ဆော်ဒီအာရေးဗီးယားနိုင်ငံ၊ ဂျက်ဒါ့ရှိအယ်လ်ဆာလံနန်းတော် အ၀င်ဂိတ်များရှိရာသို့မော်တော်ကားမောင်းဝင်လာကာ လုံခြုံရေးများအားသေနတ်ဖြင့်ပစ်ခတ်ခဲ့သူ ၂၈ နှစ်အရွယ်အမျိုးသားတစ်ဦးယမန်နေ့ကသေဆုံးခဲ့ကြောင်း ဆော်ဒီပြည်ထဲရေးဝန်ကြီးဌာနကသတင်းထုတ်ပြန်ခဲ့သည်။ အဆိုပါအမျိုးသား၏ အမည်မှာMansour al-Amri ဖြစ်ပြီးဆော်ဒီနိုင်ငံသားတစ်ဦးဟုသိရသည်။

ယမန်နေ့တိုက်ခိုက်မှုတွင် ဆော်ဒီအစောင့်တပ်သားနှစ်ဦးသေဆုံးခဲ့ပြီးအခြားလုံခြုံရေးသုံးဦးဒဏ်ရာရရှိခဲ့ကြောင်းသိရသည်။ အဆိုပါဧရိယာအတွင်းယမန်နေ့ဖြစ်ပွားခဲ့သည့်တိုက်ခိုက်မှုနှင့်ပတ်သက်၍ အတည်မပြုနိုင်သောသတင်းများထွက်ပေါ်လာခဲ့ပြီးနောက် အမေရိကန်သံရုံးကအမေရိကန်နိုင်ငံသားများအားသတိပေးချက်စောစီးစွာထုတ်ပြန်ခဲ့ကြောင်းသိရသည်။ အဆိုပါဧရိယာအတွင်း ရဲလုပ်ငန်းဆိုင်ရာလုပ်ထုံးလုပ်နည်းများဆက်လက်ဆောင်ရွက်သွားဖွယ်ရှိနေသည့်အတွက် အမေရိကန်နိုင်ငံသားများကိုသွားလာမှုသတိပေးချက်ထုတ်ပြန်ထားကြောင်းအမေရိကန်သံရုံးကပြောကြားခဲ့သည်။

ဒေသခံမီဒီယာများဖော်ပြချက်အရတိုက်ခိုက်မှုမှာဒေသစံတော်ချိန် ၁၅ နာရီ ၁၅ မိနစ်ခန့်ကဖြစ်ပွားခဲ့ကြောင်းသိရသည်။ လုံခြုံရေးများကတိုက်ခိုက်မှုကိုတားမြစ်ခဲ့ပြီးသေနတ်သမားအားအသေပစ်သတ်ကြခဲ့ခြင်းဖြစ်သည်။ သေနတ်သမားသည် မော်တော်ကားတစ်စီးပေါ်မှ ကင်းစခန်းရှိရာသို့ သေနတ်ဖြင့်ပစ်ခတ်ခဲ့ကြောင်းနှင့် တော်ဝင်အစောင့်စစ်သားများကချက်ချင်းဆိုသလို ပြန်လည်တုံ့ပြန်ပစ်ခတ်ခဲ့ကြသည့်အတွက် သေနတ်သမားသေဆုံးခဲ့ကြောင်း ဆော်ဒီပြည်ထဲရေးဝန်ကြီးဌာနလုံခြုံရေးဆိုင်ရာပြောရေးဆိုခွင့်ရှိသူတစ်ဦးကပြောကြားခဲ့သည်။

တိုက်ခိုက်မှု၌ သေဆုံးသွားသူနှစ်ဦးမှာတပ်ကြပ်ကြီးတစ်ဦးနှင့် တပ်သားAbdullah bin Faisal al-Subaieတို့ဖြစ်ကြကြောင်း ဆော်ဒီပြည်ထဲရေးဝန်ကြီးဌာနကအတည်ပြုနိုင်ခဲ့ပြီး၊တပ်ကြပ် Walid bin Ali Shami နှင့် တပ်သားများဖြစ်ကြသောAhmad Saleh Al-Qarniနှင့် Abdullah Hindi Al-Subaieတို့သုံးဦးမှာတိုက်ခိုက်မှုအတွင်းထိခိုက်ဒဏ်ရာများရရှိခဲ့ပြီးလိုအပ်သောကုသမှုများခံယူလျက်ရှိပြီဖြစ်ကြောင်းဆော်ဒီပြည်ထဲရေးဝန်ကြီးဌာနကပြောကြားခဲ့သည်။ တိုက်ခိုက်သူထံတွင် ရုရှားနိုင်ငံလုပ် Kalashnikovသေနတ်တစ်လက်နှင့် လက်လုပ်ဓါတ်ဆီဗုံးသုံးလုံးအားရှာဖွေတွေ့ရှိခဲ့ကြောင်းသိရသည်။

နန်းတော်ပြင်ပကင်းစခန်းမှာအများပြည်သူသွားလာရာလမ်းပေါ်၌တည်ရှိကြောင်းနှင့် သေနတ်ဖြင့်ပစ်ခတ်သူသည် ဘာကြောင့်တိုက်ခိုက်ခဲ့သည်၊ မည်သူတို့နှင့်ဆက်နွယ်နေသည်တို့ကိုဆက်လက်စုံစမ်းစစ်ဆေးလျက်ရှိကြောင်း ဆော်ဒီပြည်ထဲရေးဝန်ကြီးဌာနပြောရေးဆိုခွင့်ရှိသူMansour al-Turki က Al Arabiyaသတင်းဌာနသို့ အတည်ပြုပြောကြားခဲ့ကြောင်းသိရသည်။ 

 

 

Related News