်း၏ ရှေ့နေဖြစ်သူက ပြောကြားခဲ့သည်။ ၄င်းအမည်ဖြင့် ဖွင့်လှစ်ထားသော ကုမ္ပဏီများ၏ အမှုဆောင်အရာရှိချုပ်ရာထူးနှင့် New York Observer သတင်းစာထုတ်ဝေသူတာဝန်များကိုပါ အိမ်ဖြူတော်၌ စတင်တာဝန်မယူခင် နှုတ်ထွက်သွားမည်ဖြစ်ကြောင်း လည်း ပြောကြားခဲ့သည်။

 ဒီမိုကရက်တစ်ပါတီ အောက်လွှတ်တော် အမတ် (၆) ဦးကမူ အစိုးရတာဝန်ရှိသူတစ်ဦးအနေဖြင့် ၄င်းတာဝန်ယူထားသော အစိုးရအေဂျင်စီတစ်ခုတွင် မိသားစုဝင်တစ်ဦးဦးအား ရာထူးတာဝန်ခန့်အပ်ခွင့်မရှိဟူသည့် ၁၉၆၇ ခုနှစ် ဥပဒေကို ထောက်ပြကာ ရှေ့နေချုပ် Loretta Lynch နှင့် အမေရိကန်အစိုးရကျင့်ဝတ်သိက္ခာဆိုင်ရာရုံးကို စာရေး သားပေးပို့ခဲ့ခြင်းဖြစ်သည်။ အိမ်ဖြူတော်သည် အစိုးရအေဂျင်စီတစ်ခု မဟုတ်သည့်အတွက် ယင်းဥပဒေမှာ သမ္မတနှင့် အကျုံးဝင်မည်မဟုတ်ကြောင်း Kushner ၏ ရှေ့နေ Jamie Gorelick မှ ပြန်လည်ချေပပြောကြားခဲ့သည်။ Kushner  တာဝန်ယူရမည့် လုပ်ငန်းစဉ်များတွင် ကုန်သွယ်ရေးနှင့် အရှေ့အလယ်ပိုင်းရေးရာ ကိစ္စများ ပါဝင်မည်ဖြစ်ပြီး အိမ်ဖြူတော် အရာရှိချုပ် Reince Priebus၊ မဟာဗျုဟာရေးရာအကြီးအကဲ Stephen Bannon တို့နှင့် လက်တွဲကာ လုပ်ဆောင်သွားရ မည်ဖြစ်ကြောင်း  ရွေးကောက်ခံသမ္မတ Trump ၏ အစိုးရသစ်ဖွဲ့စည်းရေးအဖွဲ့မှ တာဝန်ရှိသူများက ပြောကြားခဲ့ကြောင်း သိရှိရသည်။

 

Related News