ပြည်တွင်းက ကုန်ပစ္စည်းတွေအပြင်  နိုင်ငံတကာကကုန်ပစ္စည်းတွေလာရောက် ရောင်းချ၊ ၀ယ်ယူနိုင်မယ့် နိုင်ငံတကာကုန်ပစ်္စည်းပြပွဲတွေပြုလုပ်သွားမယ်လို့ ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက ပြောကြားပါတယ်။ နိုင်ငံရဲ့စီးပွားရေးကဏ္ဍကို အထောက်အကူပြုနိုင်ဖို့အပါအ၀င် ခရီးသွားကဏ္ဍနယ်ပယ်တွေကိုလည်း ပြန်လည်ဖွံ့ဖြိုးတိုးတက်လာနိုင်ဖို့ ရန်ကုန်မှာနိုင်ငံတကာပြပွဲတွေ ပြုလုပ်သွားမှာဖြစ်ပါတယ်။

ဒီအတွက်ရန်ကုန်တိုင်းဒေသကြီးအစိုးရအဖွဲ့အနေနဲ့ ပြည်ထောင်စုဝန်ကြီးဌာန အသီးသီးနဲ့ ဆွေးနွေးနေပြီး တစ်နှစ်အတွင်းလုပ်ဆောင်နိုင်အောင် ကြိုးစားနေတယ်လို့ ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက ပြောပါတယ်။ ကျောက်မြက်ရတနာတွေ၊ ပရိဘောဂစတဲ့ ကုန်ပစ်္စည်းတွေကို ပြသမှာဖြစ်ပြီး ကမ္ဘာမှာ ရန်ကုန်ဈေးကွက်အဖြစ်ရှိအောင် လုပ်ဆောင်သွားမယ်လို့လည်း ပြောပါတယ်။

ဒီပြပွဲမျိုးဖြစ်ခဲ့ရင် စားသောက်ဆိုင်တွေ၊ ဟိုတယ်တွေအပါအ၀င် ခရီးသွားလုပ်ငန်းတွေပါ တိုးတက်လာမှာ ဖြစ်တယ်လို့ ဆိုပါတယ်။ဒီနိုင်ငံတကာပြပွဲတွေကျင်းပနိုင်ဖို့ ခန်းမတွေကိုလည်း နိုင်ငံတကာအဆင့်မီ ခန်းမတွေအဖြစ် ပြင်ဆင်တည်ဆောက် သွားမယ်လို့ ပြောပါတယ်။ ခန်းမအသစ်တွေကို  တိုးချဲ့ဆောက်လုပ်မှာဖြစ်ပြီး ဒီအတွက် အစိုးရနဲ့ ပုဂ်္ဂလိလုပ်ငန်းရှင်တွေ ပူးပေါင်းပြီး လုပ်ဆောင်မယ်လို့လည်း ပြောပါတယ်။

နိုင်ငံတကာပြပွဲတွေကိုတော့ ၂၀၁၈အကုန်နဲ့ ၂၀၁၉ခုနှစ်မှာစတင်ကျင်းပနိုင်ဖို့ အမြန်လုပ်ဆောင် သွားမယ်လို့ သိရပါတယ်။ ရခိုင်အရေးကိစ်္စကြောင့် နိုင်ငံ့စီးပွားရေးကို အထိုက်အလျောက် ရိုက်ခတ်မှုရှိခဲ့ပြီး  နိုင်ငံ့ခရီးသွားကဏ္ဍကျဆင်းသွားခဲ့တယ်လို့ ၀န်ကြီးချုပ်ဦးဖြိုးမင်းသိန်းက ပြောကြားခဲ့ပါတယ်။ ဒါ့ကြောင့် ခရီးသွားကဏ္ဍနယ်ပယ်တွေကို ပြန်လည်ဖွံ့ဖြိုးတိုးတက်လာအောင်  ဒီလိုပြပွဲတွေနဲ့ လုပ်ဆောင်မှာဖြစ်သလို  စီးပွားရေးကဏ္ဍ ဖွံ့ဖြိုးတိုးတက်ဖို့ အထောက်အကူပြုနိုင်တယ်လို့လည်း ပြောကြားခဲ့ပါတယ်။ 

 

 

Related News