တနင်္သာရီတိုင်းဒေသကြီး ထားဝယ်မြို့မှာ ဖြစ်ပွားခဲ့တဲ့ ကြက်ငှက်တုပ်ကွေးရောဂါ  (H5N1)ကို သြဂုတ်လ(၃)ရက်ကစလို့ ထိန်းချုပ်နိုင်ပြီလို့ သိရပေမယ့် အရေးပေါ်ထိန်းချုပ်ရေးစီမံချက်အရ နောက်ထပ်(၂၁)ရက် စောင့်ကြည့်မယ်လို့ သိရပါတယ်။ တနင်္သာရီတိုင်းဒေသကြီး ထားဝယ်မြို့နယ်မှာရှိတဲ့ ကြက်ခြံတွေမှာ ဇူလိုင်လ(၂၆)ရက်ကစပြီး ကြက်ငှက်တုပ်ကွေးရောဂါ (H5N1)ဖြစ်ပွားနေတယ်လို့ သတင်းထုတ်ပြန်ခဲ့တာဖြစ်ပါတယ်။ 
 
ရောဂါတွေ့ရှိတဲ့ကြက်ခြံတွေမှ ကြက်အသေကောင်တွေကို ဓာတ်ခွဲစစ်ဆေးကာ သုတ်သင်ရှင်းလင်းမှု တွေ ပြုလုပ်ခဲ့ရာ သြဂုတ်လ(၉)ရက်အထိ ကြက်အကောင်ရေ(၂)သောင်း (၅)ထောင်ကျော်ကို သုတ်သင်ရှင်းလင်းခဲ့တယ်လို့ သိရပါတယ်။ ရောဂါဖြစ်ပွားမှုကို လျင်မြန်စွာ ထိန်းချုပ်နိုင်ဖို့အတွက် ရောဂါဖြစ်ပွားတဲ့ ကြက်ခြံတွေရဲ့ ၁ ကီလိုမီတာပတ်ဝန်းကျင်ကို ရောဂါကူးစက်ဧရိယာ၊ ကြက်ခြံရဲ့ ၅ ကီလိုမီတာပတ်ဝန်းကျင်ကို ကန့်သတ်ဧရိယာ၊ ကြက်ခြံရဲ့ ၁၀ ကီလိုမီတာပတ်ဝန်းကျင်ကို ထိန်းချုပ်ဧရိယာအဖြစ် သတ်မှတ်ကာထိန်းချုပ်မှုတွေ ပြုလုပ်ခဲ့တယ်လို့ သိရပါတယ်။ကြက်ငှက်တုပ်ကွေးရောဂါ (H5N1)စတင်ဖြစ်ပွားတဲ့အချိန်ကစလို့ ထားဝယ်မြို့နယ်အတွင်းက ဈေးတွေမှာ ကြက်ဥနှင့်ကြက်သားရောင်းချမှုတွေကို ပိတ်ပင်ထားပြီး စာသင်ကျောင်းတွေကိုလည်း ပိတ်ထားတယ်လို့ သိရပါတယ်။
 
ရောဂါစတင်ထိန်းချုပ်နိုင်တဲ့ သြဂုတ်လ(၃)ရက်နောက်ပိုင်းမှာတော့ စာသင်ကျောင်းတွေကို ပြန်လည်ဖွင့်လှစ်ခဲ့ပြီး ကြက်ဥကြက်သားရောင်းချမှုကိုတော့ အရေးပေါ် ထိန်းချုပ်ရေးစီမံချက်အရ နောက်ထပ်(၂၁)ရက်စောင့်ကြည့်ကာ သြဂုတ်လ(၂၄)ရက်အထိ အရောင်းပိတ်ထားမှာ ဖြစ်တယ်လို့ သိရပါတယ်။ကြက်ငှက်တုပ်ကွေးရောဂါ(H5N1) ဟာ Virus  ကြောင့် ဖြစ်တဲ့ရောဂါဖြစ်လို့ ရာသီမရွေး ဖြစ်နိုင်တာကြောင့်ပြည်သူတွေအနေနဲ့ မွေးမြူရေးနှင့်ကုသရေးဦးစီးဌာနရဲ့ ညွှန်ကြားချက်အတိုင်း လိုက်နာဆောင်ရွက်မှုတွေ ပြုလုပ်ပြီး ကြက်ခြံတွေမှာလည်း ဇီဝလုံခြုံမှုအတိုင်း ဆောင်ရွက်ပေးစေ လိုတယ်လို့ သိရပါတယ်။
 
ယခုလိုရောဂါထိန်းချုပ်မှုတွေ ပြုလုပ်နိုင်တာဟာလည်း မွေးမြူရေးနှင့် ကုသရေးဦစီးဌာနအပြင် ဒေသအာဏာပိုင်တွေ၊ ဒေသခံတွေနဲ့ တိုင်းဒေသကြီးအစိုးရအဖွဲ့တွေရဲ့ ပူးပေါင်းပါဝင်မှုကြောင့် ထိန်းချုပ်နိုင်တာဖြစ်တယ်လို့ သိရပါတယ်။
 
 
 

Related News