ကျောက်တံတားမြို့နယ်ကို ဆေးလိပ်ငွေ့ကင်းစင်နယ်မြေအဖြစ် သတ်မှတ်နိုင်ရန် ပြည်သူ့ကျန်းမာရေးဖောင်ဒေးရှင်းက လာမယ့် ခြောက်လအတွင်း မြို့နယ်အုပ်ချုပ်ရေးမှူးရုံး အဖွဲ့ဝင်တွေ၊ ပညာရေးအဖွဲ့တွေနဲ့ပူးပေါင်း ဆောင်ရွက်သွားမယ်လို့ ပြည်သူ့ကျန်းမာရေး ဖောင်ဒေးရှင်းကတာဝန်ရှိသူက ပြောပါတယ်။ ၂၀၀၆ ခုနှစ် ဆေးလိပ်နှင့် ဆေးရွက်ကြီး သုံးစွဲမှုထိန်းချုပ်ရေးဥပဒေမှာပါဝင်တဲ့ အခန်း(၄) ပုဒ်မ(၆)နဲ့ ပုဒ်မ (၇)အရ ယခုလို ဆေးလိပ်ငွေ့ကင်းစင် နယ်မြေတွေ ဖော်ဆောင်နေတာဖြစ်ပြီး ဒီနှစ်ကုန်မှာတော့ ကျောက်တံတားမြို့နယ်ကို ဆေးလိပ်ငွေ့ကင်းစင်နယ်မြေအဖြစ် သတ်မှတ်မှာ ဖြစ်ပါတယ်။
 
ကျောက်တံတားမြို့နယ်မှာ အများပြည်သူနဲ့သက်ဆိုင်တဲ့ နေရာ ၁၂၄ ခုရှိပြီး အဲ့ဒီနေရာတွေမှာ ဆေးလိပ်မသောက်ဖို့ အသိပေးတားမြစ်သွားမှာဖြစ်ပါတယ်။ ရန်ကုန်မြို့ရဲ့ အချက်အခြာကျတဲ့ ကျောက်တံတားမြို့နယ်အတွင်းတည်ရှိတဲ့ ပန်းခြံ၊ စာသင်ကျောင်း၊ ဆေးရုံနဲ့ ရုံးခန်းတွေမှာ ဆေးလိပ်မသောက်ရေး ပညာပေးလုပ်ငန်းတွေကို ခြောက်လတာ ဆောင်ရွက်သွားမယ်လို့ ပြည်သူ့ကျန်းမာရေး ဖောင်ဒေးရှင်းဥက္ကဋ္ဌ ဒေါက်တာသန်းစိန်က ပြောပါတယ်။ 
 
ပြည်သူ့ကျန်းမာရေးဖောင်ဒေးရှင်းက ကျောင်းဖွင့်ရာသီရောက်တာနဲ့ စာသင်ကျောင်းတွေမှာ ဆေးလိပ်မသောက်ရေး ပညာပေးလုပ်ငန်းတွေ စတင်ဆောင်ရွက်သွားမယ်လို့ သိရပါတယ်။ ရန်ကုန်မြို့တော်စည်ပင်သာယာရေး ကော်မတီကတော့ ဆေးလိပ်၊ဆေးရွက်ကြီး ထိန်းချုပ်ရေးလုပ်ငန်းတွေကို ပြည်သူ့ကျန်းမာရေးဖောင်ဒေးရှင်းနဲ့ လက်တွဲဆောင်ရွက်မယ်လို့ ပြောပါတယ်။
 
ကျောက်တံတားမြို့နယ်မှာ အစိုးရရုံး ၃၅ ရုံး၊ အစိုးရစာသင်ကျောင်း ၇ ကျောင်းနဲ့ ဆေးရုံဆေးခန်းတွေ အများဆုံးတည်ရှိနေတာကြောင့် ဆေးလိပ်ငွေ့ကင်းစင်တဲ့ စံပြမြို့နယ်အဖြစ် သတ်မှတ်ဖို့ ရွေးချယ်ခဲ့ကြတာဖြစ်ပါတယ်။ ပြည်သူ့ကျန်းမာရေး ဖောင်ဒေးရှင်းက လာမယ့် ငါးနှစ်အတွင်း ရန်ကုန်မြို့တော်တစ်ခွင်ရှိ မြို့နယ် ၃၃ မြို့ကို ဆေးလိပ်ငွေ့ကင်းစင်တဲ့ နေရာတွေအဖြစ်သတ်မှတ်နိုင်ရန် ကြိုးပမ်းနေကြောင်း သိရပါတယ်။ 
 
 

Related News