တွံတေးမြို့နယ်ရှိ ငါးကန်တွေမှာငါးသေဆုံးမှု မြင့်တက်လာတာကြောင့် ငါးမွေးတောင်သူတွေ ငါးရောဂါကုသရေးနဲ့ ဈေးကွက်အတွင်းငါးများရောင်းချရာမှာ အခက်အခဲကြုံတွေ့နေတယ်လို့ သိရပါတယ်။ တွံတေးရှိ ငါးမွေးတောင်သူ အများစုက ကန်ထဲမှာ ငါးသေဆုံးမှုတွေရှိလာရင် လက်လှမ်းမီတဲ့ ဆေးဝါးတွေနဲ့ ကုသတာများပြီးရောဂါကို ဓာတ်ခွဲရှာဖွေကာ စနစ်တကျဆေးကုသမှုအားနည်း နေတယ်လို့ သိရပါတယ်။ ငါးသေဆုံးမှုများလာရင် တခြားငါးကန်တွေ မကူးစက်အောင် သတ်မှတ်ကာလထက်စောပြီး ငါးကန်ဖော်တာတွေကြောင့် မွေးမြူရေးငါးတွေဟာ အလေးချိန်နဲ့ အရည်အသွေးမမီပဲ ဈေးကွက်ထဲတင်သွင်းရောင်းချရတဲ့အတွက် အမြတ်ရရှိမှုနည်းပြီး အရှုံးပေါ် နေတယ်လို့ အုန်းပင်ချောင်းကျေးရွာက ငါးမွေးတောင်သူတစ်ဦးက ပြောပါတယ်။

ငါးရောဂါကို ဓာတ်ခွဲခန်းမှာစစ်ဆေးဖို့သွားလာရာမှာ အချိန်ပေးရတဲ့အတွက်  ငါးမွေးမြူရေးကန် ဧကပေါင်းလေးသောင်းကျော် အဓိကလုပ်ကိုင်နေတဲ့ တွံတေးမြို့နယ်မှာ ငါးအရည်အသွေး စစ်ဆေးရေးဌာန ဖွင့်လှစ်ပေးစေချင်တယ်လို့ တောင်သူတွေကပြောပါတယ်။ ကန်ထဲကငါးတွေ သေဆုံးမှုများလာတာကြောင့် ယခုလက်ရှိသာကေတမြို့နယ်က ငါးအရည်အသွေး စစ်ဆေးရေးဌာနကို လိုအပ်တာတွေပေးပို့စစ်ဆေးထားပြီး ရောဂါကို အဖြေရှာနေဆဲဖြစ်တယ်လို့ ပသီကျေးရွာက ငါးမွေးတောင်သူ တစ်ဦးကပြောပါတယ်။ ငါးမွေးတောင်သူတွေအနေနဲ့ ငါးကျန်းမာရေးဆိုင်ရာ အသိအားနည်းနေသေးတာကြောင့် ငါးဦးစီးဌာနကနေ ကွင်းဆင်းအသိပညာပေးတာတွေလုပ်စေချင်တယ်လို့ သိရပါတယ်။ ၂၀၀၈ ခုနှစ်၊ နာဂစ်မုန်တိုင်း တိုက်ခတ်ပြီးကတည်းက ရာသီဥတုမရွေး တွံတေးမြို့နယ်ရှိ ငါးမွေးမြူရေး ကန်တွေမှာ ငါးသေဆုံးမှုတွေ ဆက်တိုက်ဖြစ်နေတယ်လို့ သိရပါတယ်။

 

 

Related News