ရန်ကုန်တိုင်းဒေသကြီးမှာ ဒီကနေ့ မနက်အထိ ရာသီတုပ်ကွေး H1N1 ရောဂါကူးစက်ခံစားရလို့ သေဆုံးသူဦးရေ (၄၀) အထိ ရှိသွားပြီဖြစ်တယ်လို့ ရန်ကုန်တိုင်းဒေသကြီး၊ ပြည်သူ့ကျန်းမာရေးဦးစီးဌာနက အတည်ပြုလိုက်ပါတယ်။ ရန်ကုန်တိုင်းဒေသကြီးထဲမှာ ရာသီတုပ်ကွေး H1N1 ရောဂါကူးစက်ခံစားရလို့ သေဆုံးသူဦးရေ လေးဆယ်အထိရှိသွားပြီဖြစ်ပြီး H1N1 ဗိုင်းရပ်စ်ပိုးတွေ့ရှိထားတယ်လို့ ဓာတ်ခွဲအတည်ပြုပြီးသူဦးရေ (၁၅၀) နီးပါးရှိနေပါတယ်။ ရန်ကုန်တိုင်းဒေသကြီးမှာ ရာသီတုပ်ကွေး H1N1 ရောဂါဖြစ်နေတယ်လို့ သံသယရှိနေသူသုံးရာကျော်ရှိနေပြီး ဓာတ်ခွဲစစ်ဆေးအတည်ပြုနေဆဲဖြစ်ပါတယ်။ ရာသီတုပ်ကွေး H1N1 ရောဂါကြောင့် သေဆုံးခဲ့သူတွေထဲမှာ အသက်ငါးနှစ်အောက်ကလေးတွေ၊ အသက် (၆၅)နှစ်အထက် သက်ကြီးရွယ်အိုတွေ၊ ကင်ဆာရောဂါဖြစ်နေသူတွေ၊ မွေးရာပါနှလုံးရောဂါရှိသူတွေ ဖြစ်တယ်လို့သိရပါတယ်။  (H1N1)က ရောဂါအခံရှိသူတွေမှာ ကူးစက်ခံရရင်ပိုမိုပြင်းထန်ပြီး နောက်ဆက်တွဲရောဂါ ပြင်းထန်အဆုတ်ရောင်ရောဂါ (နမိုးနီးယား)နဲ့ သေဆုံးကြတာဖြစ်ပါတယ်။

လက်ရှိမှာတော့ တိုင်းဒေသကြီး နဲ့ ပြည်နယ်အသီးသီးမှာ ရန်ကုန်တိုင်းဒေသကြီးက H1N1 ရောဂါဖြစ်ပွားသေဆုံးသူအများဆုံး အဖြစ် ရပ်တည်လျက်ရှိပါတယ်။ လှိုင်သာယာမြို့နယ်ကတော့ ရွှေ့ပြောင်းအခြေချနေထိုင်သူအများဆုံးမြို့နယ် ဖြစ်တာကြောင့် ရာသီတုပ်ကွေး H1N1 ရောဂါဖြစ်ပွားတယ်လို့ အတည်ပြုပြီးသူ (၁၄) ဦးနဲ့ သေဆုံးသူငါးဦးရှိနေပါတယ်။

မိမိမှာတုပ်ကွေးရောဂါဖြစ်ပွားတယ်လို့ သံသယရှိတာနဲ့ လူထူထပ်ရာနေရာတွေကိုမသွားပဲ နှာခေါင်းစည်းနဲ့ ကာကွယ်တာ၊ လက်ပုံမှန်ဆေးကြောတာတွေကစပြီး မိမိကိုယ်တိုင်ကစ ကာကွယ်ပါလို့ ရန်ကုန်တိုင်းဒေသကြီးပြည်သူ့ကျန်းမာရေးဦးစီးဌာနက တိုက်တွန်းထားပါတယ်။တစ်နိုင်ငံလုံးမှာ ရာသီတုပ်ကွေး H1N1 ရောဂါဖြစ်ပွားတယ်လို့ အတည်ပြုပြီးသူသုံးရာနီးပါးရှိပြီး သေဆုံးသူဦးရေ ငါးဆယ်ရှိသွားပြီးဖြစ်ပါတယ်။

 

 

 

Related News