ဂျပန်ဦးနှောက်ရောင် ကာကွယ်ဆေးထိုးနှံတာကို ကျောင်းပိတ်ရက် စနေ၊ တနင်္ဂနွေမှာ ခေတ်္တရပ်နားထားပေမယ့် နိုဝင်ဘာလ ၂၀ ရက် ကစပြီး ဆက်လက်ထိုးနှံပေးနေပြီဖြစ်ပါတယ်။ 
 
ကျောင်းအခြေပြု ဂျပန်ဦးနှောက်ရောင်ကာကွယ်ဆေးထိုးလုပ်ငန်းကို ကျောင်းပိတ်ရက်တွေမှာ ရပ်နားထားပေမဲ့ နိုဝင်ဘာလ ၂၀ ရက်ကစပြီး တစ်နိုင်ငံလုံးက စာသင်ကျောင်းတွေမှာ ဆက်လက်ထိုးနှံပေးနေပြီ ဖြစ်တယ်လို့သိရပါတယ်။ အလုံမြို့နယ် ပြည်သူ့ကျန်းမာရေး ဦးစီးဌာန ကတော့  အမှတ်(၆) အခြေခံပညာ အထက်တန်းကျောင်းရှိ သူငယ်တန်းကနေ န၀မတန်း ကျောင်းသား စုစုပေါင်း အယောက်(၉၀၀)ကျော်ကို ကာကွယ်ဆေးထိုးစုရပ် လေးခုခွဲပြီး ဂျပန်ဦးနှောက်ရောင်ကာကွယ်ဆေး ဆက်လက်ထိုးနှံပေးနေပါတယ်။ 
 
အမှတ်(၂)ပင်လောင်းမြို့နယ် အထက်တန်းကျောင်းမှ သတ္တမတန်း ကျောင်းသူတစ်ဦး ဂျပန်ဦးနှောက်ရောင် ကာကွယ်ဆေးထိုးနှံခဲ့ပြီး နိုဝင်ဘာလ (၁၆)ရက်ည ခုနစ်နာရီ တစ်ဆယ့် ငါးမိနစ်မှာ သေဆုံးခဲ့တာကြောင့် ကာကွယ်ဆေး နဲ့ ဆက်စပ်မှု ရှိ၊ မရှိကို နေပြည်တော် ပြည်သူ့ကျန်းမာရေးဦးစီးဌာနက စုံစမ်းစစ်ဆေးနေဆဲဖြစ်ပါတယ်။ အဲ့ဒီသတင်းကြောင့် ကျောင်းသား မိဘအများစုက ဂျပန်ဦးနှောက်ရောင် ကာကွယ်ဆေးထိုးနှံပေးတာကို စိုးရိမ်ပူပန်မှုတွေ ရှိတယ်လို့ ပြောကြပါတယ်။
 
ဒါပေမဲ့ ကာကွယ်ဆေး ဓာတ်မတည့်တာက ကာကွယ်ဆေးထိုးနှံသူ လူဦးရေတစ်သန်းမှာ တစ်ယောက်သာ ဖြစ်တတ်တယ်လို့ သိရှိထားတာကြောင့် စာသင်ကျောင်း တွေက ဆေးထိုးစုရပ်တွေကို မိဘတွေကိုယ်တိုင် လာရောက်ထိုးနှံပေးတာ တွေ့ရပါတယ်။ 
 
ဂျပန်ဦးနှောက်ရောင် ကာကွယ်ဆေး ထိုးနှံတဲ့ လုပ်ငန်းစဉ်မှာ ပထမဆုံးအနေနဲ့ ကလေးတွေကို စမ်းသပ် စစ်ဆေးပြီး ကိုယ်အပူချိန်ရှိနေရင်၊ ဒါမှမဟုတ် အဆုတ်ပွနေတာနဲ့ယားနာတွေရှိနေရင် ကာကွယ်ဆေးထိုးဖို့ ရက်ရွှေ့ဆိုင်းပေးတယ်လို့သိရပါတယ်။ ကာကွယ်ဆေးထိုးနှံပြီးရင်လည်း ကျောင်းသားတွေကို နာရီဝက် စောင့်ကြည့်ပြီးမှ စာသင်ခန်းတွေကို ပြန်လွှတ်ပေးတာဖြစ်ပါတယ်။
 
တိုင်းကျန်းမာရေးဦးစီးဌာနကလည်း အဖွဲ့ခေါင်းဆောင်ဆရာဝန်တွေကို မြို့နယ်အလိုက် စာသင်ကျောင်းတွေမှာ စေလွှတ်ထားပြီး ကာကွယ်ဆေးထိုးနှံတဲ့ လုပ်ငန်းစဉ်တစ်ခုလုံးကို စောင့်ကြပ်ကြည့်ရှုခိုင်းထားတယ်လို့ပြောပါတယ်။
 
ကာကွယ်ဆေးထိုး လုပ်ငန်းစတင်ခဲ့တဲ့ နိုဝင်ဘာလ ၁၅ ရက်ကနေ ၁၇ ရက်အတွင်း တစ်နိုင်ငံလုံးက ကျောင်းနေကလေး ငါးသန်းကျော်ကို ကာကွယ်ဆေးထိုးနှံပေးပြီးဖြစ်တယ်လို့ နေပြည်တော်၊ ပြည်သူ့ကျန်းမာရေးဦးစီးဌာနမှ သိရပါတယ်။
 
 

Related News