ပြီးခဲ့တဲ့(၇)နှစ်အတွင်းပထမဆုံးအကြိမ်ပြန်ကျင်းပတဲ့ရွေးကောက်ပွဲမှာလက်ရှိဝန်ကြီးချုပ် ပရာ ရွတ် ချန်အိုချာကိုထောက်ခံတဲ့ပါတီကအစောပိုင်းမဲရလဒ်တွေမှာဦးဆောင်နေပါတယ်။တနင်္ဂနွေနေ့ကကျင်းပခဲ့တဲ့ထိုင်းရွေးကောက်ပွဲမှာ ၀န်ကြီးချုပ်ပရာရွတ် ချန်အိုချာကို ၀န်ကြီးချုပ်လောင်းအဖြစ် အမည်စာရင်းတင်သွင်းခဲ့တဲ့ပါတီကဦးဆောင်နေပါတယ်။ ပလန်ပရာချာရတ်(ပြည်သူ့နိုင်ငံတော်စွမ်းအား)ပါတီကမဲ(၇.၅)သန်းကျော်ရထားပြီး ၀န်ကြီးချုပ်ဟောင်းသက်ဆင် ရှင်နာဝပ်ထရာနဲ့အဆက်အစပ်ရှိတဲ့ဖျူထိုင်း(ထိုင်းနိုင်ငံအတွက်)ပါတီက(၇)သန်းကျော်နဲ့ဒုတိယနေရာမှာရှိတယ်လို့ တနင်္ဂနွေနေ့ညပိုင်းကရေတွက်ထားတဲ့အစောပိုင်းမဲရလဒ်တွေကိုကိုးကားပြီးထိုင်းရွေးကောက်ပွဲကော်မရှင်ကကြေညာခဲ့တာပါ။ သူတို့နောက်မှာရှိနေတာကတော့ ဖျူးချားဖော်ဝါ့ဒ်(အနာဂတ်ရှေ့သို့)ပါတီဖြစ်ပြီး မဲ(၅.၂)သန်းရထားပါတယ်။ တရားဝင် မဲရလဒ်တွေကိုမေလ(၉)ရက်မှာကြေညာမယ်လို့သိရပါတယ်။

နိုင်ငံရဲ့သက်တမ်းအရှည်ဆုံးဒီမိုကရက်ပါတီကတော့ ထောက်ခံမဲ (၃.၁)သန်းပဲရခဲ့လို့ ပါတီခေါင်းဆောင် ၀န်ကြီးချုပ်ဟောင်းအဘီဆစ် ဗက်ဂျာဂျီဗာကမဲရုံတွေပိတ်ပြီးတဲ့နောက် ပါတီကနေနုတ် ထွက်ခဲ့ပါတယ်။ အခုရွေးကောက်ပွဲဟာ (၂၀၁၄)ခုနှစ်မှာထိုင်းစစ်တပ်ကအာဏာသိမ်းခဲ့ပြီးတဲ့နောက် ပထမဆုံးရွေးကောက်ပွဲ ဖြစ်ပြီးပါတီ(၈၀)က အမတ်လောင်း(၁၀၀၀၀)ကျော်ပါဝင်ယှဉ်ပြိုင်ခဲ့ပါတယ်။ မဲပေးခွင့်ရှိသူ(၅၁)သန်းကျော်ရှိပြီးအစောပိုင်းမဲရလဒ်တွေအရ (၆၄)ရာခိုင်နှုန်းမဲလာပေးခဲ့တယ်လို့ ထိုင်းရွေးကောက်ပွဲကော်မရှင်ကထုတ်ပြန်ပါတယ်။

 

 

Related News