ပြည်ထဲရေးဝန်ကြီးဌာန၊ အကျဉ်းဦးစီးဌာန မန္တလေးဗဟိုအကျဉ်းထောင်မှ ၂၀၁၇ ခုနှစ် တက္ကသိုလ်ဝင်တန်း အောင်မြင်ခဲ့သောကျောင်းသားကျောင်းသူ ၇ ဦးနှင့် စာပေသင်ကြားပေးခဲ့သော ဆရာ၊ ဆရာမများအား ဂုဏ်ပြုပွဲအခမ်းအနားကိုဇူလိုင်လ ၂၂ ရက် က မန္တလေးဗဟိုအကျဉ်းထောင် ဓမ္မာရုံမှာ ကျင်းပပြုလုပ်ခဲ့ပါတယ်။ ပြည်ထဲရေး ၀န်ကြီးဌာနအနေနဲ့ပညာရေး ၀န်ကြီးဌာနနှင့် ပူးပေါင်းကာ ၂၀၁၃- ၂၀၁၄ ပညာသင်နှစ်ကစပြီး မန္တလေးဗဟိုအကျဉ်းထောင်မှာ ပညာတစ်ပိုင်းတစ်စဖြင့် ရောက်ရှိလာတဲ့လူငယ် အကျဉ်းသားအကျဉ်းသူများ ပညာသင်ယူမှု အခွင့်အလမ်းဆုံးရှုံးမှု မရှိစေရန် ပဉ္စမတန်းမှ စပြီးအတန်းစဉ် အလိုက် ပညာသင်ကြား ပေးလျက်ရှိပြီး တက္ကသိုလ်ဝင်တန်း ဖြေဆိုမည့် ကျောင်းသားကျောင်းသူတွေ ကိုတော့ ရန်ကုန်မှ အင်းစိန် ဗဟိုအကျဉ်းးထောင်သို့ ပို့ဆောင်ဖြေဆိုစေခဲ့တယ်လို့သိရပါတယ်။ 

ပြီးခဲ့တဲ့ ၂၀၁၆- ၂၀၁၇ ပညာသင်နှစ်မှာတော့ ပညာရေးဝန်ကြီးဌာနနှင့် ပူးပေါင်းကာ တက္ကသိုလ်ဝင်တန်း ဖြေဆိုမည့် ကျောင်းသားကျောင်းသူများကို မန္တလေးဗဟိုအကျဉ်းထောင်မှာ တက္ကသိုလ်ဝင်စာမေးပွဲဖြေဆိုနိုင်ရေး အကျဉ်းထောင်အတွင်း စာစစ်ဌာနတခုကိုစတင်ဖွင့်လှစ် ဖြေဆိုစေခဲ့ကြောင်းသိရပါတယ်။ အကျဉ်းထောင်အတွင်း စာသင်ကြားပေးမှုနှင့် စာမေးပွဲ အောင်မြင်ခဲ့တဲ့ ကလေးငယ်များဆက်လက်ပညာသင်ကြားခွင့်ရရှိရန် ဆောင်ရွက်ထားမှုများကို မန္တလေးဗဟိုအကျဉ်းထောင် ဒုတိယညွှန်ကြားရေးမှုး ဦးချိုဝင်းထွန်း ကခုလိုပြောပါတယ်။

၂၀၁၇ခုနှစ်တက္ကသိုလ်ဝင် စာမေးပွဲကို မန္တလေးဗဟိုအကျဉ်းထောင် စာစစ်ဌာနမှ (၁၁)ဦး ၀င်ရောက်ဖြေဆိုရာ (၇)ဦးအောင်မြင်ခဲ့ပြီး ၃ဘာသာ ဂုဏ်ထူးရှင် တစ်ဦး ၊ ၁ ဘာသာဂုဏ်ထူးရှင် (၄ )ဦးပေါ်ထွက်ခဲ့ပါတယ်။ မူးယစ်ဆေးမှု ဖြင့် ထောင်ဒဏ် ၁၀ နှစ် ပြစ်ဒဏ်ပေးခြင်းခံရသော်လည်း တက္ကသိုလ်ဝင် စာမေးပွဲကို ၃ ဘာသာဂုဏ်ထူးဖြင့် ထူးချွန်စွာအောင်မြင်ခဲ့သည် ကျောင်းသူ မရွှန်းလဲ့ဝေကျော်မှ ၎င်း၏ခံစားချက်နှင့် တက်ရောက်ချင်သောတက္ကသိုလ်များကိုပြောပါတယ်။

ယခု ၂၀၁၇-၂၀၁၈ ပညာသင်နှစ်မှာလည်း မန္တလေးဗဟိုအကျဉ်းထောင်မှ တက္ကသိုလ်ဝင်တန်း ကို တက်ရောက် သင်ကြားနေသူ (၅၂) ဦးရှိပြီးအတန်းပညာသင်ကြားနေသူအယောက် (၈၀) ကျော်ရှိတယ်လို့ သိရပါတယ်။ အကျဉ်းထောင်အတွင်း အကျဉ်းကျခံနေရသော်လည်း ပြစ်ဒဏ် ကျခံနေရသည့် ကျောင်းသားကျောင်းသူများ၏ စားဝတ်နေရေးနှင့် စာအုပ်စာတမ်းများကို တာဝန်ယူကာ ဆရာအဖြစ် သင်ကြားပေးနေသည့် ဦးသန်းထွန်းအောင်က ကျောင်းသား ကျောင်းသူများ၏ ပညာရေးသင်ကြားပေးနေမှုကိုခုလိုပြောပါတယ်။

ပညာတစ်ပိုင်းတစ်စဖြင့် ပြစ်ဒဏ်ကျခံနေရတဲ့  အကျဉ်းသားများကို ပညာရေးဆိုင်ရာ အခွင့်အလမ်းများရရှိအောင် စီမံဆောင်ရွက်နေပြီးအကျဉ်းဦးစီးဌာနအနေဖြင့် လိုအပ်ချက်များ စိန်ခေါ်မှုများစွာရှိသော်လည်း ပြစ်ဒဏ်ကျ အကျဉ်းသားများ၏ မှန်ကန်သောခံယူချက်များ အရေးပါသောကြောင့် ပြစ်ဒဏ်ကျ အကျဉ်းသားများ၏ မိဘများဆွေမျိုးများ က အပြန်အလှန် သဘောပေါက် နားလည်ပြီးအကျဉ်းဦးစီးဌာန ၀န်ထမ်းများ နှင့် ပူးပေါင်းဆောင်ရွက်ပါက နိုင်ငံတော်ဖွံ့ဖြိုးတိုးတက်ရေးတွင် အထောက်အကူဖြစ်စေတဲ့ လူသားအရင်းအမြစ်များ လူမှု ပတ်ဝန်းကျင်တွင် ဂုဏ်ယူဖွယ် ပြန်လည် ၀င်ရောက်နိုင်မှာ ဖြစ်ကြောင်းအခမ်းအနားမှာ ညွှန်ကြားရေးမှုးချုပ်ကပြောကြားခဲ့ပါတယ်။

 

 

Related News