ရင်သားကင်ဆာကို စောစီးစွာ စစ်ဆေးသိရှိဖို့ ရင်သားကို လစဉ်ပုံမှန်ကိုယ်တွယ် စစ်ဆေးတဲ့ နည်းလမ်းတွေကို မြန်မာနိုင်ငံ ဓါတ်ရောင်ခြည်ဆိုင်ရာ ကင်ဆာဆေးပညာရှင်များ အဖွဲ့က အောက်တိုဘာလ ၂၇ ရက်က ရန်ကုန်ပြည်သူ့ဆေးရုံကြီး၊ ဓါတ်ရောင်ခြည်ကင်ဆာဌာနမှာ လက်တွေ့သရုပ်ပြတာနဲ့ ဟောပြောတာတွေ ပြုလုပ်ခဲ့ပါတယ်။
 
ရင်သားကင်ဆာကို စောစီးစွာသိရှိပြီး ကုသနိုင်ရင် အသက်ရှင်နိုင်ခြေ ၉၀ ရာခိုင်နှုန်း အထိရှိတာကြောင့် အမျိုးသမီးတွေအနေနဲ့ မိမိရင်သားကို လစဉ်ပုံမှန်စစ်ဆေးရန်လိုအပ်တယ်လို့ သိရပါတယ်။ ဒီနေ့ပြုလုပ်တဲ့ လူထုကျန်းမာရေး အသိပညာပေးပွဲမှာတော့ ရင်သားနမူနာတွေကို အသုံးပြုပြီး ပွဲတက်ရောက်လာတဲ့ အမျိုးသမီးတွေကို စမ်းသပ်ကိုင်တွယ်နည်းသင်ပြခဲ့ပါတယ်။ ရင်သားကိုလစဉ် ကိုင်တွယ်စစ်ဆေးမှ ရင်သားမှာပြောင်းလဲနေတဲ့ သံသယဖြစ်ဖွယ် လက်္ခဏာတွေ တွေ့ရှိပြီး အချိန်မီကုသမှုခံယူနိုင်မှာ ဖြစ်ပါတယ်။
 
ရင်သားကင်ဆာက အဆီစားသုံးမှုများပြီး အ၀လွန်တာ ၊ သန္ဓေတားဆေး ပုံမှန်သောက် သုံးတာနဲ့ မျိုးရိုးလိုက်တာတွေကြောင့် ဖြစ်ပွားနိုင်ပါတယ်။ ဒါပေမဲ့ အမျိုးသမီးတိုင်းဖြစ်ပွားနိုင်တဲ့ ရောဂါဖြစ်တာကြောင့် ရင်သားမှာ အလုံးအကျိတ်နဲ့အရေပြားပြောင်းလဲမှုရှိလားဆိုတာကို ပုံမှန် စစ်ဆေးပြီး စောစီးစွာသိရှိဖို့က အရေးကြီးဆုံးဖြစ်တယ်လို့ သိရပါတယ်။
 
ရင်သားကင်ဆာ ရောဂါဖြစ်နေကြောင်း သံသယရှိရင် အဆင့်ငါးဆင့်နဲ့ ရောဂါရှာဖွေ အတည်ပြုရမှာဖြစ်ပြီး ရင်သားကင်ဆာဖြစ်ပေါ်တဲ့ပုံစံ၊ အကျိတ်ပမာဏနဲ့ ပျံ့နှံ့မှုအနေအထားပေါ်မူတည်ပြီး ကုသနည်း ရွေးချယ်ရမှာဖြစ်ပါတယ်။ ကမ္ဘာ့ကျန်းမာရေးအဖွဲ့က အောက်တိုဘာလကို ရင်သားကင်ဆာနဲ့ ပတ်သက်ပြီး အသိပညာပေးကာလအဖြစ် သတ်မှတ်ထားပြီး မြန်မာနိုင်ငံ ဓါတ်ရောင်ခြည်ဆိုင်ရာ ကင်ဆာ ဆေးပညာရှင်များ အဖွဲ့က ဒီလိုရင်သားပုံမှန်စစ်ဆေးအသိပညာပေးတာကို နှစ်ကြိမ်ပြုလုပ်ပြီး ဖြစ်ပါတယ်။ ရန်ကုန်ပြည်သူ့ဆေးရုံကြီးမှာ ကင်ဆာရောဂါကြောင့် ဆေးရုံတက်ရောက်ကုသသူတဲ့ လူနာဦးရေ နှစ်စဉ် ၉၀၀၀ ဦးရှိပြီး ရင်သားကင်ဆာ လူနာဦးရေက ၂၀၁၅ ခုနှစ်နဲ့ ၂၀၁၆ ခုနှစ်မှာ မြင့်တက်လာခဲ့တယ်လို့ သိရပါတယ်။
 
 

Related News