အောက်တိုဘာ(၁)ရက်နေ့ကစတင်တဲ့၂၀၁၈-၂၀၁၉ ဘဏ္ဍာရေးနှစ်အတွက် လက်ရှိတစ်လခွဲကာလအတွင်း နိုင်ငံခြားရင်းနှီးမြှုပ်နှံမှု အမေရိကန်ဒေါ်လာ သန်း(၅၀၀)ကျော်ဝင်ရောက်ထားတယ်လို့ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာနထံကသိရပါတယ်။ ဒီကာလအတွင်း နိုင်ငံခြားရင်းနှီးမြှုပ်နှံမှုလုပ်ငန်းအသစ်(၃၃)ခုကိုခွင့်ပြု/အတည်ပြုပေးခဲ့ပြီး ရင်းနှီးမြှုပ်နှံမှုက အမေရိကန်ဒေါ်လာ (၃၈၈)သန်းကျော်ဖြစ်ပါတယ်။

ဒီလုပ်ငန်းတွေကနေပြည်တွင်းမှာ အလုပ်အကိုင်အသစ် တစ်သောင်းခွဲနီးပါးရရှိမှာဖြစ်တယ်လို့သိရပါတယ်။ဒါ့အပြင် ဒီကာလအတွင်း ပြည်တွင်းကရှိပြီးသားနိုင်ငံခြားရင်းနှီးမြှုပ်နှံမှုလုပ်ငန်းတွေရဲ့ ရင်းနှီးမြှုပ်နှံမှုတိုးမြှင့်တာက အမေရိကန်ဒေါ်လာ သန်း(၇၀)ကျော်ရှိခဲ့ပြီး အထူးစီးပွားရေးဇုန် ဥပဒေအရ ပြည်တွင်း အထူးစီးပွားရေးဇုန်တွေကို ၀င်ရောက်တဲ့ နိုင်ငံခြားရင်းနှီးမြှုပ်နှံမှုက အမေရိကန်ဒေါ်လာ(၄၃)သန်းကျော် ရှိခဲ့ပါတယ်။

ဒါကြောင့် ၂၀၁၈-၂၀၁၉ ဘဏ္ဍာနှစ်အတွက် နိုဝင်ဘာ(၁၆)ရက်အထိ စုစုပေါင်းနိုင်ငံခြားရင်းနှီးမြှုပ်နှံမှုက အမေရိကန်ဒေါ်လာ(၅၀၆.၈၆)သန်းဖြစ်ပါတယ်။စင်္ကာပူနိုင်ငံက အများဆုံးရင်းနှီးမြှုပ်နှံထားတာဖြစ်ပြီး ဒုတိယကတော့တရုတ်နိုင်ငံဖြစ်ပါတယ်။ လက်ရှိဘဏ္ဍာနှစ်အတွင်း  မြန်မာနိုင်ငံသားလုပ်ငန်းတွေရဲ့ ရင်းနှီးမြှုပ်နှံမှုကလည်း ကျပ်(၂၄၁)ဘီလီယံ ကျော်ရှိ နေပါတယ်။

အခုတစ်လခွဲအတွင်း မြန်မာနိုင်ငံသား ရင်းနှီးမြှုပ်နှံမှုလုပ်ငန်း(၂၉)ခု ကို ထပ်မံခွင့်ပြုခဲ့တာဖြစ်ပါ တယ်။နောက်ဆုံးခွင့်ပြုလုပ်ထားတဲ့မြန်မာနိုင်ငံရင်းနှီးမြှုပ်နှံမှုကော်မရှင်အစည်းအဝေးမှာတော့ လုပ်ငန်း(၆)ခုကို ခွင့်ပြု/ အတည်ပြုပေးခဲ့ပြီး ရန်ကုန်က (၂)ခု ၊ကချင်က (၂)ခု ၊စစ်ကိုင်းက(၁)ခုပါဝင်ပါတယ်။ စက်မှုကဏ္ဍက (၅)နဲ့ အခြားကဏ္ဍက (၁)ခုပါဝင်ပြီး ဒီလုပ်ငန်းတွေကနေ အလုပ်အကိုင် အခွင့်အလမ်း(၁၂၀၀)နီးပါးရရှိနိုင်မယ်လို့လည်း ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာနက ထုတ်ပြန်ပါတယ်။

 ပြီးခဲ့တဲ့ ၂၀၁၈ခုနှစ် ဧပြီလကနေ စက်တင်ဘာလအကုန်ထိ ဘဏ္ဍာရေးနှစ်အပြောင်းအလဲ ကြားကာလ (၆)လမှာတော့နိုင်ငံခြားရင်းနှီးမြှုပ်နှံမှုအမေရိကန်ဒေါ်လာ(၂)ဘီလီယံနီးပါးဝင်ရောက်ထားပါတယ်။အခုဘဏ္ဍာနှစ်မှာတော့ နိုင်ငံခြားရင်းနှီးမြှုပ်နှံမှုအမေရိကန်ဒေါ်လာ (၅.၈)ဘီလီယံ ၀င်ရောက်ဖို့လျာထားတာဖြစ်ပါတယ်။

 

 

 

Related News