နိုင်ငံတော်သမ္မတထံမှ ပေးပို့ထားတဲ့ ပြည်ထောင်စုဝန်ကြီးဌာနအသစ်တစ်ခုအဖြစ် ရင်းနှီးမြှုပ်နှံမှုနှင့် နိုင်ငံခြား စီးပွားဆက်သွယ်ရေးဝန်ကြီးဌာန ကို တိုးချဲ့ဖွဲ့စည်းရေးအတွက် ပြည်ထောင်စုလွှတ်တော်ကို လာရောက်ရှင်းလင်း တင်ပြခဲ့တယ်လို့ သိရပါတယ်။ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနကို ဖွဲ့စည်းရတာက နိုင်ငံစီးပွားရေးဖွံ့ဖြိုးတိုးတက်ရေး၊ ကုလသမဂ္ဂအဖွဲ့အစည်းများ၊ နိုင်ငံတကာအဖွဲ့အစည်းများကပေးအပ်တဲ့ အကူအညီတွေကို နိုင်ငံတော်ရဲ့ မူဝါဒတွေ၊ စည်းမျဉ်းစည်ကမ်းတွေနဲ့အညီဆောင်ရွက် နိုင်ရေးအတွက်ဖြစ်ပါတယ်။

ဒါအပြင် နိုင်ငံတကာ အဖွဲ့အစည်းတွေနဲ့ ပိုမိုထိရောက်စွာ ပူးပေါင်းဆောင်ရွက်မှုတွေတိုးမြှင့်ဖိုနဲ့ နိုင်ငံအတွင်း ရင်းနှီးမြှုပ်နှံမှု လုပ်ငန်းများ ပိုမိုထိရောက်စွာ လုပ်ဆောင်နိုင်ရေးဆောင်ရွက်ဖို့လည်းပါဝင်တယ်လို့ ပြည်ထောင်စု လွှတ်တော်ကို နိုင်ငံတော်သမ္မတကပေးပို့တဲ့ သ၀ဏ်လွှာအရ သိရပါတယ်။ နိုင်ငံတော်သမ္မတကပေးပို့တဲ့ သ၀ဏ်လွှာကို ပြည်ထောင်စုလွှတ်တော် နာယက ဦးတီခွန်မြတ်က ဖတ်ကြားခဲ့ပါတယ်။ ပြည်ထောင်စုဝန်ကြီးဌာနတစ်ခုတိုးချဲ့ဖွဲ့စည်းခြင်းနဲ့ပတ်သက်ပြီး နိုဝင်ဘာလ ၈ ရက်က ပြည်ထောင်စုလွှတ်တော်ကို နိုင်ငံတော်သမ္မတထံမှ သ၀ဏ်လွှာပေးပို့ခဲ့တာပါ။

ပြည်ထောင်စုဝန်ကြီးဌာနတစ်ခု တိုးချဲ့ဖွဲ့စည်းခြင်းနဲ့ပတ်သက်ပြီး နိုင်ငံတော်သမ္မတကိုယ်စား တာဝန်ပေးအပ်သည့်  ပြည်ထောင်စု အဆင့်အဖွဲ့အစည်းဝင်ဖြစ်တဲ့ ပြည်ထောင်စုရှေ့နေချုပ် ဦးထွန်းထွန်းဦးက နိုဝင်ဘာလ ၁၂ရက် ကပြုလုပ်ခဲ့တဲ့ ဒုတိယအကြိမ် ပြည်ထောင်စုလွှတ်တော် ဒသမပုံမှန်အစည်းအဝေးမှာ ရှင်းလင်း တင်ပြခဲ့ပါတယ်။ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနဟာ ယခုအစိုးရ လက်ထက်မှာ ၂၅ခုမြောက် ၀န်ကြီးဌာန ဖြစ်လာမှာ ဖြစ်ပြီး ယခုအစိုးရ လက်ထပ်အသစ်ဖွဲ့စည်းတဲ့ ၅ခုမြောက်ဝန်ကြီးဌာနဖြစ်လာမှာဖြစ်ပါတယ်။

ယခင်က တိုင်းရင်းသားလူမျိုးများ ရေးရာဝန်ကြီးဌာန၊ နိုင်ငံတော်အတိုင်ပင်ခံရုံးဝန်ကြီးဌာန၊ အပြည်ပြည်ဆိုင်ရာ ပူးပေါင်းဆောင်ရွက်ရေး ၀န်ကြီးဌာနနဲ့ ပြည်ထောင်စုအစိုးရအဖွဲ့ရုံးဝန်ကြီးဌာန တို့ကို ၀န်ကြီးဌာန အသစ်တွေ အဖြစ် ဖွဲ့စည်းခဲ့တယ်လို့ သိရပါတယ်။ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနကို တိုးချဲ့ဖွဲ့စည်းရေးနဲ့ ပတ်သက်ပြီး ဆွေးနွေးခြင်းတွေကို လာမည့် နိုဝင်ဘာလ ၁၅ ရက်မှာ ကျင်းပမဲ့ ပြည်ထောင်စုလွှတ်တော်အစည်းအဝေးမှာ ပြုလုပ်သွားမယ်လို့ သိရပါတယ်။ အထက်ပါအကြောင်း အရာကို ဆွေးနွေးလိုတဲ့ လွှတ်တော် ကိုယ်စားလှယ်တွေအနေနဲ့ နိုဝင်ဘာလ၁၄ရက်နောက်ဆုံးထားပြီးအမည်စာရင်းပေးပို့ကြဖို့ တောင်းခံထားတယ်လို့သိရပါ တယ်။

 

 

 

 

 

Related News