မြန်မာနိုင်ငံရဲ့ ICTကဏ္ဍဖွံ့ဖြိုးရေးတိုးတက်ရေးအတွက် “NetCon2018 နှင့် ICTစာတမ်းများ”  အမည်နဲ့ စာအုပ်ထုတ်ဝေ သွားမယ်လို့သိရပါတယ်။ဧပြီလ(၂၅)ရက်က ရန်ကုန်မြို့MICT Park ထဲမှာပြုလုပ်ခဲ့တဲ့ “NetCon2018 နှင့် ICTစာတမ်းများ” စာအုပ်ထုတ်ဝေမည့်အစီအစဉ် နှင့် SIG(Special Interest Group) ဖွဲ့စည်းဆောင်ရွက်သည့်အစီအစဉ်များကို စာနယ်ဇင်းရှင်းလင်းပွဲကသိရတာ ဖြစ်ပါတယ်။ရန်ကုန်တိုင်းဒေသကြီး ကွန်ပျူတာပညာရှင်အသင်းကကြီးမှူးပြီး NetCon 2018 (Network, Security & Telecommunication) ဆွေးနွေးပွဲကို (၂၀၁၈)ခုနှစ်၊ဒီဇင်ဘာလက ကျင်းခဲ့တာဖြစ်ပြီး ဒီပွဲမှာ ICT ပညာရှင်(၄၀)ဦးခန့်က နည်းပညာဆိုင်ရာခေါင်းစဉ်(၂၅)ခုကို တက်ရောက်လာသူ(၈၀၀)ကျော်နဲ့ ဆွေးနွေးခဲ့ကြတာဖြစ်ပါတယ်။အဆိုပါ ဆွေးနွေးပွဲမှာ ဖတ်ကြားခဲ့တဲ့ စာတမ်းတွေ၊ဆွေးနွေးဟောပြောခဲ့တဲ့အကြောင်းအရာတွေ နဲ့ သတင်းအချက်အလက် နည်းပညာဆိုင်ရာဆောင်းပါးတွေကို စုစည်းပြီး “NetCon2018 နှင့် ICTစာတမ်းများ” အမည်နဲ့စာအုပ်ကို လာမယ့် ဇွန်လကုန်မှာ ထုတ်ဝေသွားမယ်လို့ သိရပါတယ်။

ဒီစာအုပ်ကို ထုတ်ဝေရတာက နိုင်ငံတကာရဲ့ဆိုင်ဘာလုံခြုံရေးစိန်ခေါ်မှုတွေ၊ ပညာရပ်ဆိုင်ရာတိုးတက်ဖြစ်ပေါ်နေမှု တွေ၊အကောင်းဆုံးလက်တွေ့လုပ်ဆောင်နေမှုတွေနဲ့ ရှေ့ဆက်သွားမယ့် Trend တွေကို မျက်ခြေမပြတ်လေ့လာနိုင်ဖို့ကို ရည်ရွယ်ပြီး ထုတ်ဝေမှာဖြစ်တယ်လို့သိရပါတယ်။ “NetCon2018 နှင့် ICTစာတမ်းများ”စာအုပ်ကို ၀န်ကြီးဌာနများ၊ ဦးစီးဌာနများ၊ တိုင်းဒေသကြီးနဲ့ပြည်နယ်အစိုးရအဖွဲ့များ၊ လွှတ်တော်များနဲ့ရေးရာကော်မတီများ၊ အမျိုးသားအဆင့် ကော်မရှင်များ၊ တက္ကသိုလ်ကောလိပ်များ၊ စာကြည့်တိုက်များ၊ NGO/INGOများ၊ အသင်းအဖွဲ့များ နဲ့ သံရုံးများကို အခမဲ့ဖြန့်ဝေပေးသွားမှာဖြစ်ပြီး နည်းပညာလေ့လာလိုက်စားလိုသူတွေ အတွက်တော့ သင့်တင့်တဲ့နှုန်းထားတစ်ခုနဲ့  ဖြန့်ချိသွားမယ်လို့သိရပါတယ်။မြန်မာနိုင်ငံရဲ့ ICTကဏ္ဍ ဖွံ့ဖြိုးရေးတိုးတက်ရေးအတွက် “NetCon2018 နှင့် ICTစာတမ်းများ”  အမည်နဲ့ စာအုပ်ထုတ်ဝေမယ့် စာအုပ်ကို ပထမအကြိမ်မှာ အုပ်ရေ(၃၀၀၀)ခန့် ထုတ်ဝေပေးသွားမှာဖြစ်ပါတယ်။

 

 

Related News