မြန်မာနိုင်ငံသဘင်အစည်းအရုံးမှ သဘင်ပညာရပ်ပိုင်းဆိုင်ရာ အခမဲ့သင်တန်းကို ပထမဦးဆုံးအကြိမ်ကမ္ဘေဇရိပ်သာ ချင်းချောင်းနန်းတော်မှာ ဖွင့်လှစ်လိုက်ပါတယ်။မြန်မာနိုင်ငံသဘင်အစည်းအရုံး(ဗဟို) အနေနဲ့ သဘင်ပညာရပ်များ ထိန်းသိမ်းမြှင့်တင်ပြန့်ပွားရေးအတွက် ဆောင်ရွက်သွားဖို့ရှိနေ ပြီး ပညာရပ်ဆိုင်ရာ ထိန်းသိမ်းမြှင့်တင် ပြန့်ပွားရေးကော်မတီအသီးသီးကိုလည်း ဖွဲ့စည်းထားပြီး  ဖြစ်ပါတယ်။ အခုဆိုရင် သဘင်ပညာရပ်ပိုင်းဆိုင်ရာ အခမဲ့သင်တန်း အပတ်စဉ်(၁/၂၀၁၈)ကို ပထမဦးဆုံးအကြိမ် ဖွင့်လှစ်နိုင်ခဲ့သလို နောက်ပိုင်းတွေမှာလည်း သင်တန်းကျောင်းနဲ့ ပုဂ္ဂလိကသဘင်တက္ကသိုလ်ထိ ဖွင့်လှစ်နိုင်အောင် ဆောင်ရွက်မှာ ဖြစ်တယ်လို့ မြန်မာနိုင်ငံသဘင်အစည်းအရုံး(ဗဟို) ဥက္ကဋ္ဌ ဦးဖိုးချစ်က ပြောပါတယ်။

သဘင်ပညာရပ်ပိုင်းဆိုင်ရာ အခမဲ့သင်တန်း အပတ်စဉ်(၁/၂၀၁၈)ဟာ ပုဂ္ဂလိကသဘင်တက္ကသိုလ်ဖွင့်လှစ်နိုင်ဖို့အတွက် ပထမဦးဆုံးခြေလှမ်း ဖြစ်ပါတယ်။ သင်တန်းကိုတော့ ကျောင်းသားကျောင်းသူ (၆၀)နီးပါးတက်ရောက်နေပြီး ရန်ကုန်တိုင်းဒေသကြီးနဲ့အခြားသော ပြည်နယ်နဲ့ တိုင်းဒေသကြီးတွေက တက်ရောက်သူတွေများတယ်လို့ သိရပါတယ်။သဘင်ပညာရပ်ပိုင်းဆိုင်ရာ အခမဲ့သင်တန်း ကို အမျိုးသားယဉ်ကျေးမှုနှင့် အနုပညာတက္ကသိုလ်(ရန်ကုန်)နဲ့ အမျိုးသားယဉ်ကျေးမှုနှင့် အနုပညာတက္ကသိုလ် (မန္တလေး) တို့မှာ အငြိမ်းစား ဆရာ၊ ဆရာမများနဲ့ သဘင်ပညာသည် ပညာရှင်ကြီးတွေက သဘင်ပညာရပ်တွေဖြစ်တဲ့ ဇာတ်သဘင်၊ ဆိုင်း၊ အငြိမ့်၊ ရုပ်သေး၊ ရာမယဏ၊ မျက်လှည့် နဲ့ အခြေခံအကပညာရပ်တွေကို သင်ကြားပေးသွားမှာ ဖြစ်ပါတယ်။

သဘင်ပညာရပ်ပိုင်းဆိုင်ရာ အခမဲ့သင်တန်းကိုတော့ ဇွန်၊ ဇူလိုင်နှစ်လသင်ကြားမှာ ဖြစ်ပြီး အပတ်စဉ် စနေနဲ့ တနင်္ဂနွေနေ့တွေမှာ သင်ကြားပေးသွားမှာ ဖြစ်ပါတယ်။ သင်တန်းသင်ကြားမှု ပြီးစီးချိန်မှာလည်း သင်တန်းဆင်း လက်မှတ်တွေ ပေးအပ်သွားမှာ ဖြစ်တယ်လို့ သိရပါတယ်။

 

 

Related News