အလုပ်သမား၊ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန လူမှုဖူလုံရေးအဖွဲ့အလုပ်သမားဆေးရုံကြီး (ရန်ကုန်) ကျန်းမာရေးအသိပညာပေး ဆွေးနွေးခြင်းနှင့် ကွင်းဆင်းဆေးကုသခြင်းကို ဇူလိုင်လ(၂၄)ရက်က သာကေတစက်မှုဇုန်ရှိ Myan Shwe Pyi Tractors Ltd  မှာ ပြုလုပ်ခဲ့ပါတယ်။ အခုလို ကွင်းဆင်းကုသရာမှာ အလုပ်သမားဆေးရုံကြီး(ရန်ကုန်)က ခွဲစိတ်အထူးကု၊ အရိုး/အကြောအထူးကု၊ အထွေထွေရောဂါအထူးကုနဲ့ သွား/ခံတွင်းအထူးကု ဆရာဝန်ကြီးတွေက ကျန်းမာရေးဟောပြောမှုတွေပြုလုပ်ပြီး၊ စမ်းသပ်ကုသမှုတွေပါ ပြုလုပ်ပေးခဲ့တာပါ။

ကုသမှုတွေထဲက ထပ်မံကုသဖို့လိုအပ်သူတွေကို လူမှုဖူလုံရေးအဖွဲ့ အလုပ်သမားဆေးရုံကြီး (ရန်ကုန်)နဲ့ သက်ဆိုင်ရာဆေးရုံတွေမှာ ဆက်လက်ကုသပေးမှာဖြစ်တယ်လို့သိရပါတယ်။အခုလို ကွင်းဆင်းကုသမှုတွေကို လူမှုဖူလုံရေးပေးဆောင်ထားတဲ့ စက်ရုံအလုပ်ရုံ နှင့် ကုမ္ပဏီတွေကို လစဉ် ဆောင်ရွက်ပေးနေတာပါ။ စက်ရုံဝန်ထမ်းတွေကတော့ အလုပ်သမားဆေးရုံကြီး(ရန်ကုန်)က  အထူးကုတွေ ကိုယ်တိုင်အလုပ်ခွင်အတွင်း လာရောက် စမ်းသပ်ကုသပေးတာနဲ့ လိုအပ်တဲ့ဆေးတွေကို အခမဲ့ပေးတာကြောင့် ၀န်ထမ်းတွေအတွက် အဆင် ပြေတယ်လို့ပြောပါတယ်။

အခုကွင်းဆင်းကုသရာမှာ လူမှုဖူလုံရေးအဖွဲ့အလုပ်သမားဆေးရုံကြီး (ရန်ကုန်)မှ ဆေးရုံအုပ်၊ဒုတိယဆေးရုံ အုပ်၊ ရောဂါဗေဒအထူးကုဆရာဝန်ကြီး ၊ အထူးကုဆရာဝန်ကြီး ၊ လက်ထောက်ဆရာဝန် ၊ သူနာပြု နဲ့ အထောက်အကူပြုတွေနဲ့ အင်အား(၂၀)ဦးပါဝင်တယ်လို့သိရပါတယ်။ လက်ရှိ ရန်ကုန်တိုင်းဒေသကြီးအတွင်းမှာ အလုပ်သမား၊ လူဝင်မှုကြီးကြပ် ရေးနှင့်ပြည်သူ့အင်အားဝန်ကြီးဌာန လူမှုဖူလုံရေးအဖွဲ့မှ အလုပ်သမားဆေးရုံကြီး(၂)ရုံနဲ့ လူမှုဖူလုံရေး- ကဲဝဲလ်ဆေးခန်း (၄)ခု ဖွင့်လှစ်ထားတယ်လို့သိရပါတယ်။

 

 

Related News