မန္တလေးမြို့ မန္တလာဒီဂရီကောလိပ် သတ္တဗေဒပြတိုက်မှာ  သတ္တဝါမျိုးစိတ်ပေါင်း (၂၀၄) မျိုးကို ပြသထားတယ်လို့ မန္တလာဒီဂရီကောလိပ် တာဝန်ရှိသူထံမှသိရပါတယ်။ မန္တလာဒီဂရီကောလိပ် သတ္တဗေဒပြတိုက်မှာ ခရု၊ယောက်သွား၊ ရေဘ၀ဲ၊ ကင်းမွန်၊ သံပခြုပ်၊ ကင်းခြေများ၊ ပုဇွန်၊ ဂဏန်း၊ လိပ်ပြာ၊ ငါးလိပ်စွန်၊ ဖား၊ မြွေ၊ ငှက်၊ ၀က်၊ ဇောတိက စတဲ့သတ္တ၀ါနှင့်ပတ်သက်တဲ့ မျိုးစိတ် ၂၀၄ မျိုးကို ပြသထားတာ ဖြစ်ပါတယ်။

ဒီပြတိုက်ကို ဖွင့်လှစ်ရတာဟာ  မန္တလာဒီဂရီကောလိပ်ရှိ သတ္တဗေဒ ကျောင်းသား၊ ကျောင်းသူတွေအနေနဲ့ သင်ကြားရေးပိုင်းမှာ အထောက်အကူတွေဖြစ်စေဖို့၊ သတ္တဗေဒဘာသာရပ်ဆိုင်ရာ သုတေသနလုပ်ငန်းတွေမှာ အထောက်အကူပြုနိုင်ဖို့၊ ဇီဝမျိုးစိတ်တွေနဲ့ ပတ်သက်ပြီး စာတွေ့၊ လက်တွေ့တွေလုပ်ရာမှာ ပိုမိုအထောက်အကူ ဖြစ်စေဖို့အတွက် ရည်ရွယ်ဖွင့်လှစ်တာလို့ မန္တလာဒီဂရီကောလိပ် ကျောင်းအုပ်ကြီး ဒေါက်တာဝင်းဆွေက ပြောပါတယ်။ 

ယခုဖွင့်လှစ်ခဲ့တဲ့ သတ္တဗေဒပြတိုက်ကို ၂၀၁၈ ခုနှစ် ဇွန်လ ၇ရက်နေ့က စတင်ဖွင့်လှစ်ခဲ့တယ်လို့သိရပါတယ်။  နောက်ဆုံးနှစ် သတ္တဗေဒကျောင်းသား၊ ကျောင်းသူတွေဟာ နောက်ဆုးံနှစ်အတန်း တက်ရောက်ရာမှာ မြန်မာနိုင်ငံအတွင်းဒေသတစ်ချို့ကို လက်တွေ့လေ့လာရေးခရီးစဉ်တွေ ထွက်ပြီး သတ္တဝါမျိုးစိတ်တွေကို လေ့လာကြရတယ်လို့ ပြောပါတယ်။ ဒီလိုကျောင်းသားကျောင်းသူတွေရဲ့ လေ့လာရေးခရီးစဉ်တွေကနေတွေ့ရှိတဲ့   မျိုးစိတ် တွေကို ပြတိုက်ထဲမှာ ထိန်းသိမ်းပြီး စာတမ်းတွေ ပြုလုပ်ရတယ်လို့ သိရပါတယ်။

ဒီပြတိုက်ကနေ သတ္တဗေဒ ဘာသာရပ်ဆိုင်ရာ အကျိုးပြု သုတေသနလုပ်ငန်းတွေကိုလည်း ပိုမိုအထောက်အကူပြုနိုင်တယ်လို့ သိရပါတယ်။ မန္တလာဒီဂရီကောလိပ်မှာ ကျောင်းသား၊ ကျောင်းသူ ၆၀၀၀ ကျော် တက်ရောက်သင်ကြားနေပြီး သတ္တဗေဒဆိုင်ရာဘာသာရပ်မှာ ကျောင်းသား၊ ကျောင်းသူ ၄၅၉ ဦး တက်ရောက်သင်ကြားနေတယ်လို့ သိရပါတယ်။

 

 

Related News