လှိုင်သာယာမြို့နယ်မှာ ဝက်သက်၊ ဂျိုက်သိုးကာကွယ်ဆေးကို ဖေဖော်ဝါရီ ၁၇ ရက်ကနေ ၂၈ ရက်အထိထိုးနှံပေးခဲ့ပြီး ရည်မှန်းကလေးဦးရေ မပြည့်မီတာကြောင့် လာမယ့် မတ်လ ၁၇ ရက်ကနေ ၁၉ရက်အတွင်း ကာကွယ်ဆေး ထပ်မံထိုးနှံပေးမယ်လို့ လှိုင်သာယာမြို့နယ်ကျန်းမာရေးဦးစီးဌာနကနေ သိရပါတယ်။လှိုင်သာယာမှာ ဝက်သက်ဂျိုက်သိုးကာကွယ်ဆေးထိုးနှံပေးခဲ့တဲ့ (၁၂)ရက်အတွင်း အသက်ကိုးလကနေ ၁၅ နှစ်အရွယ်ကလေးဦးရေ တစ်သိန်းခြောက်သောင်းအထိ ထိုးနှံပေးဖို့ ရည်မှန်းခဲ့ပါတယ်။ ဒါပေမဲ့ ကလေးဦးရေ တစ်သိန်းလေးသောင်းကို ထိုးနှံပေးနိုင်ခဲ့ပြီး ကျန်ရှိနေတဲ့ ကလေးတွေ ကာကွယ်ဆေး လွှမ်းခြုံမှုရရှိစေဖို့ ဆေးထိုးအဖွဲ့(၂၄)ဖွဲ့က ကွင်းဆင်းထိုးနှံပေးမှာဖြစ်ပါတယ်။

ဆေးထိုးအဖွဲ့တွေက အပိုဆောင်းထိုးနှံပေးမဲ့ သုံးရက်အတွင်း ကျူးကျော်ရပ်ကွက်တွေကို ကွင်းဆင်းလှည့်လည် ထိုးနှံပေးမှာပါ။ကာကွယ်ဆေးထိုးနှံပေးခဲ့တဲ့ ကာလအတွင်း ခရီးသွားနေတာ၊ နေမကောင်းဖြစ်နေတာ၊ ဒါမှမဟုတ် ဆေးထိုးဖို့ မသိလိုက်တဲ့ ကလေးတွေကို ကွင်းဆင်းထိုးနှံပေးမှာဖြစ်ပါတယ်။ အပိုဆောင်းထိုးနှံပေးမယ့် သုံးရက်အတွင်းမှာတော့ ကလေးဦးရေ နှစ်သောင်းကို ထိုးနှံပေးဖို့ ရည်မှန်းထားတယ်လို့သိရပါတယ်။လှိုင်သာယာမြို့နယ်အပါအဝင် မြို့နယ်ခြောက်ခုမှာ ဝက်သက်ဂျိုက်သိုးကာကွယ်ဆေး အစုလိုက်ထိုးနှံတဲ့လုပ်ငန်းကို ဖေဖော်ဝါရီ ၁၇ ရက်ကနေ ၂၈ ရက်အတွင်း ဆောင်ရွက်ခဲ့တာဖြစ်ပါတယ်။

 

 

Related News