မြန်မာနိုင်ငံအထူးပညာရေးဆိုင်ရာနည်းပညာနဲ့ အတွေ့အကြုံနှီးနှောဖလှယ်ပွဲကို မတ်လ(၅) ရက်နဲ့ (၆)ရက်က ရန်ကုန်ပညာရေးတက်္ကသိုလ်မှာ ပြုလုပ်ခဲ့ပါတယ်။အခုပြုလုပ်ခဲ့တဲ့ အထူးပညာရေးဆိုင်ရာနည်းပညာနဲ့ အတွေ့အကြုံနှီးနှောဖလှယ်ပွဲမှာ မသန်စွမ်းကလေးငယ်တွေနဲ့ ဥာဏ်ရည်မသန်စွမ်းကလေးတွေအတွက် သင်ကြားရေးအပိုင်းမှာ အထူးပညာရေးဆိုင်ရာ နည်းပညာနဲ့ ဆရာ၊ဆရာမတွေရဲ့ သင်ကြားမှုပုံစံအကြောင်းကို ရန်ကုန်ပညာရေးတက္ကသိုလ် အထူးပညာရေးအသင်းနဲ့ အင်္ဂလန်နိုင်ငံ ၀ိုဗာဟန်တန်တက္ကသိုလ်တို့မှ ဆရာ၊ဆရာမတွေက အတွေ့အကြုံဖလှယ်ခဲ့ကြတာ ဖြစ်ပါတယ်။

မြန်မာနိုင်ငံမှာ မသန်စွမ်းကလေးငယ်တွေနဲ့ ဥာဏ်ရည်မသန်စွမ်းသူတွေအတွက် ပညာ သင်ကြားရာမှာ အခက်အခဲတွေရှိနေပြီး ဒီအခက်အခဲတွေကိုဖြေရှင်းနိုင်ဖို့က ဆရာ၊ဆရာမတွေကို စနစ်တကျမွေးထုတ်ပေးနိုင်တဲ့ သင်တန်းကျောင်းတွေမရှိခြင်း၊ ဒီကလေးငယ်တွေကို သင်ကြားပြုစု ပေးမယ့် ဆရာ၊ ဆရာမ အရေအတွက် အလွန်နည်းပါးခြင်း၊ လူမှုပတ်ဝန်းကျင်မှာ ဒီကလေးငယ် တွေအပေါ် မှားယွင်းတဲ့အမြင်နဲ့ ဆက်ဆံမှု ပုံစံတွေရှိနေခြင်းကြောင့် အခုလို မသန်စွမ်းကလေး ငယ်တွေနဲ့ ဥာဏ်ရည်မသန်စွမ်းသူတွေအတွက် ပညာသင်ကြားဖို့ အခက်အခဲတွေ ရှိနေတာ ဖြစ်တယ်လို့ သိရပါတယ်။(၂၀၁၄)ခုနှစ်မှာ ကောက်ခံထားတဲ့ မြန်မာနိုင်ငံ လူဦးရေစစ်တမ်းအရ တိုင်းပြည်လူဦးရေရဲ့ (၁.၇)ရာခိုင်နှုန်းဟာ ဥာဏ်ရည်မသန်စွမ်းသူများဖြစ်ပါတယ်။

လူမှုဝန်ထမ်းကယ်ဆယ်ရေးနဲ့ ပြန်လည်နေရာချထားရေးဝန်ကြီးဌာနမှ ဖွင့်လှစ်ထားတဲ့ မသန်စွမ်းသက်ငယ် သင်တန်းကျောင်း ပေါင်း(၃၀)ရှိပြီး ဒီကျောင်းတွေရဲ့ (၈၅)ရာခိုင်နှုန်းဟာ ရန်ကုန်တိုင်းအတွင်းမှာသာရှိပြီး အခြားတိုင်းနဲ့ ပြည်နယ်တွေမှာ မရှိသလောက်နည်းပါးနေတယ်လို့ သိရပါတယ်။

 

 

 

Related News