အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ လူမှုဖူလုံရေးအဖွဲ့အနေနဲ့ လူမှုဖူလုံရေးစီမံကိန်း ကျန်းမာရေးစောင့်ရှောက်မှု အဆင့်မြှင့်တင်ပြောင်းလဲခြင်း ဆွေးနွေးပွဲကို ဧပြီလ(၂၃)ရက်က မြောက်ဥက္ကလာပစက်မှုဇုန် စီမံခန့်ခွဲမှုကော်မတီအစည်းအဝေးခန်းမ မှာပြုလုပ်ခဲ့ပါတယ်။အလုပ်သမား၊လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ လူမှုဖူလုံရေးအဖွဲ့အနေနဲ့ လူမှုဖူလုံရေးအာမခံ အလုပ်သမားတွေ ရုံးချိန်ပြင်ပ ကျန်းမာရေး စောင့်ရှောက်မှုအတွက် ပြင်ပလူနာဝန်ဆောင်မှုကို ပုဂ္ဂလိက ဆေးရုံ၊ဆေးခန်း တွေနဲ့ပူးပေါင်းပြီး ပြုလုပ်နေတယ်လို့ သိရပါတယ်။ လူမှုဖူလုံရေးအာမခံအလုပ်သမားတွေ  ရုံးချိန်ပြင်ပ ကျန်းမာရေးစောင့်ရှောက်မှုအတွက် ပြင်ပလူနာဝန်ဆောင်မှုကို မြောက်ဥက္ကလာပမြို့နယ်ရှိ OSC ဆေးရုံနဲ့ ချိတ်ဆက်ပြီး လူမှုဖူလုံရေး-OSC  အထွေထွေရောဂါကု ဆေးခန်းဖွင့်လှစ်သွားမယ်လို့ လူမှုဖူလုံရေးအဖွဲ့နေပြည်တော်ဆေးဌာနမှ ညွှန်ကြားရေးမှူး ဒေါက်တာခင်နွဲ့ဌေးက ပြောပါတယ်။

လူမှုဖူလုံရေး အာမခံအလုပ်သမားတွေ ရုံးချိန်ပြင်ပ ကျန်းမာရေးစောင့်ရှောက်မှုအတွက် ပုဂ္ဂလိကဆေးရုံတွေနဲ့ ပူးပေါင်းဆောင်ရွက်ရတာက အာမခံအလုပ်သမားတွေအနေနဲ့ ပြင်ပလူနာဆေးကုသမှုတွေမှာ သတ်မှတ်ထားတဲ့ မြို့နယ်တွေအတွင်း ကျန်းမာရေးစောင့်ရှောက်မှုတွေကို ယခင်ကထက် အလွယ်တကူ လက်လှမ်းမီ ကုသနိုင်စေဖို့အတွက် ရည်ရွယ်ပြုလုပ်တာဖြစ်တယ်လို့ သိရပါတယ်။ ဒါ့အပြင် လူမှုဖူလုံရေးအာမခံအလုပ်သမားတွေ ကျန်းမာရေးစောင့်ရှောက်မှု ပြင်ပလူနာဝန်ဆောင်မှုကို နေပြည်တော်၊ မြစ်ကြီးနား ၊ တောင်ကြီး၊ မြိတ်မြို့နဲ့ မန္တလေးတိုင်းဒေသကြီး တို့မှာ လက်ရှိဆောင်ရွက်ပေးနေပြီလို့ သိရပါတယ်။လူမှုဖူလုံရေးအာမခံအလုပ်သမားတွေရဲ့ ကျန်းမာရေးစောင့်ရှောက်မှုကို အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ လူမှုဖူလုံရေးအဖွဲ့အနေနဲ့ အဖွဲ့ပိုင်ဆေးရုံကြီး (၃)ရုံ၊ မြို့နယ်ဆေးခန်း (၉၆) ခန်း၊ ဌာနကြီးဆေးခန်း (၅၅) ခန်း၊ကဲဝဲလ်ဆေးခန်း (၄) ခန်း၊ တိုင်းရင်းဆေးကုခန်း (၁) ခန်းနဲ့ ရွေ့လျားဆေးကုသယာဉ် (၂) စီးတို့နဲ့ ၀န်ဆောင်မှုပေးနေတယ်လို့သိရပါတယ်။

 

 

Related News