စက္ကူဝါးယပ်တောင်တွေကိုလက်မှုလုပ်ငန်းအဖြစ်လုပ်ကိုင်ကြပြီးလက်ရှိမှာ မြန်မာနိုင်ငံအနှံတင်ပို့ နေကာဈေးကွက် ကောင်းလည်း ရရှိနေတယ်လို့ သိရပါတယ်။ မန္တလေးတိုင်းဒေသကြီး၊ပုသိမ်ကြီးမြို့နယ်ထဲကရေကြည်စံပြကျေးရွာမှာစက္ကူဝါးယပ်တောင်လုပ်ငန်းကိုတစ်ရွာ လုံးနီးပါးလက်မှုလုပ်ငန်းအဖြစ်လုပ်ကိုင်ကြပါတယ်။ဈေးကွက်ဖြန့်လုပ်ကိုင်တဲ့လုပ်ငန်း(၃)ခုခန့်ရှိပြီးကျန်တဲ့သူတွေကတော့တစ်နိုင်တစ်ပိုင်လုပ်ကိုင်ကြတာပါ။ဒီရွာမှာစက္ကူဝါးယပ်တောင်လုပ်ငန်းလုပ်ကိုင်နေကြတာနှစ်ပေါင်း(၃၀)ကျော်ရှိ ပြီလို့သိရပါတယ်။စက္ကူဝါးယပ်တောင်တွေကိုအခုအချိန်ထိအသုံးပြုနေတဲ့ဈေးကွက်ရှိတာကြောင့်သူတို့လုပ်ငန်း တွေရပ်တည်နေနိုင်ကြတာပါ။

စက္ကူဝါးယပ်တောင်တွေကအခြားယပ်တောင်တွေထက်စာရင်ဈေးထက်ဝက်နီးပါးသက်သာပါတယ်။သူတို့ရဲ့ဖောက်သည်တွေကဟာပုံနှိပ်တိုက်တွေအများဆုံးဖြစ်ပါတယ်။ရေကြည်ရွာကစက္ကူဝါးယပ်တောင်တွေကိုမြန်မာနိုင်ငံအထက်ပိုင်း၊အလယ်ပိုင်းနဲ့အောက်ပိုင်းမြို့တွေကိုရေလမ်းကုန်းလမ်းနဲ့တင်ပို့နေရတယ်လို့သိရပါတယ်။သီတင်းကျွတ်လနဲ့တန်ဆောင်မုန်းလတွေကတော့အလုပ်များတဲ့လတွေဖြစ်တယ်လို့ဆိုပါတယ်။စက္ကူဝါးယပ်တောင်တစ်ချောင်းဖြစ်ဖို့ကအဆင့်ဆင့်လုပ်ရမှာပါ။ကုန်ကြမ်းအတွက်ဝါးရှင်တွေဆီကမျှင်ဝါးကိုဝယ်ယူရပါတယ်။ဝါးခုတ်သားတွေကိုပိုင်းဖြတ်လိုက်တဲ့ဝါးခြမ်းငယ်အကြမ်းထည်တွေကိုအရင်ဆုံးအစိတ်ငယ်တွေဖြာကာအပေါက်ဖောက်ရပါတယ်။နောက်တဆင့်ကပုံစံဖော်သစ်ပြားပေါ်မှာနေရာချကာယပ်တောင်ပုံစံရဖို့ကြိုးနဲ့ ချည်ပြီးဖြန့်ရမှာပါ။

အဲ့ဒီနောက်မှရလာတဲ့ယပ်တောင်အကြမ်းထည်တွေကိုအစည်းလိုက်ထပ်ပြီးဖောက်သည်တွေဆီပို့ရပါတယ်။ဝါးယပ်တောင်အကြမ်းထည်တွေကိုပုံနှိပ်တိုက်တွေမှာအပ်ကြတဲ့အလှူမင်္ဂလာဖိတ်စက္ကူကိုကော်နဲ့ကပ် ပြီးမလိုအပ်တဲ့အပိုင်းကိုညှပ်ထုပ်ကာအနားသပ်နေလှန်းပြီးမှစက္ကူဝါးယပ်တောင်တစ်ချောင်းရရှိတယ်လို့သိရပါတယ်။လက်ရှိမှာတော့ကုန်ကြမ်းနဲ့လုပ်သားရှားပါးတာကစက္ကူဝါးယပ်တောင်လုပ်ငန်းတွေရဲ့အခက်အခဲဖြစ်တယ်လို့ဆိုပါတယ်။စက္ကူဝါးယပ်တောင်တွေကိုခေတ်ကာလအရဒီဇိုင်းဆန်းသစ်ဖို့နဲ့ပိုပြီးမြန်ဆန်အောင်စက်ကိုအသုံးပြုလုပ်လို့ရနိုင်ပေမယ့်လက်မှုအဖြစ်တစ်ရွာလုံးကမှီခိုလုပ်ကိုင်နေကြတာကြောင့်အဆင့်မြှင့်ပြီးလုပ်ကိုင်ကြဖို့မရှိကြဘူးလို့စက္ကူဝါးယပ်တောင်လုပ်ငန်းလုပ်ကိုင်သူဦးအောင်ဆန်းကပြောပါတယ်။ယခင်ကစက္ကူဝါးယပ်တောင်လုပ်ငန်းတွေကိုမုံရွာဘက်မှာလုပ်ကိုင်ကြပေမယ့်လက်ရှိတစ်နိုင်ငံလုံးနီးပါးကိုတင်ပို့နေတဲ့စက္ကူဝါးယပ်တောင်တွေကိုရေကြည်ရွာတစ်ခုကသာ တွင်တွင်ကျယ်ကျယ်လုပ်ကိုင်နေကြတာဖြစ်တယ်လို့သိရပါတယ်။

 

 

Related News