ကတ်တလန်ဒေသအတွက် အရေးကြီးတဲ့ရွေးကောက်ပွဲကျင်းပဖို့ တစ်လအလိုမှာပဲ ကတ်တလန် ဒေသခွဲထွက်ရေးလိုလား သူတွေဟာ ဘာစီလိုနာမြို့မှာ စုဝေးခဲ့ကြပါတယ်။လူသောင်းဂဏန်း လောက်ဟာ ကတ်တလန်ဒေသခွဲထွက်ရေးကို အားပေးတဲ့ နဖူးစီးစာတမ်းတွေနဲ့ ဆိုင်းဘုတ်တွေ ကိုင်ဆောင်ခဲ့ပြီး ဘယ်လ်ဂျီယံနိုင်ငံကိုရောက်ရှိနေတဲ့ ကတ်တလန်ဒေသရဲ့သမ္မတဖြစ်သူ ကားလ်စ် ပူစီမွန်ကို ဒေသရဲ့သမ္မတအဖြစ် ပြန်လည်တာဝန်ထမ်းဆောင်ဖို့ တောင်းဆိုခဲ့ကြပါတယ်။

စပိန်နိုင်ငံ ဖွဲ့စည်းပုံ ဆိုင်ရာခုံရုံးက တရားမ၀င်ဘူးလို့ သတ်မှတ်ထားတဲ့ ဒေသခွဲထွက်ရေး ပြည်သူ့ဆန္ဒခံယူပွဲ ပြုလုပ်ခဲ့တဲ့အတွက် ကားလ်စ်ကို စပိန်ဗဟိုအစိုးရဟာ သမ္မတတာဝန်ကနေ ထုတ်ပယ်ခဲ့တာ ဖြစ်ပါတယ်။ ကားလ်စ်နဲ့ တခြားဝန်ကြီးအဖွဲ့ဝင်ဟောင်း(၄)ဦးကို ဘယ်လ်ဂျီယံနိုင်ငံကနေ စပိန်နိုင်ငံကို ပြန်လည်လွှဲပြောင်းပေးဖို့ စပိန်အစိုးရက တောင်းဆိုထားပါတယ်။

ကားလ်စ်ကတော့ စပိန်အာဏာပိုင် တွေဟာ ဥပဒေရဲ့နောက်ကွယ်မှာနေပြီး မြေပြင်အခြေအနေတွေကို လျစ်လျူရှူထားတယ်လို့ ပြစ်တင်ပြောဆိုထားပါတယ်။ ကတ်တလန်ဒေသအစိုးရအဖွဲ့ရဲ့ အဖွဲ့ဝင်ဟောင်း(၈)ဦးဟာ ခွဲထွက်ရေး ပြည်သူ့ဆန္ဒခံယူပွဲပြုလုပ်ခဲ့တဲ့အတွက် အကျဉ်းကျခံနေရပါတယ်။ ကတ်တလန်ဒေသခွဲ ထွက်ရေး လိုလားတဲ့ ဒေသတွင်းနိုင်ငံရေးပါတီဟာ လာမယ့်ရွေးကောက်ပွဲအတွက် အားကောင်းတဲ့ မိတ်ဖက် တွေမရှိဖြစ်နေပါတယ်။

 

 

Related News