ဇွန်လ (၈)ရက် စနေနေ့မနက်ပိုင်းကထွက်ရှိခဲ့တဲ့ (၂၀၁၉)ခုနှစ် တက္ကသိုလ်ဝင်စာမေးပွဲရဲ့ အမှတ်စာရင်းတွေကို ဒီကနေ့ ဇွန်လ(၁၀)ရက်မှာ စတင်ထုတ်ပေးနေပြီဖြစ်ပါတယ်။(၂၀၁၉)ခုနှစ် တက္ကသိုလ်ဝင်စာမေးပွဲကို တစ်နိုင်ငံလုံးအတိုင်းအတာနဲ့ဖြေဆိုခဲ့ကြတဲ့ ကျောင်းသား/ကျောင်းသူတွေအနေနဲ့ ဒီကနေ့ဇွန်လ(၁၀)ရက်ကစတင်ပြီး လှိုင်တက္ကသိုလ်နယ်မြေ ပါရမီလမ်းမပေါ်မှာရှိတဲ့ အသစ်ပြောင်းရွေ့ဖွင့်လှစ်ခဲ့တဲ့ မြန်မာနိုင်ငံ စာစစ်ဦးစီးဌာန (ရန်ကုန်ဌာနခွဲ)မှာ ထုတ်ယူနိုင်ပြီဖြစ်ပါတယ်။ အမှတ်စာရင်းတွေကို စတင်ထုတ်ပေးတဲ့ ဒီကနေ့မှာတော့ မနက်(၆)နာရီခွဲကတည်းက လာရောက်ထုတ်ယူသူတွေရှိခဲ့တယ်လို့ သိရပါတယ်။ အမှတ်စာရင်းတွေကို မနက် (၈)နာရီမှ နေ့လည်(၂) နာရီအထိလျှောက်လွှာဖောင်တွေကို လက်ခံဆောင်ရွက်ထားတာဖြစ်ပြီး ရုံးချိန်အတွင်းလာရောက် ထုတ်ယူလို့ ရပေမယ့် အမှတ်စာရင်းထုတ်ယူသူ ဦးရေများပြားပါက လျှောက်လွှာဖောင်ကုန်တဲ့အထိ ထုတ်ပေးတယ်လို့လည်းသိရပါတယ်။အမှတ်စာရင်းထုတ်ယူရာမှာ တက္ကသိုလ်ဝင်စာမေးပွဲ အောင်မြင်တဲ့ကျောင်းသားကျောင်းသူတွေအပြင် ကျရှုံးတဲ့ကျောင်းသား ကျောင်းသူတွေကိုပါ အမှတ်စာရင်းထုတ်ပေးပြီး ကျောင်းသားကျောင်းသူကိုယ်တိုင်  ဒါမှမဟုတ် ကိုယ်စားလာရောက် ထုတ်ယူနိုင်တာဖြစ်ပါတယ်။

ထုတ်ယူရာမှာ မိမိဖြေဆိုခဲ့တဲ့ ခုံနံပါတ်နဲ့ မိမိ အမည်တို့ကို မှန်ကန်စွာလျှောက်လွှာဖောင်မှာ ရေးသားရမှာဖြစ်ပါတယ်။ခုံနံပါတ်တစ်ခုအတွက် လျှောက်လွှာဖောင်နဲ့ တံဆိပ်ခေါင်းဖိုး(၄၀၀)ကုန်ကျမှာဖြစ်ပြီး  တိုင်းဒေသကြီး၊ ပြည်နယ်အလိုက် အဖွဲ့လိုက် ထုတ်ယူနိုင်အောင်လည်း စီစဉ်ပေးထားတယ်လို့သိရပါတယ်။အမှတ်စာရင်းလာထုတ်သူတွေ အဆင်ပြေစေဖို့ ကောင်တာဆယ်ခုထားရှိပေးထားပြီး ပထမဆုံးရက်မှာတော့ လူတစ်သောင်း ကျော်လောက်ရှိခဲ့ပြီး အမှတ်စာရင်းအတွက် တန်းစီနေတဲ့ လူတန်းရှည်ကြီးကိုလည်း တွေ့ရ မှာပါ။ အမှတ်စာရင်း ထုတ်ယူတဲ့ အခါမှာ အဆောင်အသစ်ကိုပြောင်းရွေ့ဖွင့်လှစ်ခဲ့တာကြောင့် အရင်နှစ်တွေကထက် အမှတ်စာရင်းထုတ်ယူရတာ အဆင်ပြေမှုရှိတယ်လို့သိရပါတယ်။(၂၀၁၉) ခုနှစ် တက္ကသိုလ်ဝင်စာမေးပွဲအမှတ်စာရင်းတွေကို နေပြည်တော်ရှိ မြန်မာနိုင်ငံစာစစ်ဦးစီးဌာန ရုံးချုပ်နဲ့ ရန်ကုန်တိုင်း ဒေသကြီးတို့မှာ ထုတ်ပေးနေတာဖြစ်ပြီး ဝေးလံတဲ့ဒေသတွေမှ တက္ကသိုလ်ဝင်စာမေးပွဲဖြေဆို ထားသူတွေအတွက် ကိုတော့ စာစစ်ဦးစီးဌာနအနေနဲ့ ရွေ့လျားယာဉ်တွေနဲ့အတူ ဒီကနေ့ဇွန်လ(၁၀)ရက်ကစတင်ပြီး အမှတ်စာရင်းတွေလိုက်လံ ထုတ်ပေးနေပြီသိရပါတယ်။

 

 

Related News