လာမယ့် (၂၀၁၉)ခုနှစ် မတ်လ (၆)ရက်ကနေ (၁၅)ရက်အထိ ဖြေဆိုမယ့် တက္ကသိုလ်ဝင်ခွင့်စာမေးပွဲမှာတော့  မေးခွန်းပုံစံ အသစ်နဲ့ ပြောင်းလဲဖြေဆိုရမှာဖြစ်ပါတယ်။ တက္ကသိုလ်ဝင်ခွင့်မေးခွန်းပုံစံအသစ်ပြောင်းလဲမှုနဲ့ ပတ်သက်ပြီး (၂၀၁၈)ခုနှစ် သြဂုတ်လကစပြီး တစ်နိုင်ငံလုံးမှာရှိတဲ့ တက္ကသိုလ်ဝင်တန်းသင်ကြားနေတဲ့ ဆရာ၊ ဆရာမတွေကို ပညာပေးအစီစဉ်ပြုလုပ် ခဲ့ပါတယ်။ပညာရေးအဆင့်မြှင့်တင်မှုအဖြစ် အခု၂၀၁၈-၂၀၁၉ပညာသင်နှစ်မှာ တက္ကသိုလ်ဝင်တန်းဖြေဆိုမယ့် ကျောင်းသားကျောင်းသူ တွေဟာ တက္ကသိုလ်ဝင်စာမေးပွဲကို မေးခွန်းပုံစံသစ်တွေနဲ့ဖြေဆိုရမှာဖြစ်ပါတယ်။ဒီလိုဖြေဆိုရမှာဖြစ်တဲ့အတွက်ကျောင်းသား ကျောင်းသူတွေအဆင်ပြေစေဖို့ စာမေးပွဲမေးခွန်းပုံစံသစ်တွေအတိုင်း လက်ရှိမှာ အခြေခံပညာကျောင်းတွေမှာ သင်ကြားနေ တာဖြစ်ပြီး စာမေးပွဲဖြေဆိုတဲ့အခါမှာ အခက်အခဲမရှိအောင် လေ့ကျင့်သင်ကြားပေးနေတယ်လို့ သိရပါတယ်။

အခုပြောင်းလဲ လိုက်တဲ့ တက္ကသိုလ်ဝင်တန်းစာမေးပွဲမေးခွန်းပုံစံသစ်ဟာ  ဓမ္မဒိဋ္ဌာန်မေးခွန်းတွေ မပါဝင်တော့ဘဲ ကျောင်းသားကျောင်းသူ တွေအတွက် အလွတ်ကျက်မဟုတ်ဘဲ အတွေးအခေါ်ပိုင်းဆိုင်ရာဖြေဆိုရမယ့် မေးခွန်းဟောင်းပုံစံတွေ ပါဝင်မှာဖြစ်ပါတယ်။ ဒါ့ကြောင့် ကျောင်းသား/ကျောင်းသူတွေ အနေနဲ့မေးခွန်းဟောင်းတွေကို ပြန်လည်လေ့လာဖို့လိုအပ်ကြောင်းနဲ့ ကျောင်းသား ကျောင်းသူတွေရဲ့အရည်အချင်းကို အကဲဖြတ်စစ်ဆေးတဲ့ မေးခွန်းပုံစံတွေမေးမြန်းမှာဖြစ်တဲ့အတွက် အရင်မေးခွန်းပုံစံထက် ပိုပြီး အနည်းငယ်ခက်ခဲမှုရှိနိုင်တယ်လို့ ရန်ကုန်တိုင်းဒေသကြီး အရှေ့ပိုင်းခရိုင် ခရိုင်ပညာရေးမှူး ဦးမောင်ကြွယ်က ပြောပါ တယ်။တက္ကသိုလ်ဝင်ခွင့်စာမေးပွဲကို ၀င်ရောက်ဖြေဆိုမယ့်ကျောင်းသားကျောင်းသူတွေအနေနဲ့ မေးခွန်းဟောင်းတွေအပြင် သင်ရိုး တွေကို  အခန်းလိုက်ရွေးချယ်လေ့ကျင့်လို့မရတော့ပဲ သင်ရိုးအကုန်လေ့ကျင့်ရမှာဖြစ်တယ်လို့ သိရပါတယ်။

ကျောင်းသား/ ကျောင်းသူတွေအနေနဲ့ တက္ကသိုလ်ဝင်စာမေးပွဲမေးခွန်းပုံစံသစ်တွေကို သက်ဆိုင်ရာဘာသာရပ်အလိုက် ဖြေဆိုရမှာဖြစ်ပြီး လက်ရှိမှာတော့ ကြိုတင်ပြင်ဆင်မှုတွေ ပြုလုပ်နေတယ်လို့ တက္ကသိုလ်ဝင်တန်းစာမေးပွဲကို ၀င်ရောက်ဖြေဆိုမယ့် ဒသမတန်းကျောင်းသူ မမြတ်နိုးအောင်က ပြောပါတယ်။ဒါ့အပြင် တက္ကသိုလ်ဝင်ခွင့်မေးခွန်းပုံစံအသစ်ပြောင်းလဲလိုက်တာကြောင့် ပုံမှန်ကျောင်းသားကျောင်းသူတွေအပြင် မသန်စွမ်း ကျောင်းသားကျောင်းသူတွေအတွက်ပါ အခက်အခဲအနည်းငယ်ရှိပါတယ်။ဒီအထဲမှာ အမြင်အာရုံ ချို့ယွင်းတဲ့ ကျောင်းသား/ ကျောင်းသူတွေအတွက်တော့ အခက်အခဲတွေပိုရှိနိုင်ပါတယ်။အမြင်အာရုံ ချို့ယွင်းတဲ့ ကျောင်းသား/ကျောင်းသူတွေက ယခင်နှစ်တွေက စာမေးပွဲဖြေဆိုဖို့လေ့ကျင့်ရာမှာ ကျက်စာအပိုင်းတွေကိုသာ အဓိကထားလေ့ကျင့်ရတယ်လို့သိရပါတယ်။

သချာင်္ဘာသာရပ်မှာတော့ သချာင်္(၂)အပိုင်းတွေက ပုံဆွဲရတာကြောင့် သင်ကြားမှုအခက်အခဲရှိတယ်လို့ သိရပါတယ်။ ဒါ့ကြောင့်သချာင်္(၁)အပိုင်းတွေကိုသာ အဓိကထားပြီးသင်ကြားလေ့ကျင့်ရတယ်လို့ပြောပါတယ်။ အခု(၂၀၁၈-၂၀၁၉)ပညာ သင်နှစ်ရဲ့တက္ကသိုလ်ဝင် စာမေးပွဲရဲ့မေးခွန်းပုံစံသစ်မှာတော့ စဉ်းစားတွေးခေါ်မှုအပိုင်းတွေပါဝင်လာတဲ့အပြင် သင်ရိုးအားလုံး လေ့ကျင့် ရမှာဖြစ်တာကြောင့် အခက်အခဲရှိတယ်လို့ တက္ကသိုဝင်တန်းမှာတက်ရောက်နေတဲ့ အမြင်အာရုံချို့ယွင်းတဲ့ ကျောင်းသားတစ်ဦးက ပြောပါတယ်။တက္ကသိုလ်ဝင်တန်းစာမေးပွဲမေးခွန်းပုံစံသစ်တွေကို (၂၀၁၈)ခုနှစ်က စတင်ပြောင်းလဲခဲ့တာဖြစ်ပြီး အခြေခံပညာကျောင်း တွေမှာ ပညာသင်နှစ်စတင်ကတည်းကသင်ခန်းစာတွေသင်ကြားရာမှာ ထည့်သွင်းသင်ကြားပေးနေပြီးကျောင်းသား ကျောင်းသူတွေကိုအစမ်းဖြေဆိုလေ့ကျင့်မှုတွေပြုလုပ်ပေးနေတယ်လို့သိရပါတယ်။ဒါ့အပြင် မျက်မမြင်ကျောင်းမှာလဲ သင်ရိုးတွေကိုတက္ကသိုလ်ဝင်အောင်မြင်ပြီး ကျောင်းသားဟောင်းတွေက ပြန်လည်သင်ကြားပေးပြီး ပြောင်းလဲလာမယ့်မေးခွန်း ပုံစံသစ်တွေကို လေ့ကျင့်ပေးနေတယ်လို့ သိရပါတယ်။

 

 

Related News