ပျူမြို့ဟောင်းများ ကမ္ဘာ့အမွေအနှစ်စာရင်းဝင်တဲ့ (၅)နှစ်ပြည့် အထိမ်းအမှတ်အနေနဲ့ ပဲခူးတိုင်းဒေသကြီး ၊ ပြည်မြို့နယ်၊ သရေခေတ္တရာယဉ်ကျေးမှုနယ်မြေထဲက ကုန်းရိုးရွာမှာ စာသင်ကျောင်းဆောင်သစ်ဆောက်လုပ်လှူဒါန်းခဲ့တယ်လို့ သိရပါတယ်။ ကမ္ဘာ့အမွေအနှစ်စာရင်းဝင်ခဲ့တဲ့ သရေခေတ္တရာမြို့၊ ကုန်းရိုးရွာက ကလေးတွေ သက်တောင့်သက်သာ စာသင်ကြားနိုင်ဖို့ မြန်မာနိုင်ငံဆိုင်ရာ ဂုဏ်ထူးဆောင် ကောင်စစ်ဝန် မစ္စတာ နိရှိမူရာ တိုရှိအိုတို့မိသားစုက ကျောင်းဆောင်သစ်နဲ့အတူ ရေသန့်စက်တွေ၊ စက်ရေတွင်းတွေ တူးဖော်လှူဒါန်းခဲ့တာဖြစ်ပါတယ်။ ဂုဏ်ထူးဆောင်ကောင်စစ်ဝန်က အရင်ကတည်းက သရေခေတ္တရာ မြို့ပြကို လှူဒါန်းတာတွေ ဆောင်ရွက်ခဲ့တာဖြစ်ပြီး ယခုကျောင်းဆောင်သစ်လှူဒါန်းမှုက ပျူမြို့ဟောင်းများကမ္ဘာ့အမွေအနှစ်စာရင်းဝင်တဲ့ (၅)နှစ်ပြည့် အထိမ်းအမှတ်အတွက် လှူဒါန်းတာဖြစ်တယ်လို့သိရပါတယ်။ ယခုလှူဒါန်းမှုအတွက် မြန်မာ့ယဉ်ကျေးမှု အမွေအနှစ်များ ထိန်းသိမ်းစောင့်ရှောက်ရေး အဖွဲ့နဲ့ ပျူမြို့ဟောင်းများ ထိန်းသိမ်းစောင့်ရှောက်ရေးအဖွဲ့ကလည်း ပါဝင်ကူညီခဲ့တာဖြစ်ပါတယ်။ဘာသာပြန်- ကျောင်းလှူရတဲ့ အဓိက ရည်ရွယ်ချက်ကတော့ ဒီဒေသရဲ့ ပညာရေးလိုအပ်နေတဲ့ နေရာကို ကူညီပေးချင်လို့ပဲဖြစ်ပါတယ်။

ဒီနေရာက တမူထူးခြားပါတယ်။ ဒီက ယဉ်ကျေးမှုအဆောက်အဦတွေကို ကမ္ဘာ့အမွေအနှစ်အဖြစ် ယူနက်စကိုက သတ်မှတ်တာလည်း ငါးနှစ်ပြည့်ပြီလို့သိရပါတယ်။ဒါကြောင့် အထိမ်းအမှတ်တစ်ခုအဖြစ် ကျွန်တော်တို့ စာသင်ကျောင်းဆောင်အသစ် ဆောက်လုပ် လှူဒါန်းပေးခဲ့ပါတယ်။ ဒီဘက်က လူတွေ အကြံပေးလို့လည်း ကျွန်တော်တို့မိသားစု ကျောင်းအလှူကို ပထမဆုံးလှူဖြစ်တာပါ။ ကုန်းရိုးရွာ မူလွန်ကျောင်းမှာ ကုန်းရိုးရွာနဲ့ တွင်းဗြဲရွာက ကလေးတွေ ပညာသင်ကြားနေကြတာဖြစ်ပြီး ကျောင်းရဲ့ သက်တမ်းက နှစ် (၇၀) ကျော်နေပြီလို့သိရပါတယ်။ အရင်ကတည်းက ကျောင်းဆောင်နဲ့ ကလေးဦးရေ မမျှတာကြောင့်  ကြပ်ကြပ်တည်းတည်း စာသင်ခဲ့ရပြီး ယခုလိုစာသင်ဆောင်အသစ်ကို လှူဒါန်းခဲ့တာကြောင့် ကလေးတွေအတွက် ဝမ်းသာမိတယ်လို့ ဒေသခံတစ်ဦးကလည်း ပြောပါတယ်။ စာသင်ဆောင်အသစ်နဲ့အတူ ရေသန့်စက်တွေကို လှူဒါန်းခဲ့တာက ကျောင်းနဲ့အနီးနားရွာတွေက သောက်ရေသန့်သောက်ဖို့ ရည်ရွယ်လှူဒါန်းခဲ့တာဖြစ်ပြီး ကျပ်သိန်း ငါးရာကျော် ကုန်ကျခဲ့တယ်လို့သိရပါတယ်။ သရေခေတ္တရာဒေသမှာ ကမ္ဘာ့အမွေအနှစ်စာရင်းဝင်ပြီးကတည်းက ခရီးသွားဝင်ရောက်မှု မြင့်တက်ခဲ့ပေမယ့် ဒေသဖွံ့ဖြိုးရေးလုပ်ငန်းတွေ လိုအပ်လျက်ရှိနေပါသေးတယ်။

 

 

Related News