ရန်ကုန်စတော့အိတ်ချိန်းရဲ့ ငါးခုမြောက်စာရင်းဝင်ကုမ္ပဏီအဖြစ် TMH တယ်လီကွန်းအများနှင့် သက်ဆိုင်သော ကုမ္ပဏီက ခွင့်ပြုချက်ရရှိခဲ့ပြီ ဖြစ်ပါတယ်။ဒီဇင်ဘာ(၁)ရက်နေ့က ခွင့်ပြုချက်ရရှိ်ခဲ့တာဖြစ်ပြီး ဒီဇင်ဘာ(၄)ရက်နေ့မှာ ရန်ကုန်စတော့အိတ်ချိန်းက တရားဝင်ကြေငြာ ပေးခဲ့ပါတယ်။ TMH ဆက်သွယ်ရေးအများပိုင်ကုမ္ပဏီဟာ ဆက်သွယ်ရေးလုပ်ငန်းအတွက် အခြေခံ အဆောက် အအုံ ဆောက်လုပ်တာ နဲ့ပြုပြင်ထိန်းသိမ်းတာတွေ၊ Broadband အင်တာနက်လိုင်း ၀န်ဆောင်မှုပေးတာ တွေ ဖုန်းငွေဖြည့်ကဒ် ထုတ်လုပ်ဖြန့်ဖြူး တာတွေ၊ဖိုက်ဘာသွယ်တန်းခြင်း လုပ်ငန်းတွေ လုပ်ဆောင်နေတာ ဖြစ်ပါ တယ်။၂၀၀၇ခုနှစ် သြဂုတ်က (၂၁)ရက်နေ့က တာမိုးညဲချမ်းသာထွန်းဝေသာ အမည်နဲ့စတင် ဖွဲ့စည်းခဲ့ တာ ဖြစ်ပြီး ၂၀၁၆ခုနှစ် နှစ်လယ်မှာ TMH အမည်နဲ့ အများပိုင် ကုမ္ပဏီအဖြစ် စတင်ပြောင်းလဲ ဖွဲ့စည်းခဲ့ တာဖြစ်ပါ တယ်။လက်ရှိမှာ အစုရှယ်ယာပေါင်း (၁၁)သန်းကျော်ရှိနေပြီး အခုနှစ် ဇွန်လအထိစာရင်းများအရ မတည်ရင်းနှီးငွေ (၁၁) ဘီလီယံ ကျော်ရှိထားတယ်လို့ ရန်ကုန်စတော့အိတ်ချိန်းရဲ့ ထုတ်ပြန်မှုအရ သိရပါတယ်။TMH အနေနဲ့ ရန်ကုန်စတော့အိတ်ချိန်းမှာ အများပြည်သူကို ရှယ်ယာသစ်တွေ ထုတ်ရောင်းမယ့် (IPO)စနစ်နဲ့ ၀င်ရောက် တာဖြစ်ပါတယ်။ ဒါပေမယ့် Road Show ပြုလုပ်တာတွေ၊ အများပြည်သူကို ရှယ်ယာသစ်ကမ်းလှမ်း ရောင်းချတာတွေနဲ့ ရှယ်ယာတွေကို ရန်ကုန်စတော့အိတ်ချိန်းမှာ စာရင်းသွင်းရမယ့် လုပ်ငန်းစဉ်တွေ၊အဖွင့်ဈေးသတ်မှတ်တာတွေ လုပ်ဆောင်ရဦးမယ် လို့သိရ ပါတယ်။ပြီးမှသာ ရှယ်ယာစတင်ရောင်းချမယ့်ရက်ကို သတ်မှတ်ကြေငြာပေးမှာဖြစ်ပါတယ်။

 

Related News