ရန်ကုန်ကွန်ပျူတာ တက္ကသိုလ်မှာ (၂၀၁၉)ခုနှစ် ပညာသင်နှစ်အတွက် ကျောင်းသား၊ကျောင်းသူဦးရေ (၅၀၀)ကို လက်ခံသင်ကြား ပေးသွားမှာဖြစ်တယ်လို့ ရန်ကုန်ကွန်ပျူတာတက္ကသိုလ် တာဝန်ရှိသူထံမှသိရပါတယ်။ရန်ကုန်တိုင်းဒေသကြီး ရွှေပြည်သာစက်မှုဇုန်အနီးမှာတည်ရှိတဲ့ ရန်ကုန်ကွန်ပျူတာ တက္ကသိုလ်မှာ (၂၀၁၉) ခုနှစ် ပညာသင်နှစ်အတွက်  ကျောင်းသား/ကျောင်းသူဦးရေ (၅၀၀) လက်ခံသွားမှာဖြစ်တယ်လို့သိရပါတယ်။(၂၀၁၉) ခုနှစ် တက္ကသိုလ်ဝင်ခွင့်စာမေးပွဲမှာ အောင်မြင်ခဲ့ကြတဲ့ ကျောင်းသား/ကျောင်းသူတွေကို ဇွန်လ(၂၄)ရက်မှာ တက္ကသိုလ်ဝင်ခွင့် လျှောက်လွှာဖောင်တွေကို သက်ဆိုင်ရာစာစစ်ဌာနအသီးသီးမှာ ထုတ်ပေးနေတာဖြစ်ပြီး စထုတ်ပေးတဲ့နေ့ကတည်းက သက်ဆိုင်ရာတက္ကသိုလ်အသီးသီးမှာ လျှောက်လွှာဖောင်တွေကို လက်ခံပေးနေတာ ဖြစ်ပါတယ်။ရန်ကုန်ကွန်ပျူတာတက္ကသိုလ်မှာတော့ တက္ကသိုလ်ဝင်ခွင့်လျှောက်လွှာဖောင်စတင်ထုတ်ပေးတဲ့ နေ့ကတည်းက လာရောက်လျှောက်ထားတဲ့ ကျောင်းသား/ကျောင်းသူတွေရှိသလို လာရောက်စုံစမ်းတဲ့ ကျောင်းသား/ကျောင်းသူတွေလည်းရှိတယ်လို့ ရန်ကုန်ကွန်ပျူတာ တက္ကသိုလ်မှ တာဝန်ရှိသူကပြောပါတယ်။

(၂၀၁၉) ခုနှစ်ပညာသင်နှစ်အတွက် ရန်ကုန်ကွန်ပျူတာလာရောက်လျှောက်ထားမယ့် ကျောင်းသား/ကျောင်းသူတွေအနေနဲ့  (၂၀၁၉) ခုနှစ် တက္ကသိုလ်ဝင်စာမေးပွဲမှာ  သချာင်္၊ ဓာတုဗေဒ၊ ရူပဗေဒ ဘာသာရပ်တွေနဲ့အောင်မြင်ပြီး  စုစုပေါင်း ရမှတ် (၄၅၀) နှင့် အထက်ရရှိသူ ၊ အင်္ဂလိပ်စာနှင့် သချာင်္ဘာသာရပ် (၂)ဘာသာပေါင်း ရမှတ်(၁၄၀)နဲ့အထက်ရရှိသူတွေက လျှောက်ထားနိုင်တယ်လို့ သိရပါတယ်။ဝင်ခွင့်လျှောက်ထားလိုတဲ့ ကျောင်းသား/ကျောင်းသူတွေအနေနဲ့ ရန်ကုန်ကွန်ပျူတာတက္ကသိုလ်ကို တိုက်ရိုက်လာရောက်လျှောက်ထားရမှာဖြစ်ပါတယ်။ရန်ကုန်ကွန်ပျူတာတက္ကသိုလ်မှာ သင်တန်းကာလ (၅) နှစ်ကြာမြင့်တာဖြစ်ပြီး အထူးပြုဘာသာရပ်အလိုက် အောင်မြင်တဲ့ကျောင်းသား/သူတွေကို ကွန်ပျူတာဆိုင်ရာ ဘွဲ့များဖြစ်တဲ့ ကွန်ပျူတာသိပ္ပံဘွဲ့(ပရိုဂရမ် အင်ဂျင်နီယာ)၊ကွန်ပျူတာသိပ္ပံဘွဲ့ (အသိပညာ အင်ဂျင်နီယာ)၊ကွန်ပျူတာ သိပ္ပံဘွဲ့ (စီးပွားရေး သတင်းအချက်အလက်စနစ်)၊ကွန်ပျူတာ သိပ္ပံဘွဲ့(ကွန်ပျူတာ လုံခြုံရေးနှင့် သက်သေအထောက်အထားရှာဖွေ စစ်ဆေးမှုပညာ) ၊ ကွန်ပျူတာ နည်းပညာဘွဲ့ (မြှုပ်နှံထိန်းချုပ်စနစ် )နဲ့ ကွန်ပျူတာ နည်းပညာဘွဲ့(ဆက်သွယ်ရေးနှင့်ကွန်ရက်ပညာ)စတဲ့ သက်ဆိုင်ရာဘွဲ့ အသီးသီးကိုချီးမြှင့်ပေးသွားမှာဖြစ်ပါတယ်။ရန်ကုန်ကွန်ပျူတာ တက္ကသိုလ်အတွက် တက္ကသိုလ်ဝင်ခွင့်လျှောက်လွှာဖောင်တွေကို ဇွန်လ(၂၃)ရက်မှ ဇူလိုင်လ(၂၃)ရက်ထိ လာရောက်လျှောက်ထားနိုင်တယ်လို့သိရပါတယ်။

 

 

Related News