အမေရိကန်နိုင်ငံ၏ THAADဒုံးကျည်ကာကွယ်ရေးစနစ်အားစမ်းသပ်ခဲ့ရာတွင် မြောက်ကိုရီးယားနိုင်ငံကဲ့သို့နိုင်ငံများကတီထွင်လျှက်ရှိသည့်ဒုံးကျည်မျိုးနှင့် အလားသဏ္ဍာန်တူသောတာလတ်ပစ်ပဲ့ထိန်းဒုံးကျည် (IRBM)ကိုအောင်မြင်စွာ ကြားဖြတ်ပစ်ချနိုင်ခဲ့ကြောင်းအမေရိကန်ပြည်ထောင်စုကယမန်နေ့တွင် ပြောကြားခဲ့သည်။ ဇူလိုင်လ ၄ ရက်ကမြောက်ကိုရီးယားနိုင်ငံမှ ပစ်လွှတ်ခဲ့သောတိုက်ချင်းပစ်ဒုံးကျည် (ICBM) နှင့်ပတ်သက်၍ စိုးရိမ်မှုများမြင့်တက်ခဲ့ပြီးနောက် လပေါင်းများစွာကြာစီစဉ်ခဲ့သည့် ပစိဖိတ်သမုဒ္ဒရာအပေါ်ဖြတ်ကျော်၍ အမေရိကန်ဒုံးပျံကာကွယ်ရေးစနစ်စမ်းသပ်ချက်မှာလူသိများထင်ရှားလာခဲ့ကြောင်းသိရသည်။

အဆိုပါစမ်းသပ်မှုသည် Terminal High Altitude Area Defense (THAAD)ဒုံးကျည်ကာကွယ်ရေးစနစ်ဖြင့် သတ်မှတ်ထားသောပစ်မှတ်ရှိရာသို့ဝင်ရောက်လာသော တာလတ်ပစ်ဒုံးကျည်တစ်ခုကိုပထမဦးဆုံးအကြိမ်ကာကွယ်နိုင်ခဲ့ခြင်းဖြစ်ကြောင်းသိရသည်။ ၄င်းဒုံးကျည်သည် တာတိုပစ်ဒုံးကျည်များထက် ပိုမိုမြန်ဆန်မှုရှိပြီးထိအောင်ပစ်ခတ်နိုင်ဖို့လည်းပိုမိုခဲယဉ်းကြောင်း ကျွမ်းကျင်သူများကပြောကြားခဲ့သည်။ စမ်းသပ်မှု၌ အသုံးပြုခဲ့သည့် IRBMကိုအမေရိကန်ပြည်ထောင်စုသို့ ခြိမ်းခြောက်လာနိုင်သည့် ဒုံးကျည်အမျိုးအစားများကဲ့သို့ အလားတူပြုမူနိုင်အောင် ပုံစံရေးဆွဲထားကြောင်းအမေရိကန်ဒုံးပျံကာကွယ်ရေးဌာနကပြောကြားခဲ့သည်။

THAADဒုံးခွင်းဒုံးစနစ်ဖြင့် IRBMဒုံးကျည်များကိုအောင်မြင်စွာတားဆီးနိုင်ခဲ့ကြောင်းလက်တွေ့ပြသခဲ့ခြင်းအားဖြင့် မြောက်ကိုရီးယားနှင့် အခြားသောတိုင်းပြည်များတွင် ဒုံးပျံများတီထွင်ဖန်တီးနေသည့်ကိစ္စကိုဆန့်ကျင်နိုင်သည့် အမေရိကန်နိုင်ငံ၏ ကာကွယ်ရေးစွမ်းရည်ကို မြှင့်တင်နိုင်ခဲ့ကြောင်းအမေရိကန်ဒုံးပျံကာကွယ်ရေးဌာနကပြောကြားခဲ့သည်။ယခုစမ်းသပ်ချက်တွင် THAADစနစ်သည် မိုင်ပေါင်း ၁၈၀၀ မှ ၃၁၀၀ အတွင်း (၃၀၀၀ ကီလိုမီတာမှ ၅၅၀၀ ကီလိုမီတာ) မှ ပစ်လွှတ်သောIRBMများကိုကာကွယ်နိုင်စွမ်းရှိကြောင်းသက်သေပြနိုင်ခဲ့သည်ဟုဆိုသည်။ အကယ်၍ မြောက်ကိုရီးယားနိုင်ငံအနေဖြင့် အမေရိကန်ကုန်းမကြီးကိုထိအောင်ပစ်မည်ဆိုလျှင် မိုင်ပေါင်း ၃၄၀၀ ကျော် သို့မဟုတ် ၅၅၀၀ ကီလိုမီတာအထက် သွားနိုင်သည့် ICBMတစ်ခုဖြင့်ပစ်ခတ်ရန်လိုကြောင်းသိရသည်။ 

 

 

Related News