ကလေးနို့မှုန့်တွေ ဈေးကွက်မြှင့်တင်ရေးက ကလေးငယ်တွေရဲ့ ကျန်းမာရေးကို ခြိမ်းခြောက်နေပြီး  ကလေးတွေမှာအန္တရာယ်ရှိတဲ့ ဆိုးကျိုးတွေကိုခံစားရနိုင်တယ်လို့ မတ်လ(၁၃)ရက်က ပြုလုပ်ခဲ့တဲ့ မိခင်နို့တိုက်ကျွေးမှုနှင့်ကလေးနို့မှုန့်လုပ်ငန်းများအား သုတေသနပြုလုပ်ထားသောSave The Childrenရဲ့ အစီရင်ခံစာ သတင်းစာရှင်းလင်းပွဲမှ သိရပါတယ်။ မြန်မာနိုင်ငံမှာ မိခင်နို့တိုက်ကျွေးခြင်းဟာ ရိုးရာအစဉ်အလာအရ ရှိနေပေမယ့် ကလေးနို့မှုန့်တွေရဲ့ ဈေးကွက်မြှင့်တင်ရေးစည်းရုံးမှုတွေကြောင့် မိခင်တွေရဲ့ မိခင်နို့တိုက်ကျွေးမှုအပေါ် ယုံကြည်ချက်လျော့ကျလာပြီး နို့မှုန့်တိုက်ကျွေးမှုအပေါ်သာ အားထားလာတာကိုတွေ့ရတယ်လို့ သုတေသနအစီရင်ခံစာအရ သိရပါတယ်။

  အထူးသဖြင့် မိခင်နို့တိုက်ကျွေးမှုနှုန်းနိမ့်နေဆဲဖြစ်တဲ့ မြန်မာနိုင်ငံလိုနိုင်ငံမျိုးမှာ ပိုပြီး ဆိုးရွားတဲ့ အကျိုးဆက်ကို ခံစားရနိုင်တယ်လို့Save The Children ရဲ့ အစီရင်ခံစာအသစ်မှာ ဖော်ပြသတိပေးထားပါတယ်။ ဒီလို ကလေး နို့မှုန့်တွေကိုဈေးကွက်ထဲမှာ ရောင်းချတဲ့ အခါကျင့်ဝတ်စည်းကမ်းတွေနဲ့မညီ ပိတ်ပင်ထားတဲ့ နည်းလမ်းတွေနဲ့ ဆက်လက်ဈေးကွက်မြှင့်တင်နေတာကိုတွေ့နေရတယ်လို့ အဟာရ ပညာရှင်တစ်ဦး က ပြောပါတယ်။ မြန်မာနိုင်ငံမှာ မွေးကင်းစနဲ့ အသက်(၅)နှစ်အောက် ကလေးငယ်သေဆုံးမှုနှုန်းဟာ အာရှမှာ အမြင့်ဆုံးစာရင်းထဲ ပါဝင်နေပါတယ်။ မွေးကင်းစကလေးသေဆုံးမှုမှာ အယောက်(၁၀၀)မှာ (၄၀)ထိရှိနေပြီး အသက်(၅)နှစ်အောက် ကလေးသေဆုံးမှုမှာ အယောက်(၁၀၀၀)မှာ (၅၀)ထိရှိနေပါတယ်။

မိခင်နို့တိုက်ကျွေးမှုဟာကလေးငယ်တွေရဲ့ကျန်းမာရေးကို ကောင်းမွန်စေပေမယ့် နို့မှုန့်တွေကိုတိုက်ကျွေးမှုအများဆုံးဖြစ်လာတဲ့ အတွက် ကလေးကျန်းမာရေးချို့တဲ့ လာစေတယ်လို့ ကလေးမိခင်တစ်ဦးက ပြောပါတယ်။လက်ရှိမြန်မာနိုင်ငံမှာ ငါးနှစ်အောက်ကလေးရဲ့( ၃၀)ရာခိုင်နှုန်းမှာ အာဟာရချို့တဲ့ ပုညှက်ခြင်းကို ခံစားနေရပြီး ၇ ရာခိုင်နှုန်းမှာ လတ်တလောအာဟာရချို့တဲ့ခြင်းကို ခံစားနေရတယ်လို့လည်း သတင်းစာရှင်းလင်းပွဲမှာ ထုတ်ပြန်ခဲ့တဲ့Save The Children ရဲ့ အစီရင်ခံစာမှာ ဖော်ပြပါတယ်။

 

 

Related News