မြန်မာ့စီးပွားရေးအခြေအနေဟာ ကာလလတ်အပိုင်းအခြားဖြစ်တဲ့ အခုနှစ်နဲ့လာမယ့်နှစ်တွေမှာ အနည်းငယ် ပြန်တိုးတက်လာမယ်လို့ ကမ္ဘာ့ဘဏ်အုပ်စုကခန့်မှန်းလိုက်ပါတယ်။ကမ္ဘာ့ဘဏ်ကပြုစုထားတဲ့အချက်အလက်တွေအရ မြန်မာ့စီပွားရေးတိုးတက်မှုနှုန်းဟာ(၂၀၁၇)ခုနှစ် မှာ(၆.၈)ရာခိုင်နှုန်းရှိခဲ့ပေမယ့်(၂၀၁၈)ခုနှစ်မှာတော့ (၆.၂) ရာခိုင်နှုန်းကို ကျဆင်းခဲ့ပါတယ်။ဒါပေမယ့် ကမ္ဘာ့ဘဏ်ကတော့အခု (၂၀၁၉)မှာ မြန်မာ့စီးပွားရေးတိုးတက်မှု (GDP)နှုန်းဟာ (၆.၅)ရာခိုင်နှုန်းကိုပြန်တက်လာနိုင်ပြီး (၂၀၂၀)မှာတော့ (၆.၆)ရာခိုင်နှုန်းရှိနိုင်တယ်လို့ခန့်မှန်းလိုက်ပါတယ်။ကမ္ဘာ့ဘဏ်အုပ်စုရဲ့ အရှေ့အာရှနှင့်ပစိဖိတ်ဒေသဆိုင်ရာတာဝန်ရှိသူတွေနဲ့မြန်မာအပါအ၀င် အာရှပစိဖိတ်ဒေသနိုင်ငံတွေက သတင်းမီဒီယာသမားတွေနဲ့ ဧပြီလ(၂၄)ရက်က အွန်လိုင်းကနေတိုက်ရိုက်အမေးအဖြေတွေပြုလုပ်ခဲ့ပြီး မြန်မာ့နိုင်ငံနဲ့ပတ်သက်တာတွေကိုလည်း ဖြေကြားခဲ့ပါတယ်။

ကုမ္ပဏီဥပဒေသစ်ပြောင်းလဲကျင့်သုံးတာ ၊ ဘဏ်လုပ်ငန်းဖြေလျော့တာ ၊ Belt and Road စီမံကိန်း လို အခွင့်အလမ်းတွေကြောင့် (၂၀၂၀-၂၀၂၁) မှာတော့ မြန်မာ့စီပွားရေးတိုးတက်မှုနှုန်းကအကောင်းဘက်မှာဆက်ရှိနိုင်ပြီး (၆.၆)ရာခိုင်နှုန်းရှိနိုင်တယ်လို့ ခန့်မှန်းထားတာဖြစ်ပါတယ်။ကမ္ဘာ့ဘဏ်ရဲ့ (၂၀၂၀)အထိ သုံးသပ်ချက်တွေထဲမှာ ဖိလစ်ပိုင် ၊လာအိုနိုင်ငံတွေအနေနဲ့ ဖွံ့ဖြိုးမှုတိုးတက် လာနိုင်ပေမယ့် ထိုင်း ၊ဗီယက်နမ်နိုင်ငံတွေကတော့အနည်းငယ်ပြန်ကျသွားနိုင်တယ်လို့ခန့်မှန်းထားပါတယ်။ ဒါပေမယ့် ရခိုင်ကိစ္စအပါအ၀င်ဥရောပနိုင်ငံတွေရဲ့ ကုန်သွယ်ရေးအခွန်ကင်းလွတ်ခွင့် ပြန်လည်ကန့်သတ် နိုင်တဲ့အခြေအနေတွေက မြန်မာ့စီးပွားရေးတိုးတက်မှုအတွက် စိန်ခေါ်မှုတွေအဖြစ် ရှိလာနိုင်တယ်လို့ကမ္ဘာ့ဘဏ်ကသုံးသပ်ပါတယ်။ကမ္ဘာ့ဘဏ်အနေနဲ့ ခြောက်လတစ်ကြိမ် မြန်မာ့စီးပွားရေးဆိုင်ရာ စောင့်ကြည့်အစီရင်ခံကို ထုတ်ပြန်နေတာဖြစ်ပါတယ်။    

 

 

Related News