မြန်မာနိုင်ငံစားသောက်ဆိုင်လုပ်ငန်းရှင်များအသင်း(ရန်ကုန်) ပြန်လည်ဖွဲ့စည်းခြင်းကို သြဂုတ်လ (၄)ရက်က ရန်ကုန်မြို့ရှိ Dolphin စားသောက်ဆိုင်မှာ ပြုလုပ်ခဲ့ပါတယ်။
မြန်မာနိုင်ငံစားသောက်ဆိုင် လုပ်ငန်းရှင်များအသင်းမှာ အသင်းခွဲ (၁၂)သင်းရှိတဲ့အနက် ရန်ကုန်အသင်းဟာ အသင်းလှုပ်ရှားမှု နည်းတာကြောင့်နဲ့ ရန်ကုန်တိုင်းဒေသကြီးတွင်း စားသောက်ဆိုင်များပိုမိုတိုးတက်လာအောင် လုပ်ဆောင်နိုင်ဖို့ ပြန်လည်ဖွဲ့စည်းခဲ့တာလို့ သိရပါတယ်။

မြန်မာနိုင်ငံစားသောက်ဆိုင်လုပ်ငန်းရှင်များအသင်း(ရန်ကုန်)က စားသောက်ဆိုင်လုပ်ငန်းများနိုင်ငံတကာအဆင့်မီ တိုးတက်စေဖို့၊ စားသောက်ဆိုင်ဝန်ဆောင်မှု အရည်အသွေးမြင့်မားစေဖို့၊ မြန်မာ့အစားအသောက်များကို ကမ္ဘာသိအောင် ဖော်ထုတ်သွားဖို့ လုပ်ဆောင်သွားမယ်လို့ သိရပါတယ်။ ဒါ့အပြင် စားသောက်ဆိုင်များအချင်းချင်း အကြံဥာဏ်များ ဖလှယ်တာတွေ ၊အတွေ့အကြုံများ မျှဝေတာတွေ၊ စားသောက်ဆိုင်များကြုံတွေ့နေရတဲ့ အခက်အခဲတွေကို ပူးပေါင်းဆောင်ရွက်တာတွေကို  လုပ်ဆောင်သွားမယ်လို့ သိရပါတယ်။

 လက်ရှိ ပြည်တွင်းစားသောက်ဆိုင်တွေမှာ စီမံခန့်ခွဲမှုအပိုင်းအားနည်းမှု၊ Marketing Plan အားနည်းမှု၊ အလုပ်သမားရှားပါးမှု၊ လုပ်ငန်းကျွမ်းကျင်မှုအပိုင်း အားနည်းတာတွေကြုံတွေ့နေရတယ်လို့ သိရပါတယ်။ အသင်းအနေနဲ့ ပြည်တွင်းမှာ မရှိသေးတဲ့ စားသောက်ဆိုင်လုပ်ငန်းနဲ့ ပတ်သက်တဲ့ သင်တန်းကျောင်းကို ဖွင့်လှစ်နိုင်ဖို့ စီစဉ်သွားမယ်လို့ သိရပါတယ်။ မြန်မာနိုင်ငံစားသောက်ဆိုင်လုပ်ငန်းရှင်များအသင်း (ရန်ကုန်)အနေနဲ့ စားသောက်ဆိုင်လုပ်ငန်းတွေကို နိုင်ငံတကာက လာရောက်ပြီး သင်တန်းပေးတာတွေ၊ နိုင်ငံတကာကို သွားရောက်ပြီး လေ့လာနိုင်ဖို့ အခွင့်အရေးတွေအတွက် လုပ်ဆောင်သွားမယ်လို့ သိရပါတယ်။မြန်မာနိုင်ငံစားသောက်ဆိုင်လုပ်ငန်းရှင်များအသင်း(ရန်ကုန်)မှာအဖွဲ့ဝင်(၂၀၀)ကျော်ရှိပြီး မြန်မာနိုင်ငံစားသောက်ဆိုင် လုပ်ငန်းရှင်များအသင်း(ဗဟို)မှာတော့အဖွဲ့ဝင် (၆၀၀)ခန့်ရှိတယ်လို့ သိရပါတယ်။ 

 

 

 

Related News