စားသုံးရန်မသင့်ဟုဆိုကာ မြန်မာ့ဆန်တွေကို ဖျက်ဆီးခဲ့တဲ့ အိုင်ဗရီကို့စ်နိုင်ငံက ဖြစ်စဉ်ကြောင့် မြန်မာ့ ဆန်ပြည်ပတင်ပို့မှုအပေါ် မထိခိုက်သလို မြန်မာ့ဆန်အရည်အသွေးအပေါ်မှာလည်း စိုးရိမ်စိတ်မ၀င်ကြဖို့ မြန်မာနိုင်ငံဆန်စပါးအသင်းချုပ်တာဝန်ရှိသူတွေက ပြောပါတယ်။မြန်မာ့ ဆန်တန်ချိန်(၁၈၀၀၀) ကို အရည်အသွေးမပြည့်မီဟုဆိုကာ အိုင်ဗရီကို့စ်နိုင်ငံက ဖျက်ဆီးခဲ့ပေမယ့် ဒီဖြစ်စဉ်ကြောင့် မြန်မာ့ဆန်အတွက် ပြည်ပဈေးကွက်နဲ့ပတ်သက်ပြီး ထိခိုက်မှုမရှိဘူးလို့  မြန်မာနိုင်ငံဆန်စပါးအသင်းချုပ်တာဝန်ရှိသူတွေကပြောပါတယ်။ဒါဟာအချိန်ကြာမြင့်စွာသိုလှောင်မှုနဲ့ ၀ယ်လက်ရဲ့စီမံခန့်ခွဲမှုအားနည်းချက်ကြောင့်ဖြစ်တာဖြစ်ပြီး ပြည်ပဆန်ဝယ်ယူသူတွေအနေနဲ့ ဒီကိစ္စအပေါ်နားလည်ကြောင်းအသင်းချုပ် တာဝန်ရှိသူကပြောပါတယ်။အခုဖြစ်စဉ်ကြောင့် ပြည်ပဆန်တင်ပို့မှုကိုမထိခိုက်ပဲ ဧပြီလ(၁)ရက်ကနေ (၁၉)ရက်အထိ အာဖရိကနိုင်ငံတွေကို ဆန်တန်ချိန်(၂၈၀၀၀)နီးပါး ၊အာရှနိုင်ငံတွေကို ဆန်တန်ချိန် (၁၀၀၀)ကျော်နဲ့ ဥရောပ နိုင်ငံတွေကို ဆန်နဲ့ ဆန်ကွဲတန်ချိန် (၃၅၀၀၀)နီးပါး တင်ပို့ထားနိုင်ဆဲဖြစ်တယ်လို့ စီးပွားရေး နှင့်ကူးသန်းရောင်းဝယ်ရေးဝန်ကြီးဌာနက ထုတ်ပြန်ပါတယ်။

အခုဖြစ်စဉ်ကြောင့် ပြည်တွင်းမှာ ဆန်စပါးစိုက်ပျိုးသူတွေနဲ့စားသုံးသူတွေကြား စိုးရိမ်မှုတွေရှိခဲ့ပြီး အထူးသဖြင့် ဒီဖျက်ဆီးခံခဲ့ရတဲ့ (၂၅)မတ် ဆန်နဲ့ဈေးကွက်အပေါ်သက်ရောက်မှုရှိခဲ့ပါတယ်။နှစ်စဉ်ထွက်ရှိတဲ့ မြန်မာ့ဆန်ရဲ့ (၈၀)ရာခိုင်နှုန်းက ပြည်တွင်းမှာ စားသုံးတာဖြစ်တာကြောင့် ပြည်တွင်းစားသုံးသူတွေအနေနဲ့မစိုးရိမ် ကြဖို့နဲ့ဓာတုဓာတ်ကြွင်းမပါတာကြောင့် မြန်မာ့ဆန်အရည်အသွေးနဲ့ပတ်သက်ပြီး အာမခံကြောင်းမြန်မာနိုင်ငံဆန်စပါးအသင်းချုပ်တာဝန်ရှိသူကပြောပါတယ်။မြန်မာနိုင်ငံအနေနဲ့ လက်ရှိ (၂၀၁၈-၂၀၁၉)ဘဏ္ဍာနှစ်မှာ ပြည်ပကိုဆန်တင်ပို့မှုအနေနဲ့ ကုမ္ပဏီ(၇၀)က ပင်လယ်ရေကြောင်းကနေ အမေရိကန်ဒေါ်လာ (၂၈၈)သန်း တန်ဖိုးရှိတဲ့ ဆန်တန်ချိန်(၈.၅)သိန်း၊ နဲ့ ကုမ္ပဏီ(၁၀၃)ခုက နယ်စပ်ကနေ အမေရိကန်ဒေါ်လာသန်း(၃၅၀) ကျော်တန်ဖိုးရှိတဲ့ ဆန်တန်ချိန်(၁)သန်းကျော် တင်ပို့ထားတယ်လို့သိရပါတယ်။

 

 

Related News