ကျန်းမာရေးဝန်ထမ်းမဟုတ်တဲ့ ပြည်သူတွေနဲ့ထိတွေ့ဆက်ဆံနေရတဲ့ အစိုးရနဲ့ပုဂ္ဂလိက၀န်ထမ်းတွေအတွက် ဖွင့်လှစ်တဲ့ အရေးပေါ် နှလုံးအသက်ကယ်ပြုစုစောင့်ရှောက်ခြင်းသင်တန်းကို သြဂုတ်လ ၅ ရက်နေ့က မန္တလေးမြို့၊  မြို့တော်ခန်းမမှာ ပြုလုပ်ခဲ့တာ ဖြစ်ပါတယ်။ 

အရေးပေါ် နှလုံးအသက်ကယ်ပြုစုစောင့်ရှောက်ခြင်းသင်တန်းကို စင်္ကာပူနိုင်ငံအခြေစိုက် Gold Lite & Schiller Asia Pacific Co.Ltd ကပံပိုးပေးတာဖြစ်ပြီး မန္တလေးအထွေထွေရောဂါကုဆေးရုံကြီး၊ နှလုံးအထူးကုဌာနမှ နှလုံးအထူးကုဆရာဝန်တွေနဲ့ မလေးရှားနိုင်ငံ မှ Professor Rashidi Ahmad တို့နဲ့ပူးပေါင်းပို့ချတာဖြစ်ပါတယ်။

အရေးပေါ် နှလုံးအသက်ကယ်ပြုစုစောင့်ရှောက်ခြင်းနည်းလမ်းတွေကို ကျန်းမာရေးဝန်ထမ်းတွေဖြစ်တဲ့ သူနာပြုတွေ၊ ဆရာဝန်တွေကို သင်တန်းပို့ချပေးပြီးဖြစ်ပေမဲ့ ဆေးရုံပြင်ပမှာ လူတစ်ယောက်နှလုံးခုန်ရပ်သွားပါက နှလုံးကိုပြန်လည်နိုးထလာစေဖို့အတွက် သက်ကယ်နည်းလမ်းတွေ နှင့် လုပ်ဆောင်ရမယ့်နည်းစနစ်တွေကို သိရှိစေဖို့အတွက် သင်ကြားပို့ချတာ ဖြစ်တယ်လို့ ဆိုပါတယ်။

သင်တန်းမှာ မန္တလေးမြို့တော်စည်ပင်သာယာရေးကော်မတီ ၀န်ထမ်းများ၊ မန္တလေးမြို့က ဟိုတယ်ဝန်ထမ်းများ၊ အထွေထွေအုပ်ချုပ်ရေးဦးစီးဌာနမှ ၀န်ထမ်းများ၊ ရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များ၊ မင်္ဂလာမန္တလေး စီမံကိန်းမှ လုံခြုံရေးဝန်ထမ်းတွေအပါအဝင် သင်တန်းသား ၂၀၀ ကို သင်ကြားပို့ချပေးတာဖြစ်ပါတယ်။ ဒီသင်တန်းမှာ စာတွေ့၊ လက်တွေ့အပြင် အသက်ကယ်နည်းတွေဖြစ်တဲ့ ရင်ဘတ်ဖိပြီးနှလုံးကိုပြန်လည်နိုးထလာအောင် နှလုံးနှိုးနည်း၊  နှလုံးနှိုးစက်ဖြစ်တဲ့(AED)ကို အသုံးပြုကာနှလုံးကိုပြန်လည်နိုးစေတဲ့ နည်းလမ်းတွေကို ပို့ချသွားမယ်လို့ သိရပါတယ်။

ဒါအပြင် မန္တလေးအထွေထွေရောဂါကုဆေးရုံကြီး နှလုံးအထူးကုဌာနမှ နှလုံးအထူးကုဆရာဝန်တွေကလည်း  အရေးပေါ် နှလုံးအသက်ကယ်ပြုစုစောင့်ရှောက်ခြင်းနည်းလမ်းတွေကို ဟိုတယ်နှင့်ခရီးသွားလုပ်ငန်းမှာ လုပ်ကိုင်နေတဲ့ ၀န်ထမ်း ၂၀၀ ၀န်းကျင်ကိုလည်း လာမယ့်အောက်တိုဘာလမှာ သင်တန်းပို့ချနိုင်ဖို့  စီစဉ်နေတယ်လို့သိရပါတယ်။

 

 

 

Related News