အပြည်ပြည်ဆိုင်ရာအမျိုးသမီးများနေ့သမိုင်းကို အများပြည်သူသိရှိပြီး ကိုယ်တိုင်ကိုယ်ကျပါဝင်လို့ရအောင် မတ်လ ၉ ရက်က မဟာဗန္ဓုလပန်းခြံမှာ ပြုလုပ်ခဲ့ပါတယ်။အပြည်ပြည်ဆိုင်ရာအမျိုးသမီးနေ့အတွက် ရည်ရွယ်ကျင်းပတဲ့ပွဲမှာ အများပြည်သူပါဝင်ဆင်နွှဲနိုင်အောင် ရုံးပိတ်ရက် စနေနေ့ကို ရွေးချယ်ပြီး မဟာဗန္ဓုလပန်းခြံမှာ ကျင်းပခဲ့ပါတယ်။ ဒီပွဲမှာ ဖျော်ဖြေရေးအစီအစဉ်တွေ၊ပြဇာတ်တွေအပြင် ဥာဏ်စမ်းမေးခွန်းမေးတာတွေနဲ့လူထုအသိ ပညာပေး ပြခန်း၊ ဆိုင်းဘုတ်တွေ ပြသထားပါတယ်။ ဒီပွဲရဲ့ ရည်ရွယ်ချက်ကတော့ နေ့စဉ်လူမှုဘဝမှာ လှုပ်ရှားနေတဲ့  အမျိုးသမီးတွေရဲ့ စွမ်းဆောင်ရည်ကို အသိအမှတ်ပြုပြီး ကျား၊မတန်းတူညီမျှမှုမရှိတဲ့ ကဏ္ဍတွေကို ပြည်သူအများသိရှိအောင် ဆောင်ရွက်တာပဲ ဖြစ်ပါတယ်။

လေ့လာတွေ့ရှိချက်တွေအရ မြန်မာအမျိုးသမီးတွေက တန်းတူညီမျှအခွင့်အရေးရနေတယ်လို့ သတ်မှတ်ကြပေမယ့် လက်တွေ့မှာ အမျိုးသမီးတွေက ခေါင်းဆောင်မှုပိုင်းနေရာတွေမှာ ပါဝင်ဖို့ အခက်အခဲတွေ ရှိနေဆဲလို့ သိရပါတယ်။ လွှတ်တော်မှာ အမျိုးသမီးပါဝင်မှုနှုန်း ၁၀ ရာခိုင်နှုန်းပဲရှိသေးသလို မြန်မာတစ်နိုင်ငံလုံးမှာ မြို့နယ်ပေါင်း (၃၃၀)ရှိပြီး ဒီထဲမှာ မြို့နယ်အုပ်ချုပ်ရေးမှူး အမျိုးသမီးတစ်ဦးတည်းရှိသေး ကြောင်း သိရပါတယ်။ ဒါကြောင့် ကဏ္ဍပေါင်းစုံမှာ အမျိုးသမီးတွေ တန်းတူညီမျှပါဝင်ဖို့ အခွင့်အရေးပေးသင့်တယ်ဆိုတာကို ယခုပွဲမှာ ထုတ်ဖော်ပြောကြားတာဖြစ်ပါတယ်။အပြည်ပြည်ဆိုင်ရာအမျိုးသမီးများနေ့ အထိမ်းအမှတ် ဂုဏ်ပြုအခမ်းအနားကို ပြည်တွင်းက အဖွဲ့အစည်း လေးဆယ်ကျော် စုပေါင်းပြီး ပြုလုပ်ခဲ့တာဖြစ်ပြီး လူမှုရေးဝန်ကြီး ဦးနိုင်ငံလင်း တက်ရောက်အမှာစကားပြောကြားခဲ့ပါတယ်။ လူမှုရေးအဖွဲ့စည်းတွေ စုစည်းပြုလုပ်တဲ့ အမျိုးသမီးများနေ့ အခမ်းအနားကို ၂၀၁၀ပြည့်နှစ်က စတင်ပြုလုပ်ခဲ့တယ်လို့ သိရပါတယ်။

 

 

Related News