ရပ်ရွာအခြေပြု ဂျပန်ဦးနှောက်ရောင် ကာကွယ်ဆေးထိုးလုပ်ငန်းကို ဒီဇင်ဘာ ၁၁ ရက်ကစတင်ခဲ့ပြီး ကာကွယ်ဆေးထိုးအစီအစဉ် နောက်ဆုံးရက်ဖြစ်တဲ့ ဒီကနေ့ ဒီဇင်ဘာ ၂၀ ရက်အထိ စုရပ်တွေကို လာရောက်ထိုးနှံတဲ့ ကလေးဦးရေ အရေအတွက် လျော့ကျနေတာကြောင့် ကာကွယ်ဆေးထိုးနှံရမည့် ရက်တွေ ထပ်တိုးသွားဖို့ ရှိတယ်လို့ သိရပါတယ်။ရွှေ့ပြောင်းလူဦးရေများပြီး ကလေးစာရင်းအတိအကျရရန် ခက်ခဲတဲ့ လှိုင်သာယာမြို့နယ်မှာတော့ ရပ်ရွာ အခြေပြု ကာကွယ်ဆေးထိုးလုပ်ငန်းအတွင်း ကလေးဦးရေ ခြောက်သောင်းကျော် ထိုးနှံပေးရန် ရည်ရွယ်ထားပြီး ကာကွယ်ဆေးထိုးနှံပေးခဲ့တဲ့ ကိုးရက်မြောက်အထိ ကလေးဦးရေ လေးသောင်း ခုနစ်ထောင်ကျော် ထိုးနှံပေးထားပါတယ်။

ကျန်ရှိနေတဲ့ ကလေးဦးရေ နှစ်သောင်းကိုတော့ ကာကွယ်ဆေးထိုးအစီအစဉ် နောက်ဆုံးရက်ဖြစ်တဲ့ ဒီဇင်ဘာ ၂၀ ရက်အတွင်း အပြီးသတ်ထိုးနှံပေးမှာဖြစ်ပြီး သတ်မှတ်ဦးရေ မပြည့်မီခဲ့ရင် ကျန်းမာရေးနှင့်အားကစားဝန်ကြီးဌာနက ညွှန်ကြားထားတဲ့အတိုင်း ကာကွယ်ဆေးထိုးနှံရမယ့် ရက်တွေ ထပ်တိုးသွားဖို့ ရှိတယ်လို့သိရပါတယ်။လူဦးရေများတဲ့ မြို့နယ်တွေမှာ ဒေသန္တရဆေးခန်း၊ ရပ်ကွက်အုပ်ချုပ်ရေးမှူးရုံးတွေနဲ့ သတ်မှတ်စုရပ်တွေမှာ ကာကွယ်ဆေး လာရောက်ထိုးနှံတဲ့ ကလေးဦးရေ အရေအတွက် နည်းတာကြောင့် ကာကွယ်ဆေးထိုးအဖွဲ့တွေက ကွင်းဆင်းပြီး အိမ်တိုင်ရာရောက်လိုက်လံထိုးနှံပေးမှု ပြုလုပ်ခဲ့ပါတယ်။ ရန်ကုန်တိုင်းဒေသကြီးမှာ ရပ်ရွာအခြေပြု ကာကွယ်ဆေးထိုးအစီအစဉ်အတွင်း ကလေးဦးရေ ငါးသိန်းအထိ ထိုးနှံဖို့ သတ်မှတ်ထားပြီး မြို့နယ်အလိုက် ကာကွယ်ဆေးထိုးနှံပြီးစီးမှု (၅၀) ရာခိုင်နှုန်းကျော်ပဲ လွှမ်းခြုံမှု ရှိတယ်လို့သိရပါတယ်။

ပြီးခဲ့တဲ့ နိုဝင်ဘာက ရန်ကုန်တိုင်းဒေသကြီးမှာ လုပ်ဆောင်ခဲ့တဲ့ ကျောင်းအခြေပြု ကာကွယ်ဆေးထိုးအစီအစဉ်မှာ ကျောင်းနေကလေး (၁၀) သိန်းကျော်ကို ထိုးနှံပေးနိုင်ခဲ့ပြီး ကလေးဦးရေ တစ်သိန်းကျော်ကို ကာကွယ်ဆေးထိုးနှံဖို့ ရက်ရွှေ့ဆိုင်းခဲ့ရပါတယ်။ ရပ်ရွာအခြေပြု ကာကွယ်ဆေးထိုးအစီအစဉ်မှာတော့ တစ်နိုင်ငံလုံးက ကလေးဦးရေ (သုံးသန်း)ကို ကာကွယ်ဆေး ထိုးနှံပေးနိုင်ခဲ့ပြီး လက်ရှိအချိန်ထိ ကလေး နှစ်သန်းကျော် ကာကွယ်ဆေးထိုးနှံဖို့ ကျန်ရှိနေသေးတယ်လို့ သိရပါတယ်။

 

 

 

Related News