မြန်မာနိုင်ငံဗိသုကာအသင်း(AMA) မှ ကြီးမှူးပြုလုပ်ပေးနေတဲ့ လူငယ်ဗိသုကာများအတွက် လုပ်ငန်းခွင်အကြို မွမ်းမံမှု သင်တန်းကို မန္တလေးမြို့ Mingalar Mandalay Function Hall မှာ မတ်လ (၂၃) ရက်မှ စတင်ပြီး ပြုလုပ်နေတာ ဖြစ်ပါတယ်။ လူငယ်ဗိသုကာများအတွက် လုပ်ငန်းခွင်အကြို မွမ်းမံမှု သင်တန်းကို မြန်မာနိုင်ငံဗိသုကာအသင်း (AMA) မှ ကျောင်းပြီးစ လူငယ်ဗိသုကာတွေ လုပ်ငန်းခွင်ဝင်ရောက်ရာမှာ အထောက်အကူ ဖြစ်စေဖို့အတွက် ရည်ရွယ်ပြီး ပြုလုပ်တာ ဖြစ်တယ်လို့ သိရပါတယ်။ ဗိသုကာလုပ်ငန်းနဲ့ အသက်မွေးဝမ်းကြောင်း လုပ်တော့မယ်ဆိုရင် သိဖို့လိုအပ်တဲ့ ဗိသုကာ အခန်းကဏ္ဍ၊ ယဉ်ကျေးမှုအမွေအနှစ်တွေ ထိန်းသိမ်းစောင့်ရှောက်ရေးနည်းပညာ၊ မြို့ပြယဉ်ကျေးမှုအမွေအနှစ် စောင့်ရှောက်ရတဲ့အလုပ်တွေ လုပ်ဆောင်တဲ့ အချိန်မှာ သတိထား ဆောင်ရွက်ရမယ့် အခြေခံ အချက်တွေ ပို့ချပေးသွား မယ်လို့ သိရပါတယ်။

ဒါ့အပြင် ဗိသုကာလိုင်စင်ရယူရာမှာ လိုအပ်တဲ့အချက်တွေ၊ ဗိသုကာတွေ လိုက်နာရမယ့် စည်းမျဉ်းစည်းကမ်းနဲ့ ကျင့်ဝတ်၊ ဆောက်လုပ်ရေးလုပ်ငန်း စီမံခန့်ခွဲမှုနဲ့ သက်ဆိုင်တဲ့ အကြောင်းအရာတွေကိုလည်း သင်ကြားပို့ချပေးသွားမယ်လို့ မြန်မာနိုင်ငံဗိသုကာအသင်း ဥက္ကဋ္ဌ ဦးမော်လင်းက ပြောပါတယ်။လုပ်ငန်းခွင်အကြို မွမ်းမံမှု သင်တန်းကို ကျောင်းပြီးစ လူငယ်ဗိသုကာတွေနဲ့ ကျောင်းတက်နေဆဲကျောင်းသား ကျောင်းသူ (၁၀၀) ၀န်းကျင် တက်ရောက်နေပြီး သင်တန်းကာလ (၄) ရက်ကြာ သင်ကြားပေးသွားမယ်လို့ သိရပါတယ်။ သင်တန်း တက်ရောက်သူတွေအနေနဲ့ ဗိသုကာလောကထဲ ၀င်ရောက်နိုင်ဖို့၊ ဆောက်လုပ်ရေးလုပ်ငန်းတွေထဲ ရောက်ရှိလာဖို့၊ ဒီဇိုင်းတွေ ရေးဆွဲနိုင်ဖို့အတွက် လိုအပ်တဲ့ အခြေခံအချက်အလက်တွေရရှိပြီး ဗိသုကာ လိုင်စင်ရယူတဲ့အချိန်မှာ အထောက်အကူရရှိစေမှာ ဖြစ်တယ်လို့ သင်တန်းတက်ရောက်နေတဲ့ ကျောင်းသားတစ်ဦးက ပြောပါတယ်။လူငယ်ဗိသုကာများအတွက် လုပ်ငန်းခွင်အကြို မွမ်းမံမှု သင်တန်းကို မန္တလေးမြို့အပြင် ရန်ကုန်မြို့မှာလည်း တစ်ပြိုင်တည်း သင်ကြားပေးနေတယ်လို့လည်း သိရပါတယ်။

 

 

Related News