ရပ်ရွာအခြေပြု ကာကွယ်ဆေးထိုးလုပ်ငန်းကို ဒီဇင်ဘာ ၁၁ ရက်မှ စတင်ခဲ့ပြီး ရန်ကုန်တိုင်း ဒေသကြီး၊ အလုံမြို့နယ်မှာတော့ ဂျပန်ဦးနှောက်ရောင်ကာကွယ်ဆေးကို ကလေး ဦးရေ လေးထောင်ကျော် ထိုးနှံပေးသွားမယ်လို့သိရပါတယ်။ အလုံမြို့နယ်အတွင်း ဆောင်ရွက်နေတဲ့ ရပ်ရွာအခြေပြု ကာကွယ်ဆေးထိုးလုပ်ငန်းမှာ သတ်မှတ် ကလေးဦးရေ ငါးထောင်အထိ ထိုးနှံပေးဖို့ ရည်ရွယ်ထားပြီး စုရပ်တွေကို ကလေးတွေ ရောက်ရှိအောင် ရပ်ကွက်အုပ်ချုပ်ရေးမှူးတွေနဲ့ ချိတ်ဆက်ဆောင်ရွက်နေတယ်လို့ သိရပါတယ်။ အလုံမြို့နယ်မှာ ရပ်ကွက် (၁၁) ခုရှိပြီး ရပ်ကွက်တစ်ခုကို တစ်ရက်နှုန်း အချိန်ပေးပြီး ဆေးထိုးစုရပ်လေးခု ခွဲကာ ထိုးနှံပေးနေတာ ဖြစ်ပါတယ်။
ရပ်ကွက်အလှည့်ကျထိုးနှံပေးတဲ့ စနစ်ဖြစ်တာကြောင့် ဆေးထိုးစုရပ်ကို မမှီလိုက်တဲ့ ကလေးတွေအတွက် ကာကွယ်ဆေးထိုးနှံဖို့ သတ်မှတ်ထားတဲ့ ၁၀ ရက်အတွင်း ဒေသန္တရဆေးခန်းမှာ မနက်ကိုးနာရီကနေ နေ့လည်နှစ်နာရီအတွင်း သွားရောက်ထိုးနှံနိုင်မှာ ဖြစ်ပါတယ်။ 
ကာကွယ်ဆေးမထိုးမီ ကလေးကို စစ်ဆေးကြည့်ရှုတဲ့ လုပ်ငန်းကို အချိန်ပိုပေးထားပြီး ကာကွယ်ဆေးထိုးနှံပြီးရင်လည်း နာရီဝက်စောင့်ကြည့်ပြီးမှ နေရပ်ကို ပြန်လွှတ်ပေးတာဖြစ်ပါတယ်။ 
ရပ်ရွာအခြေပြုအစီအစဉ်မှာ အသက်ကိုးလကနေ ငါးနှစ်အရွယ်ကလေးတွေနဲ့ စာသင်ကျောင်းတွေမှာ ကာကွယ်ဆေးမထိုးဖြစ်ခဲ့တဲ့ ကလေးတွေကို ထိုးနှံပေးနေတာဖြစ်ပါတယ်။
ဂျပန်ဦးနှောက်ရောင် ကာကွယ်ဆေးထိုးနှံပြီးခဲ့တဲ့ ရပ်ကွက်တွေမှာ ဆေးထိုးဖို့ကျန်ရှိနေခဲ့တဲ့ ကလေးတွေကိုလည်း ကောက်သင်းကောက် စနစ်နဲ့ ဆေးထိုးအဖွဲ့က အိမ်တိုင်ရာရောက် ထိုးနှံပေးမှာဖြစ်ပါတယ်။ 
အလုံမြို့နယ်က စာသင်ကျောင်းတွေမှာ ကလေး ခုနစ်ထောင်နီးပါးကို ဂျပန်ဦးနှောက်ရောင် ကာကွယ်ဆေးထိုးနှံပေးနိုင်ခဲ့ပြီး ကျောင်းနေကလေး ခြောက်ရာနီးပါးကို ကာကွယ်ဆေးထိုးနှံဖို့ ရက်ရွှေ့ဆိုင်းခဲ့ရပါတယ်။
 
 

Related News