တက္ကသိုလ်တွေမှာတာဝန်ထမ်းဆောင်နေကြတဲ့ဆရာ၊ ဆရာမတွေရဲ့လိုအပ်ချက်တွေနဲ့ ပက်သက်ပြီး ကူညီဆောင်ရွက်ပေးနိုင်ဖို့အတွက် တက္ကသိုလ်ဆရာများသမဂ္ဂမှဆရာ(၁၅)ဦးခန့်နဲ့ ပညာရေးဝန်ကြီးဌာနက ကိုယ်စားလှယ်အဖြစ် အဆင့်မြင့်ပညာဦးစီးဌာနက ဒုတိယညွန်ကြားရေး မှူးချုပ် ဒေါက်တာအောင်အောင်မင်းနဲ့ဇူလိုင်လ(၁၇)ရက်က နေပြည်တော်မှာတွေ့ဆုံခဲ့တယ်လို့ သိရပါတယ်။ အဲဒီတွေ့ဆုံပွဲနဲ့ ပတ်သတ်တဲ့ သတင်းစာရှင်းလင်းပွဲကို ဇူလိုင်လ(၃၀)ရက်က ရန်ကုန်တက္ကသိုလ်မှာ ပြုလုပ်သွားပါတယ်။ 

တက္ကသိုလ်ဆရာများသမဂ္ဂကဆရာတွေနဲ့ ပညာရေးဝန်ကြီးဌာနတွေ့ဆုံရာမှာ တက္ကသိုလ်တိုင်းမှာ ဆရာများသမဂ္ဂတွေ အလျှင်အမြန်ပေါ်ပေါက်စေရေး၊ တက္ကသိုလ်ဆရာ၊ ဆရာမတွေ အခြေခံပညာ ကျောင်းတွေမှ ဆရာ၊ဆရာမတွေရဲ့ ကျန်းမာရေးစောင့်ရှောက်မှု လူမှုဖူလုံရေးအတွက် အခမဲ့ဆေးကုသခွင့်ပေးဖို့နဲ့ မကြာသေးမီကဖြစ်ပွားခဲ့တဲ့ ယာဉ်မတော်တဆမှုတွေနဲ့ပက်သက်လို့ တက္ကသိုလ်အခြေပြုယာဉ်လိုင်းတွေပြေးဆွဲပေးဖို့၊ ယာဉ်တွေပြေးဆွဲတဲ့အခါမှာ လုံခြုံစိတ်ချရတဲ့ ယာဉ်တွေနဲ့ပြေးဆွဲပေးဖို့အပြင် အောက်တိုဘာလ(၅)ရက်နေ့ဟာ ကမ္ဘာ့ဆရာများနေ့ဖြစ်ပေမယ့် အဲဒီနေ့မှာ ဂျူတီတွေနဲ့မအားတဲ့အတွက် ကမ္ဘာ့ဆရာများနေ့မှာဆရာ၊ဆရာမတွေကို ဂျူတီကင်း လွတ်ခွင့်ပေးဖို့ စတဲ့အချက်လေးချက်ကိုတင်ပြတောင်းဆိုခဲ့တယ်လို့သိရပါတယ်။

ဒီအချက်တွေနဲ့ပက်သက်ပြီးတက္ကသိုလ်ဆရာများသမဂ္ဂတွေအနေနဲ့ သြဂုတ်လထဲမှာ ပညာရေး ၀န်ကြီးဌာနအပြင်ပြည်သူ့လွှတ်တော် ပညာရေးမြှင့်တင်မှုကော်မတီကိုလည်း တင်ပြတောင်းဆို သွားမှာဖြစ်ပြီး တက္ကသိုလ်ဆရာတွေရဲ့ကျန်းမာရေးနဲ့ပက်သက်လို့ အလုပ်သမားနှင့် တောင်သူလယ်သမား ရေးရာကော်မတီကိုလည်းတွေ့ဆုံသွားဖို့ရှိတယ်လို့သိရပါတယ်။ လက်ရှိမှာတော့ ပညာရေးဝန်ကြီးဌာနလက်အောက်မှာတက္ကသိုလ်ပေါင်း(၁၃၂)ခုရှိပြီး အဲဒီတက္ကသိုလ်တွေမှာတာဝန်ထမ်းဆောင်နေတဲ့ဆရာ၊ဆရာမအများအပြားရှိတယ်လို့သိရပါတယ် ။

 

 

Related News