အင်းစိန်အကျဉ်းထောင်နှင့် မန္တလေးအကျဉ်းထောင်တို့မှာ ပြစ်ဒဏ်ကျခံနေရသူများထဲမှ (၂၀၁၆ -၂၀၁၇) ပညာသင်နှစ် တက္ကသိုလ်ဝင်တန်းစာမေးပွဲတွင် ထူးချွန်စွာအောင်မြင်ခဲ့တဲ့ ပြစ်ဒဏ်ကျခံရဆဲ ကျောင်းသားကျောင်းသူ(၇)ဦးကို သြဂုတ်လ(၇)ရက်နေ့နံနက်ပိုင်းက နိုင်ငံတော်သမ္မတ၏ လွတ်ငြိမ်းသက်သာခွင့်နဲ့ အကျဉ်းထောင်မှလွှတ်ပေးလိုက်ပြီဖြစ်ပါတယ်။ ယခုကဲ့သို့ ပြစ်ဒဏ်ကျခံနေရတဲ့ ကျောင်းသားကျောင်းသူများကို နိုင်ငံတော်သမ္မတရဲ့ လွတ်ငြိမ်းသက်သာခွင့်နဲ့ လွှတ်ပေးခြင်းဟာပထမဆုံးဖြစ်တယ်လို့ မန္တလေး အိုးဘိုအကျဉ်းထောင်မှ ထောင်ပိုင်ကြီးဦးချိုဝင်းထွန်းက ပြောပါတယ်။ အင်းစိန်အကျဉ်းထောင်မှ ဂုဏ်ထူးရကျောင်းသား(၂)ဦး၊ မန္တလေး အိုးဘိုအကျဉ်းထောင်မှ ကျောင်းသားကျောင်းသူ (၅)ဦးကို လွတ်ငြိမ်းသက်သာခွင့်ပေးလိုက်တာဖြစ်ပါတယ်။
 
မန္တလေး အကျဉ်းထောင်မှာ ပြစ်ဒဏ်ကျခံနေရတဲ့ တက္ကသိုလ်ဝင်တန်းစာမေးပွဲအောင်မြင်ခဲ့တဲ့ ကျောင်းသား ကျောင်းသူ (၅)ဦးမှာ လားရှိုး၊လွိုင်ကော်၊ မကွေး၊ကျိုင်းတုံနဲ့ မြစ်ကြီးနားမြို့ ၊ ရွှေကူကျေးရွာတို့မှဖြစ်ပြီး ကျောင်းသားကျောင်းသူများကို မိသားစုများရဲ့ လက်ဝယ်သေချာအပ်နှံ ပေးသွားမှာ ဖြစ်တယ်လို့ သိရပါတယ်။ နိုင်ငံတော်သမ္မတ လွတ်ငြိမ်းသက်သာခွင့်နဲ့ ပြစ်ဒဏ်လွှတ်ပေးရာမှာ ပြစ်ဒဏ်ကျခံ နေရသူများဟာ နုနယ်တဲ့ကလေးများဖြစ်ပြီး မလိုအပ်ဘဲအမှားအယွင်းထပ်မံမဖြစ်စေရန် လမ်းမှား မရောက်စေရန် သက်ဆိုင်ရာဌာနများမှတာဝန်ရှိသူများက ဆုံးမဩသြ၀ါဒပေးကာ မိဘများ လက်ဝယ်အပ်နှံပေးတာဖြစ်ကြောင်း ၊ အုပ်ထိန်းသူများမှ လာရောက်မခေါ်ယူသေးတဲ့ ကျောင်းသူ ကျောင်းသားများကို အိုးဘိုအကျဉ်းထောင်ရှိ VIP ရိပ်သာမှာ ထားရှိထားကြောင်း မန္တလေး အိုးဘို အကျဉ်းထောင်မှ ထောင်ပိုင်ကြီးဦးချိုဝင်းထွန်းက ပြောပါတယ်။ 
 
 
 

Related News