ရာသီတုပ်ကွေးရောဂါ Seasonal Influenza A (H1N1) pdm 09  စောင့်ကြပ်ကြည့်ရှုခြင်း လုပ်ငန်းများ ဆောင်ရွက်လျက်ရှိရာ  သြဂုတ်လ(၉)ရက် မွန်းလွဲ (၂)နာရီမှ (၁၀)ရက်နေ့ မွန်းလွဲ ၂ နာရီအထိ  သံသယလူနာ (၃၆)ဦးကို ဓာတ်ခွဲခန်း စမ်းသပ်စစ်ဆေးခဲ့ရာ လူနာ (၁၁)ဦးတွင် (H1N1)ပိုး တွေ့ရှိပြီး ဇူလိုင်လ (၂၁)ရက်မှ သြဂုတ်လ(၁၀)ရက် မွန်းလွဲပိုင်းအထိ လတ်တလော ပြင်းထန် အသက်ရှူလမ်းကြောင်းရောဂါနဲ့ ဆေးရုံတက်ရောက်ကုသသူ စုစုပေါင်းလူနာ (၅၁၀)ဦးအနက် H1N1 ပိုးတွေ့လူနာ (၁၉၄)ဦးရှိခဲ့ပြီး တစ်နိုင်လုံးမှာ သြဂုတ်လ (၁၀)ရက် အထိ သေဆုံးသူ စုစုပေါင်း (၂၀)ရှိပြီဖြစ်ပါတယ်။
 
သြဂုတ်လ ၁၀ ရက်နေ့ မွန်းလွဲ(၂)နာရီအထိ အထူးကုဆေးရုံကြီး ဝေဘာဂီမှာ H1N1  ပိုးတွေ့ အတွင်းလူနာ (၈)ဦး ၊ အခြားတိုင်းဒေသကြီး ပြည်နယ်ဆေးရုံကြီးများမှာH1N1 ပိုးတွေ့ အတွင်းလူနာ (၅၈)ဦး စုစုပေါင်း (၆၆)ဦးက ဆေးကုသမှု ခံယူလျက်ရှိပြီး  အများစုမှာ သက်သာ လျက်ရှိနေတယ်လို့ သိရပါတယ်။ H1N1 ပိုး တွေ့ရှိသော်လည်း ရာသီတုပ်ကွေး ရောဂါရဲ့ နောက်ဆက်တွဲ ဆိုးကျိုးကြောင့် သေဆုံးခြင်းမဟုတ်ဘဲ အခြားရောဂါအခံများကြောင့် သေဆုံးသူ စုစုပေါင်း (၁၅)ဦးရှိတယ်လို့ ကျန်းမာရေးနှင့်အားကစားဝန်ကြီးဌာနက ရာသီတုပ်ကွေး ရောဂါ ဖြစ်ပွားမှုနှင့်ပတ်သက်ပြီး သတင်းထုတ်ပြန်ချက်အမှတ်စဉ် ၁၈ အရ သိရပါတယ်။
 
ရန်ကုန်တိုင်းဒေသကြီးအတွင်းရှိ အဝေးပြေးယာဉ်များ၊ ဘတ်စ်ကားများ၊ မီးရထားများ၊ သင်္ဘောများစသည်တို့မှာ ရာသီတုပ်ကွေးရောဂါနဲ့ ပတ်သက်တဲ့ ကျန်းမာရေးပညာပေး စတေကာများ ကပ်ခြင်း၊ လူအများ မြင်သာတဲ့နေရာတွေမှာ ဗီနိုင်းများ ထောင်ခြင်းနဲ့ ပညာပေးအစီအစဉ်များကို ကျန်းမာရေးနှင့် အားကစားဝန်ကြီးဌာနအနေနဲ့ ကျန်းမာရေးပညာပေးလုပ်ငန်းများကို တိုးမြှင့်ဆောင်ရွက် လျက်ရှိပါတယ်။ ကျန်းမာရေးနှင့် အားကစားဝန်ကြီးဌာနရဲ့ ထုတ်ပြန်ချက်အရ ခုခံကျ ကာလသားရောဂါ၊ ကျောက်ကပ်ရောဂါ၊ ပြင်းထန်အဆုတ်တီဘီရောဂါ၊ ဆီးချို၊ သွေးချိုစတဲ့ အခြားရောဂါအခံရှိသောသူများနဲ့ ရာသီတုပ်ကွေးရောဂါ ပြင်းထန်စွာ ခံစားရနိုင်သော အသက်အရွယ်ကြီးသူများ၊ ကလေးငယ်များ၊ ကိုယ်ဝန်ဆောင်မိခင်များအနေနဲ့ လတ်တလော ပြင်းထန်အဆုတ်ရောင်ရောဂါ လက္ခဏာများခံစားရပါက နီးစပ်ရာကျန်းမာရေးဌာနနှင့် ဆေးရုံ ဆေးခန်းများကို အမြန်ဆုံးသွားရောက်ပြီး အချိန်မီထိရောက်စွာ ကုသမှုခံယူသင့်တယ်လို့ တိုက်တွန်း ထားပါတယ်။ 
 
 
 

Related News