(၂၀၂၆) ခုနှစ်မှာကျင်းပမယ့် ကမ္ဘာ့ဖလားပြိုင်ပွဲကို မြောက်အမေရိကတိုက်မှ နိုင်ငံတွေဖြစ်တဲ့ အမေရိကန်၊ ကနေဒါနဲ့ မက္ကဆီကို (၃)နိုင်ငံကပူးပေါင်း ကျင်းပခွင့်ရရှိခဲ့တယ် လို့သိရပါတယ်။ ယခုနှစ်(၂၀၁၈)ခုနှစ် ကမ္ဘာ့ဖလားပြိုင်ပွဲကို ရုရှားနိုင်ငံမှာကျင်းပသွားမှာဖြစ်ပြီး၊ (၂၀၂၂)ကမ္ဘာ့ဖလားပြိုင်ပွဲကို အာရှတိုက်မှ ကာတာနိုင်ငံမှာကျင်းပမှာဖြစ်ပါတယ်။ (၂၀၂၆)ခုနှစ် ကမ္ဘာ့ဖလားပြိုင်ပွဲကိုတော့ အမေရိကန်၊ ကနေဒါနဲ့ မက္ကဆီကို (၃)နိုင်ငံကပူးပေါင်းကျင်းပခွင့်ရရှိခဲ့တယ်လို့ ဇွန်လ(၁၃)ရက်မနေ့က၊ ရုရှားနိုင်ငံမှာ ကျင်းပတဲ့ (၆၈)ကြိမ်မြောက် FIFA Congress မှာ အတည်ပြုခဲ့ပါတယ်။  

အမေရိကန်၊ ကနေဒါနဲ့ မက္ကဆီကိုနိုင်ငံတို့ဟာ အာဖရိကတိုက်မှ မော်ရိုကိုနိုင်ငံကိုကျော်ဖြတ်ပြီး ကမ္ဘာ့ဖလားပြိုင်ပွဲကို (၃) နိုင်ငံပူးတွဲအိမ်ရှင်အဖြစ် လက်ခံကျင်းပခွင့်ရရှိခဲ့တာဖြစ်ပါတယ်။ (၂၀၀၂) ခုနှစ်ကမ္ဘာ့ဖလားပြိုင်ပွဲကို ဂျပန်နဲ့ တောင်ကိုရီးယားနိုင်ငံတို့ပူးတွဲကျင်းပခဲ့ပြီးနောက်ပိုင်း နောက်ထပ်တစ်ကြိမ်ပူးတွဲ ကျင်းပခွင့်ရရှိခဲ့တာလည်း ဖြစ်ပါတယ်။တောင်ကိုရီးယားနဲ့ ဂျပန်တို့ဟာ နှစ်နိုင်ငံ တည်းသာပူးပေါင်းကျင်းပခဲ့ပေမယ့် လက်ရှိမှာပြိုင်ပွဲသမိုင်းကြောင်းတစ်လျောက် ပထမဆုံးအကြိမ်(၃) နိုင်ငံပူးတွဲကျင်းပခဲ့တာဖြစ်ပါတယ်။ 

(၂၀၂၆)ကမ္ဘာ့ဖလားပြိုင်ပွဲကို အမေရိကန်၊ မက္ကဆီကိုနဲ့ ကနေဒါနိုင်ငံတို့ပူး ပေါင်း ကျင်းပခွင့်ရခဲ့တာဟာ မက္ကဆီကိုနိုင်ငံအတွက် အိမ်ရှင်အဖြစ်လက်ခံကျင်းပမှု တတိယအကြိမ်မြောက် ဖြစ်ပြီး၊ အမေရိကန်နိုင်ငံအတွက် ဒုတိယအကြိမ်နဲ့ ကနေဒါနိုင်ငံအတွက်ကတော့ ပထမဆုံးအကြိမ်ဖြစ်ပါတယ်။ မက္ကဆီကိုနိုင်ငံဟာ (၁၉၇၀)ကမ္ဘာ့ဖလား ပြိုင်ပွဲနဲ့ (၁၉၈၆)ခုနှစ်ပြိုင်ပွဲတို့ကို အိမ်ရှင်အဖြစ်လက်ခံကျင်းပထားပြီး အမေရိကန်နိုင်ငံက (၁၉၉၄)ခုနှစ်မှာ ကျင်းပခွင့်ရရှိထားတာဖြစ်ပါတယ်။ (၂၀၂၆)ကမ္ဘာ့ဖလားပြိုင်ပွဲကို (၂၀၁၇) ဇန်န၀ါရီလအတွင်းက အတည်ပြုခဲ့တဲ့ FIFA ရဲ့စည်းမျည်းအသစ်နဲ့အတူ အသင်းပေါင်း(၄၈)ကယှဉ်ပြိုင်သွားမှာ ဖြစ်ပါတယ်။

(၂၀၂၆)ကမ္ဘာ့ဖလားပြိုင်ပွဲကို (၃)နိုင်ငံပေါင်း မြို့ကြီး(၁၆)မြို့မှာရှိတဲ့ ကွင်း(၁၆)ကွင်းမှာ ကျင်းပသွားမှာဖြစ်ပြီး အမေရိကန်နိုင်ငံက ကွာတားဖိုင်နယ်၊ ဆီမီးဖိုင်နယ်နဲ့ ဗိုလ်လုပွဲတို့ကို လက်ခံကျင်းပခွင့်ရမယ်လို့ သိရပါတယ်။

 

 

Related News