ပြည်တွင်း လူငယ်စီးပွားရေးလုပ်ငန်းရှင်တွေ လိုအပ်နေတဲ့ နိုင်ငံတကာ ရင်းနှီးမြှုပ်နှံမှုနဲ့ နည်းပညာပိုင်းဆိုင်ရာ အကူအညီတွေရရှိအောင် နိုဝင်ဘာလ ၉ ရက်က Lotte Hotel  မှာ ပြည်တွင်းပြည်ပ မိတ်ဖက်အဖွဲ့အစည်းပေါင်း (၂၀)နဲ့ မြန်မာနိုင်ငံ လူငယ် စွန့်ဦးတီထွင် လုပ်ငန်းရှင်များအသင်းတို့ နားလည်မှုစာချွှန်လွှာ လက်မှတ်ရေးထိုး ခဲ့တယ်လို့သိရပါတယ်။မြန်မာနိုင်ငံ လူငယ်စွန့်ဦးတီထွင် လုပ်ငန်းရှင်များအသင်းက ကိုယ်ပိုင်စီးပွားရေး လုပ်ကိုင်ဖို့ စိတ်ဝင်စားတဲ့ လူငယ်တွေကို ကူညီထောက်ပံ့ပေးနေတဲ့ အဖွဲ့အစည်း တစ်ခုဖြစ်ပြီး နိုင်ငံတကာ ဈေးကွက်ကို ထိုးဖောက်တဲ့အခါ ငွေကြေးရင်းနှီးမြှုပ်နှံမှုနဲ့ နည်းပညာပိုင်းဆိုင်ရာ ကူညီထောက်ပံ့မှု တွေရရှိနိုင်ရန်  ဒီလိုနားလည်မှုစာချွှန်လွှာ လက်မှတ်ရေးထိုးခဲ့တာ ဖြစ်တယ်လို့သိရပါတယ်။
 
MOU ရေးထိုးတဲ့အပိုင်းမှာ ပြည်ပ ကုန်သည်ကြီးများအသင်း(၆)သင်းနဲ့ လက်မှတ်ရေးထိုးနိုင်ခဲ့ပြီး ပြည်တွင်းမိတ်ဖက် အဖွဲ့အစည်းတွေအပြင် မီဒီယာတွေနဲ့လည်း လက်မှတ်ရေးထိုးခဲ့တယ်လို့ သိရပါတယ်။မြန်မာနိုင်ငံ လူငယ်စွန့်ဦးတီထွင်လုပ်ငန်းရှင်များအသင်းကို ၂၀၁၂ခုနှစ်က စတင်ဖွဲ့စည်းခဲ့ တာဖြစ်ပြီး အသက်(၄၅)နှစ်အောက် လူငယ်စီးပွားရေး လုပ်ငန်းရှင်တွေနဲ့ ကိုယ်ပိုင်စီးပွားရေး လုပ်ကိုင်လိုတဲ့ လူငယ်တွေပါဝင်ဖွဲ့စည်းထားတယ်လို့ သိရပါတယ်။ ရန်ကုန်၊ ပုသိမ်၊ တောင်ကြီးအပြင် ကရင်ပြည်နယ်နဲ့ မွန်ပြည်နယ်တို့မှာလည်း အသင်းခွဲတွေဖွဲ့စည်းထားပြီး အသင်းဝင်ပေါင်း ၁၈၀၀ ကျော်ရှိတယ်လို့သိရပါတယ်။
 
၂၀၁၇ ခုနှစ် အမျိုးသမီးစွန့်ဦးတီထွင် လုပ်ငန်းရှင် အာဆီယံဆုရထားတဲ့ ဒေါ်နန့်စုရွှေစင်ကတော့ ကိုယ်ပိုင်စီးပွားရေးလုပ်ငန်း လုပ်ကိုင် ချင်တဲ့ လူငယ်တွေကိုအသင်းနဲ့ ချိတ်ဆက်ဆောင်ရွက်နိုင်တယ်လို့ ပြောပါတယ်။
ဒီပွဲကို စီးပွားရေးနှင့်ကူးသန်းရောင်းဝယ်ရေး ၀န်ကြီးဌာန ပြည်ထောင်စုဝန်ကြီးနှင့် ရန်ကုန်တိုင်း ဒေသကြီး ၀န်ကြီးချုပ်တို့ တက်ရောက်ခဲ့ပါတယ်။ ၂၀၁၇ စီးပွားရေးဆိုင်ရာ အာဆီယံဆုပေးပွဲကို MYEA  အသင်းက မြန်မာနိုင်ငံကိုယ်စားပြုဝင်ရောက် ယှဉ်ပြိုင်ထားပြီး လူငယ်စီးပွားရေးလုပ်ငန်းရှင် ၉ ယောက် ဆုရရှိခဲ့တယ်လို့ သိရပါတယ်။ 
 
 

Related News