သူရိယလူမှုကူညီရေးအဖွဲ့က ကျောင်းနေအရွယ်ဖြစ်ပြီး အကြောင်းအမျိုးမျိုးကြောင့် ကျောင်းပြင်ပကို ရောက်ရှိနေတဲ့ ကလေးတွေအတွက် အချိန်ပိုင်းရွေ့လျားစာသင်ကြားမှု ပြုလုပ် ပေးနေတယ်လို့သိရပါတယ်။ သူရိယလူမှုကူညီရေးအဖွဲ့မှ ကျောင်းပြင်ပပညာရေးအတွက် အခုလိုရွှေ့လျား စာသင်ကြားမှု ပြုလုပ်ပေးဖို့ ရန်ကုန်တိုင်းဒေသကြီးအတွင်း ကျောင်းနေအရွယ်မှာ ကျောင်းပြင်ပရောက်ရှိနေတဲ့ ကလေး အများဆုံးနေရာဖြစ်တဲ့ ဒဂုံမြို့သစ်(ဆိပ်ကမ်း) မြို့နယ်ကို ရွေးချယ်တာဖြစ်တယ်လို့ သိရပါတယ်။ အချိန်ပိုင်းကျောင်းလာတက်ရောက်တဲ့ ကလေးတွေကတော့ နယ်ပြောင်းတွေ၊ မွေးစာရင်းမရှိတာတွေ၊ လုပ်ငန်းခွင်ရောက်ရှိနေတဲ့ ကလေးတွေအများဆုံးဖြစ်တယ်လို့ သိရပါတယ်။ 
 
ကျောင်းပြင်ပပညာရေးမှာသင်ကြားနေတဲ့ ကလေးတွေကတော့ အသက်(၅)နှစ်မှ (၁၄)နှစ်အထိရှိကြပြီး အရင်ကကျောင်းတက်ဖူးကြသူတွေလည်း ပါဝင်ပါတယ်။ ကလေးတွေအနေနဲ့ အရင်က စာသင်ခဲ့ဖူးကြပေမယ့်မိသားစုစားဝတ်နေရေးကို တဖက်တလမ်းက ၀ိုင်းဝန်းကူညီပေး ရတာကြောင့် ကျောင်းထွက်ခဲ့ရတာဖြစ်ပြီး အခုလို အချိန်ပိုင်းအခမဲ့ စာသင်ကြားမှုကို ပြန်လည် သင်ကြားရတာကြောင့် ၀မ်းသာပျော်ရွှင်တယ်လို့ ပြောပါတယ်။ စာသင်ကြားနေတဲ့ ကလေးတွေကတော့ ဒဂုံမြို့သစ် (ဆိပ်ကမ်း)မြို့နယ် အမှတ်(၈၉)ရပ်ကွက် ကျူးကျော်တွေက အများဆုံးဖြစ်ပါတယ်။ မိဘတွေက သားသမီးများလွန်းတာကြောင့် ကျောင်းနေ အရွယ်ကလေးတွေကို ကျောင်းမထားပေးနိုင်တာ ရှိသလို၊ စားဝတ်နေရေးအတွက် အလုပ်ခိုင်းခဲ့ရတာ တွေကြောင့် ကျောင်းထုတ်ခဲ့ရတာတွေရှိတယ်လို့ သိရပါတယ်။ မိဘတွေအနေနဲ့ အခုလိုကလေးတွေကို သူရိယ လူမှုကူညီရေးအဖွဲ့မှ ပညာအခမဲ့ အချိန်ပိုင်းသင်ကြားပေးရတာကြောင့် ကလေးတွေ စာသင်ကြားခွင့် ရရှိတဲ့အတွက် ၀မ်းသာမိတယ်လို့ ပြောပါတယ်။ သူရိယလူမှုကူညီရေးအဖွဲ့အနေနဲ့ ကလေးတွေအတွက် အချိန်ပိုင်း ရွေ့လျားစာသင်ကြားမှုကို ၂၀၁၇ နိုဝင်ဘာလ(၂၁)ရက်နေ့မှ စတင်ပြီး အခြေခံစာတတ်မြောက်ရေးအတွက် အရေး၊ အဖတ်၊ အတွက်၊ ဗဟုသုတ၊ ယဉ်ကျေးလိမ်္မာနဲ့ အားကစားတွေကို သင်ကြားပေးနေတာဖြစ်ပြီး ကျန်းမာရေး စောင့်ရှောက်မှုတွေကိုလည်း ပြုလုပ်ပေးနေတယ်လို့ သိရပါတယ်။
 
 

Related News