ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန တိုးချဲ့ဖွဲ့စည်းရေးအတွက် ပြည်ထောင်စုလွှတ်တော်ရဲ့ အဆုံးအဖြတ် ရယူခြင်းများကိုလာမယ့် နိုဝင်ဘာလ(၁၉)ရက်မှာ ပြုလုပ်သွားမယ်လို့သိရပါတယ်။ နိုင်ငံတော်သမ္မတထံမှ ပေးပို့ထားတဲ့ ရင်းနှီးမြှုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီးဌာနကို ပြည်ထောင်စုဝန်ကြီးဌာနတစ်ခုအဖြစ် တိုးချဲ့ဖွဲ့စည်းရေးကိစ္စနဲ့ ပတ်သက်ပြီး နိုဝင်ဘာလ(၁၅)ရက်က ပြုလုပ်ခဲ့တဲ့ ဒုတိယအကြိမ်ပြည်ထောင်စုလွှတ်တော် ဒသမပုံမှန် အစည်းအဝေးမှာ လွှတ်တော်ကိုယ်စားလှယ်(၉)ဦးက ဆွေးနွေးခဲ့ကြပါတယ်။

လွှတ်တော်ကိုယ်စားလှယ်တွေ ဆွေးနွေးမှု ပြုလုပ်ပြီးနောက် သက်ဆိုင်ရာ ပြည်ထောင်စုအဆင့် အဖွဲ့အစည်းဝင်က ပြန်လည်ရှင်းလင်း ဆွေးနွေးခြင်းနဲ့ ပြည်ထောင်စုလွှတ်တော်ရဲ့ အဆုံးအဖြတ်ရယူခြင်းတွေကိုနိုဝင်ဘာလ၁၉ရက်မှာ ပြုလုပ်မယ့် ပြည်ထောင်စု လွှတ်တော်အစည်းအဝေးမှာလုပ်ဆောင်သွားမှာပါ။ ဆွေးနွေးခဲ့တဲ့ လွှတ်တော်ကိုယ်စားလှယ်(၉)ဦးထဲမှာ တစ်ဦးအပါအ၀င်ဖြစ်တဲ့ အုတ်တွင်းမဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဒေါ်ချိုချိုက ယနေ့ခတ်စီးပွားရေးဟာ နိုင်ငံရေးနဲ့ခွဲခြားမရတော့ပဲ စီးပွားရေးတိုးတက်မှသာ လူမှုရေးလိုအပ်ချက်တွေဖြည့်ဆည်းနိုင်ပြီး နိုင်ငံအတွင်းငြိမ်းချမ်းရေး၊ တည်ငြိမ်ရေးတို့ရရှိနိုင်မှာဖြစ်တာကြောင့် ရေရှည်စီးပွားရေးဖွံ့ဖြိုးတိုးတက်မှုကိုအထောက်အကူပြုစေမယ့် ရင်းနှီးမြှုပ်နှံမှုတွေကိုဆွဲဆောင်ဖို့ လိုအပ်တာကြောင့် ယခုဝန်ကြီးဌာနကို လိုအပ်တယ်လို့ ပြောပါတယ်။ 

ဒါ့အပြင် ရန်ကုန်တိုင်းဒေသကြီး မဲဆန္ဒနယ်အမှတ်(၄)မှ အမျိုးသားလွှတ်တော်ကိုယ်စားလှယ် ဦးသန်းစိုး(ခေါ်) သန်းစိုး(ဘောဂဗေဒ)က ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ၀န်ကြီးဌာနအနေနဲ့ ဆက်စပ်ဝန်ကြီးဌာနတွေနဲ့ ပေါင်းစပ်ပြီး လုပ်ဆောင်လျှင် ရင်းနှီးမြှုပ်နှံမှုအခွင့်အလမ်းတွေ ရရှိလာမှာဖြစ်တဲ့အတွက် အဆိုပါဝန်ကြီးဌာနကို လိုအပ်တယ်လို့ပြောပါတယ်။ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနတိုးချဲ့ခြင်းကို ပြည်ထောင်စုလွှတ်တော်က သဘောတူအတည်ပြုပါက ယခုအစိုးရလက်ထက်တွင် ၂၅ခုမြောက် ၀န်ကြီးဌာန ဖြစ်လာမယ်လို့သိရပါတယ်။

ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ၀န်ကြီးဌာနအနေနဲ့ ယခုအစိုးရလက်ထက်အသစ်ဖွဲ့စည်းတဲ့(၅)ခုမြောက် ၀န်ကြီးဌာနဖြစ်လာမှာဖြစ်ပြီး ယခင်က တိုင်းရင်းသား လူမျိုးများရေးရာဝန်ကြီးဌာန၊ နိုင်ငံတော်အတိုင်ပင်ခံရုံးဝန်ကြီးဌာန၊ အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာနနဲ့ ပြည်ထောင်စုအစိုးရအဖွဲ့ရုံးဝန်ကြီးဌာနတို့ကို ၀န်ကြီးဌာနအသစ်တွေအဖြစ် ဖွဲ့စည်းခဲ့ပါတယ်။

 

 

 

Related News